LUKA 4
4
Kugheshwa kwakwe Yesu
(Mat. 4:1-11; Mrk. 1:12-13)
1Yesu akahunduka kufuma Yordani, eizue Mpeho Wedi, akatonjwa ni Mpeho noko nyika misi makumi mane, 2ekigheshwa ni Shetani. He misi iyo tekila kintu; yekinakoloke akasikia nza. 3Shetani akamti, “Kakicha niwe Mwana wa Mrungu, vwira ili ibwe lioke mkate.” 4Yesu akamgharusha, “Cheandikwe iti, Mntu tevikwa ni kijo du.” 5Akamkweja wanga, akamvonyesha vufumwa vwose vwa si ii kwa kakenda kafuhi. 6Shetani akamti, “Ninekunka we iki kifumwa chose na vwedi vwacho, kila cheho he mikono yangu, nami nimunka ula nekunda kumunka. 7Heicho wekinidunkutia, vyose vineoka vyako.”
8Yesu akagharusha, akamti, “Cheandikwe, ‘Umdunkutie Mfumwa Mrungu wako, umtase ye du.’” 9Akamtonja mhaka Yerusalemu, akamvika wanga he nyumba ya mtaso, akamti, “Kakicha niwe Mwana wa Mrungu, kugushe aho si; 10ambu cheandikwe,
‘Enekutumia vamalaika vakwe vakurinde;’ 11na kuti,
‘Venekutika na mikono yavo,
Usireshunta kughu kwako he ibwe.’” 12Yesu akagharusha, akamti, “Cheandikwe, ‘Usimgheshe Mfumwa Mrungu wako.’”
13Shetani ekinakenje mighesho yose akamshigha, akatonga kafunda.
Yesu uko Nazareti
(Mat. 13:53-58; Mrk. 6:1-6)
14Yesu akahunduka kwa nzinya ya Mpeho Wedi, akatonga Galilaya; mburi jakwe jikagisha he masanga ose a hafuhi. 15Naye ekicheja he sinagogi javo, ekikazwa ni vantu vose.
16Akatonga Nazareti hala ereriiwe; na msi wa sabato akaingia he sinagogi sa vuntu emanyere, akaimuka nesa asome. 17Akainkwa kitabu cha mroti Yesaya, akakitangaramua, akaenda hantu heandikwe,
18“Mpeho wa Mfumwa aniikaia,
Ambu enigerire mafuta, nibirikire vakiva mburi yedi,
Enitumie kubirikira nkore kuchunguwa kwavo,
Na matuntu kuveiwa kuvona wa,
Na kushighirija ntase.
19Na kubirikira mwaka wa Mfumwa wekundike.”
20Akakoma kitabu, akamuinka mndima, akaikaa si; na vantu vose vewala he sinagogi vakamtunkulila meso. 21Akavoka kuvati, “Yoo aa maandiko akoloka he masikio enyu.” 22Vakamtetia vuonwa vose, vakamaka he vila viteto vya mbonea vyefuma he momo wakwe, vekiti, “Uu si mwana Yosefu?” 23Akavati, “Siganganya, munenivwira kisoma iki, ‘Mghanga, kukije mwenye; vyose twevisikie iti vyeketike Kapernaumu, vironge na aha he isanga lako mwenye.’” 24Akati, “Kididi nimutio, Tehena mroti ekundwa he isanga lakwe mwenye. 25Mira cha kididi nimutio, Hekina vache vajinki vefwiiwe ni vaghosi he isanga la Isaeli he misi yakwe Elia, igheri lila wanga jachungiwa miaka mitatu na mieji mtandatu, nzota mbaha ikaingia he isanga lose; 26neri Elia tetumiwe he mmwe wavo, esire he mche efwiiwe ni mghosiwe wa Sarepta he isanga la Sidoni. 27Kangi hekina varaumbuka vajinki he Israeli igheri la mroti Elisa, neri tehena eelijwe, esire Naimani mntu ea Sirya.” 28Vose vekiwaho he sinagogi vekisikia huvo, vakakwewa no oro. 29Vakavuka, vakamfunya na nze he muzi, vakamtonja mhaka nengwenengwe ya ntuvi hantu muzi wavo wejengiiwe, nesa vamvirite na aho si; 30mira ye akavecha ghati hevo, akatonga.
Mwanye mpepo ebanjwa
31Akasea mhaka Kapernaumu muzi wa Galilaya, akavacheja msi wa sabato; 32vakamaka mno he michejire yakwe, kila viteto vyakwe vyekina nzinya. 33Na aho he sinagogi hekina mntu ena mpepo ya mpeho mbivi, akaiagha na izii ibaha, 34ekiti, “Shigha! Tuna ni nawe Yesu wa Nazareti? Weteza kututesha tosho? Nekumanyije iti u muni, u Mrazera wa Mrungu.” 35Yesu akaibohia, ekiti, “Huja, mfume!” Niho ila mpepo ikamgusha hala ghati, ikafuma, yesimketie ze. 36Vose vakamaka, vakavwirana, vekiti, “Ni mburi ani ii, ambu eazera mpepo mbivi na nzinya mbaha, najo jifuma.” 37Mburi yakwe ikagisha kila hantu he lila isanga.
Mkwewe Petro na vangi vajinki vebanjwa
(Mat. 8:14-17; Mrk. 1:29-39)
38Akafuma he sinagogi, akaingia he nyumba yakwe Simioni. Mkwewe Simioni, mlala wavo mche wakwe, egurirwe ni isha ikai, vakamwomba he vuntu vwakwe. 39Akaimuka hafuhi naye, akabohia lila isha, llikamshigha; hala indi akavuka akavapipirikia.
40Na izuva lekinyirika, vose vekina vawaji vena mawaji a kila mbare, vakavaete hakwe, akavavikia mikono yakwe kila mmwe, akavabanja. 41Mpepo jikafuma he vantu vajinki jekilonza, jekiti, “We u Mwana Mrungu.” Akajibohija, asijikundije kuteta, ambu jemmanyishe iti niye Kristo.
42Hekinache akafuma, akatonga hantu hesina vantu; mavungano vakamwendisha, vakafika hakwe, vakaenda kumkida iti asivuke havo. 43Akavati, “Chenivaie kubirikira Mburi Yedi ya vufumwa vwa Mrungu he mizi ingi naho; ambu nicho netumiiwe. 44Heicho ekibirikira he sinagogi ja Galilaya.
Currently Selected:
LUKA 4: CHSUNT67
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Chasu New Testament © Bible Society of Tanzania, 1967.