መጽሐፈ መዝሙር 31

በእግዚአብሔር የመታመን ጸሎት

1እግዚአብሔር ሆይ!

መጠጊያ እንድትሆነኝ ወደ አንተ መጥቻለሁ፤

ስለዚህ እንዳፍር አታድርገኝ፤

በጽድቅህም አድነኝ።

2ጌታ ሆይ! አድምጠኝ፤

ፈጥነህም በመምጣት አድነኝ፤

መጠጊያ አለትና ጠንካራ ምሽግ ሆነህ አድነኝ።

3አንተ መጠጊያ ምሽጌ ነህ፤

ስለ ስምህ ስትል ምራኝ፤

የምሄድበትንም መንገድ አሳየኝ።

4አንተ መጠጊያዬ ስለ ሆንክ

ጠላቶቼ ከዘረጉብኝ ወጥመድ አውጣኝ።

5የእውነት አምላክ እግዚአብሔር ሆይ!

ነፍሴን ለአንተ እሰጣለሁና አድነኝ። #ሉቃ. 23፥46።

6ዋጋቢሶች ለሆኑ ጣዖቶች

የሚሰግዱትን ሁሉ ትጠላለህ፤

እኔ ግን በአንተ እታመናለሁ።

7ስለ ዘለዓለማዊ ፍቅርህ ደስ ይለኛል፤

ሐሴትም አደርጋለሁ፤

መከራዬን አይተህ ጭንቀቴን ታውቃለህ፤

8ለጠላቶች አሳልፈህ አልሰጠኸኝም፤

ነገር ግን ሰፊ መንገድ ከፈትክልኝ።

9እግዚአብሔር ሆይ! በችግር ላይ ስለ ሆንኩ

ምሕረትን አድርግልኝ፤

ዐይኖቼ፥ ነፍሴና ሥጋዬ በሐዘን ደክመዋል።

10ሕይወቴ በሐዘን ዕድሜዬም በመቃተት አለቀ፤

በችግሬ ምክንያት ኀይል አጣሁ፤

አጥንቶቼም ደከሙ።

11እኔ የጠላቶቼ መሳለቂያ፥

ለጐረቤቶቼ አስደንጋጭ፥

ለሚያውቁኝም አስፈሪ ነኝ፤

በመንገድ ሲያዩኝም ከእኔ ይሸሻሉ።

12እንደ ሞተ ሰው ተረሳሁ፤

ተሰብሮ እንደ ተጣለ የሸክላ ዕቃ ሆንኩ።

13የብዙ ሰዎችን ሹክሹክታ እሰማለሁ፤

በሁሉም አቅጣጫ ፍርሀት አለ፤

በእኔ ላይ ያሤራሉ፤

ሊገድሉኝ በማቀድ ያድማሉ።

14እግዚአብሔር ሆይ! አንተ አምላኬ ነህ፤

እኔ በአንተ እታመናለሁ።

15እኔ ሁልጊዜ በአንተ እጅ ነኝ፤

ከጠላቶቼ እጅና ከሚያሳድዱኝ ሁሉ አድነኝ።

16ወደ አገልጋይህ በፈገግታ ተመልከት፤

በዘለዓለማዊ ፍቅርህም አድነኝ።

17እግዚአብሔር ሆይ!

ወደ አንተ በምጣራበት ጊዜ አታሳፍረኝ፤

ክፉዎች ግን ይፈሩ፤

ጸጥ ብለውም ወደ ሲኦል ይውረዱ።

18በጻድቅ ላይ በትዕቢትና በንቀት

በኩራትም ስለሚናገር

የሐሰት አንደበታቸውን ጸጥ አሰኝ።

19በአንተ ለመከለል ወደ አንተ ለሚጠጉ

በሰዎች ሁሉ ፊት የምትሰጠው

ለሚፈሩህ ያዘጋጀኸው ደግነት

ምንኛ ትልቅ ነው!

20ከሚያሤሩባቸው ሰዎች በመኖሪያህ ጥላ ሥር ትደብቃቸዋለህ፤

ከመርዘኛ አንደበትም በከለላህ ትጠብቃቸዋለህ።

21በተከበበች ከተማ ውስጥ በነበርኩበት ጊዜ

በሚያስደንቅ ሁኔታ ዘላቂ ፍቅሩን

የገለጠልኝ እግዚአብሔር ይመስገን!

22ከድንጋጤዬ የተነሣ

ከፊትህ ያራቅኸኝ መስሎኝ ነበር፤

ነገር ግን ርዳታህን ፈልጌ ለምሕረት ወደ አንተ ስጣራ

ጩኸቴን ሰማህ።

23እናንተ ለእርሱ የተቀደሳችሁ ሁሉ እግዚአብሔርን ውደዱት፤

እግዚአብሔር ታማኞችን ይጠብቃል፤

ለትዕቢተኞች ግን ተገቢ ቅጣታቸውን ይሰጣል።

24እናንተ በእግዚአብሔር ተስፋ የምታደርጉ ሁሉ

ጠንክሩ፤ በርቱም።

Currently Selected:

መጽሐፈ መዝሙር 31: አማ05

ማድመቅ

Copy

ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ

ስለ አማርኛ አዲሱ መደበኛ ትርጉም ተጨማሪ ይወቁ