LUKA 3
3
Vumondo vwakwe Yohane M’batizi
(Mat. 3:1-12; Mrk. 1:1-8)
1Mwaka wa ikumi na kasano wa kutetia kwakwe Kaisari Tiberio, hala Pontio Pilato ekitetia Yudea, ne Herode e mfumwa wa Galilaya, ne Filipo mndughu wakwe e mfumwa wa Iturea na isanga la Trakoniti, ne Lisania e mfumwa wa Abilene, 2igheri la vutasi vubaha vwakwe Ana ne Kayafa, kiteto cha Mrungu kikamfikia Yohane mwana Zakaria, uko nyika. 3Akafika he isanga lose leho hafuhi na Yordani, ekibirikira m’batizo wa kuchwa mti kweete kushighiwa mabanu, 4sa vuntu cheandikwe he kitabu cha viteto vya mroti Yesaya,
“Izii la mraamberija uko nyika,
Harehani nzia ya Mfumwa,
Cheleleshani hantu evechija.
5Kila kiindi kineizujwa,
Na kila ntuvi na kidunda kinesejwa,
Na hegogorote henecheleleshwa;
6Na vose vena mwiri venevona lukio lwa Mrungu.”
7Akavati ala mavungano vemswiie iti avabatize, “Unywi vana va nyoka, ni ani emuchundie iti muahe ila oro yeneza? 8Gerani ra ntunda jeteghana na kuchwa mti; neri musivoke kuteta he ngoro jenyu, ‘Tuna vava eye Abrahamu;’ ambu nimutio, ‘He mabwe aa Mrungu eidima kumvushija Abrahamu vana.’ 9Na iki huvu izoka lakenja kuvikwa he vikolo vya miti; heicho, kila mti wesigera ntunda jedi, unetemwa na kugerwa he moto.”
10Mavungano vakamvwija, “Tukete ze ra?” 11Akagharusha akavati, “Ula ena nkanzu mbiri, amunke ula esina nkanzu mwe; na mwenye vijo areketa huvo huvo.” 12Veghuha kodi navo vakaza kurabatizwa, vakavwija, “Mcheji, na uswi tukete ze?” 13Akavati, “Musughuhe kintu kuvecha kiringanyo mweazerwe.” 14Vasikari navo vakamvwija, vekiti, “Na uswi tukete ze?” Akavati, “Musimtunguluke mntu, neri musile marenge; kangi mutishe kwaa mhako wenyu.”
15Aho vantu vecheri ghoja vila vyeneza, vose vekidunganyadunganya he ngoro javo mburi yakwe Yohane, iti hangi niye Kristo, 16Yohane akavagharusha, akavavwira vose, “Kididi nimubatiza kwa mpombe; mira hezie mntu ena nzinya kunikela mi, eye mi chesinifwenyye kuchungua mkoa wa viratu vyakwe; ye enemubatiza kwa Mpeho Wedi na moto. 17Egurire chahetia he mkono wakwe, naye enehaghia nezo ishuntio lakwe, na ngano eneivunganya he gu yakwe, mira mahuhu eneashota na moto wesifwa.”
18Niho akavabirikira vantu kwa marunge angi majinki. 19Mira mfumwa Herode ekinabohiwe niye he mburi yakwe Herodia, mche wa mndughu wakwe, na vivivi vyose Herode ekivihirire, 20he ivyo vyose akaongeja na icho, akamgera Yohane he kichungo.
M’batizo wakwe Yesu
(Mat. 3:13-17; Mrk. 1:9-11)
21Igheri vantu vose vekikenja kubatizwa, Yesu naye ekinabatizwe, ekiomba, wanga hakajuvuka; 22Mpeho Wedi akamseia kwa fwanyanyi ya kimwiri sa nziva; izii likafuma uko wanga, “We niwe Mwanangu, mkunde wangu, neizihijwe niwe.”
Lukolo lwakwe Yesu
(Mat. 1:1-17)
23Yesu mwenye ekivoka kucheja ekina miaka sa makumi matatu, ekidunganyijwa iti ni mwana Yosefu, mwana Eli, 24mwana Matati, mwana Levi, mwana Meliki, mwana Yana, mwana Yosefu, 25mwana Matatia, mwana Amosi, mwana Nahumu, mwana Esili, mwana Nagai, 26mwana Maati, mwana Matatia, mwana Semei, mwana Yosefu, mwana Yuda, 27mwana Yoana, mwana Resa, mwana Zerubabeli, mwana Shaltieli, mwana Neri, 28mwana Meliki, mwana Adi, mwana Kosamu, mwana Elimadamu, mwana Eri, 29mwana Yosua, mwana Eliezeri, mwana Yorimu, mwana Matati, mwana Levi, 30mwana Simioni, mwana Yuda, mwana Yosefu, mwana Yonamu, mwana Eliakimu, 31mwana Melea, mwana Mena, mwana Matata, mwana Natani, mwana Davidi, 32mwana Yese, mwana Obedi, mwana Boasi, mwana Salmoni, mwana nashon, 33mwana Aminadabu, mwana Aramu, mwana Hersom, mwana Peresi, mwana Yuda, 34mwana Yakobo, mwana Isaki, mwana Abrahamu, mwana Tara, mwana Nahori, 35mwana Serugi, mwana Ragau, mwana Peligi, mwana Eberi, mwana Sala, 36mwana Kenani, mwana Arfaksad, mwana Semu, mwana Noa, mwana Lameki, 37mwana Metusela, mwana Henoki, mwana Yaredi, mwana Mahalaleli, mwana Kenani, 38mwana Enosi, mwana Seti, mwana Adamu, mwana Mrungu.
Currently Selected:
LUKA 3: CHSUNT67
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Chasu New Testament © Bible Society of Tanzania, 1967.