Aposkạmi 27
27
Pạul do Romteye idi ocokʼkan
1Ado jahajte Itạliạteko idilea menteko goṭaketʼ khan Pạul ar eṭakʼ adom kạidiko do Julius ńutuman mitʼṭen subedarakʼ tireko jimạkatʼlea. Julius do maharaj Agustus palṭonko modren mitʼṭen subedare tahẽkana. 2Ale do Adramuttium bondorre mitʼṭecʼ jahajre decʼkatele mohnḍayena. Ona do Asiạ reakʼ eṭakʼ eṭakʼ bondorkote calakʼ lạgitʼ sapṛaoge tahẽkana. Makedoniạ disạmren Thessalonikiạ nagraharen Aristarkhos hõ ale sãoteye tahẽkana.
3Dosar hilokʼ aleakʼ jahaj do Sidonrele teṅgokeda. Julius do Pạul sãote ạḍi mońje beoharkeda ar cerṭhakʼ lạgitʼ uniren gateko ṭhene sen ocoadea jemon acʼren gateko jạruṛokʼakʼ jiniskoko emdaṛeae. 4Ado onḍe khon arhõ jahajko laṛaoketʼtalea. Menkhan samaṅ secʼ khone hoyetʼ tahẽkante ale do Kupros dip aṛetele calao idiyena. 5Tayomte Kilikiạ ar Pamphuliạ aṛe aṛete senkate jalapuri paromkate Lukiạ Prodes reakʼ Murạ nagrahatele seṭerena. 6Onḍe Subedar do Alekasandriạ reakʼ mitʼṭecʼ jahaje ńamkeda. Ona jahaj do Itạliạ disạmte calakʼkan tahẽkante uni do ona jahajre aleye decʼketʼlea. 7Aleakʼ jahaj do ḍher din hạbicʼ bại bạite calao idiyente ạḍi kosṭote Knidos nagraha sorle seṭerena, menkhan hoe do ar bae laha ocoatʼlea. Unre ale do Krete dip aṛete Salmone muhạ muhile calao idiyena. 8Ar jalapuri aṛe aṛetele calao idiyente bhage bondorko metakʼ mitʼṭecʼ jaegarele hecʼena. Ona sorrege Lassaea nagraha do tahẽkana.
9Ado nonkate ḍher din parom calaoena. Ar upạs dinko paromente rabaṅ din hõ sor akan tahẽkana. Unre jahajte dãṛãn do muskilge hoyentalea. Onate Pạul do jahajren hoṛko sontorko lạgitʼe metatʼkoa, 10“E ho ńelpe, ińiń ńeletʼkana noa dãṛãnre ạḍi loksan hoyokʼ tabona. Ona loksan do eken jahaj ar mal-jal reakʼ do baṅ, aboakʼ jiwi hõ loksanokʼ tabona.”
11Menkhan subedar do Pạulakʼ katha bae luturatʼte jahaj calaoicʼ ar mạlikakʼ kathae ańjomkeda. 12Ona bondorre rabaṅ din khemao lạgitʼ lek lekan jaega baṅkante ḍher hoṛgeko goṭakeda je, onḍe khon mohnḍakate hoedaṛeakʼ khan Phoenikiạte senkate rabaṅ dinko khemaoa. Phoenikiạ do Krete dipre jahaj teṅgoe reakʼ jaega tahẽkana. Noa jaegare dạkhin pạchim ar utạr pạchim secʼ do phaelaoge tahẽkana.
Jalapurire birbão
13Ado tinre dạkhin khon hisitʼ hisitʼ hoeye ehopʼkeda unre onko doko hudiskeda ako okako khojkan tahẽkan onage hoyakana mente. Onate jahaj reakʼ loṅgorko rakapʼkeda ar Krete dip aṛe aṛeteko laha idiyena. 14Menkhan thoṛa tayom khange ona dip khon Eurakolonko metakʼ mitʼṭecʼ kajak hoe ehopʼena, ar jahaj do ona hoere paṛaoena. 15Hoe iạte samaṅ secʼ do bale laha daṛeada; onate laha idikʼ kurumuṭu baṅkate jahaj do hoe rele ḍombol ocoada. 16Ar Klạudako metakʼ mitʼṭecʼ kạṭicʼ dip oka secʼ do hoe baṅ tahẽkan ontele calao idiyena ar jahajre okaṭakʼ lạukạ tahen ona do ạḍi kosṭote rạpudokʼ khonle rukhiyạkeda. 17Hoṛko do jahajre onako or rakapʼketʼ khan barahikote jahaj reakʼ kholko tolkeda jemon ona reakʼ toktako alo begarokʼ. Ar Surtisko metakʼ jalapuri reakʼ bạl gadare gạḍiạukʼ botorte badamko raṛa pheḍketʼte jahaj do hoere ḍombolokʼ lạgitʼko aṛakʼada. 18Ar birbãote aleakʼ jahaj do nonka sokojokʼ ehopʼena je, dosar hilokʼ hoṛko do jahaj reakʼ bojhako dakʼreko giḍikada. 19Tesar hilokʼ hõ onko do akoakʼ tite jahaj reakʼ jisinkoko giḍikada. 20Ar ḍher din hạbicʼ siń cando se ipilko celege bako ńel ńamlena ar botorgeye hoe idiyetʼ tahẽyena. Ar mucạtʼre bańcaokʼ reakʼ as do cabayentalea.
21Hoṛko ḍher din khon cetʼge bako jomakatʼ tahẽkante Pạul do onko samaṅre teṅgoyenteye menkeda, “E ho, ape do ińakʼ katha ańjomkate Krete dip khon jahaj baṅ laṛaoge boge tahẽkantapea. Enḍekhan noa muskil ar loksanre do ohope paṛaolena. 22Menkhan ńitokʼ iń nehõrapekana, monre dil dohojoṅpe, ente ape modren okoe hõ bape gujukʼa; eken noa jahaj chaḍa. 23Ente ińiń okoeren kan ar okoeyiń sewawaekan uni Isorren mitʼṭen goḍet do ńindạ iń pheḍre teṅgoyenteye metadińạ, 24‘E Pạul, alom botorokʼa. Am do Kạisạr samaṅre teṅgokʼ hoyokʼtama. Ar noa jahajre tinạkʼ do am sãoteko calakʼkan onko sanamkoakʼ jiwi Isor do dayateye dan akawatʼmea.’ 25Onate monre dil joṅpe. Isorre noa pạtiạu menakʼtińạ je, uni okae menakawạdiń ona do hoyokʼgea. 26Ar abo do oka dipre coṅ bon ḍhaṅokʼa.”
Jahaj unumokʼkan
27Ale do Adriạ doreão cetante onkage calakʼtegele tahẽyena. Ar gelpon mãhã hilokʼ tala ńindạ okte jahaj calaoko doko onmankeda je, ghuṭu sorko hecʼakana mente. 28Onko do soṅkateko ńelkeda onḍe do irạlgel moka khạndri dakʼ tahẽkana. Arhõ thoṛa tayomko soṅkeda, onḍe do turui gel moka khạndri dakʼko ńamkeda. 29Ado dhirire bajaokʼ botorte jahaj reakʼ tayom secʼ khon ponea loṅgorko caḍokeda ar siń marsal lạgitʼ koejoṅko ehopʼena. 30Ar jahajren cakʼlaoko do jahaj khon dạṛ reakʼko kurumuṭuketʼte samaṅ secʼ khon loṅgor caḍoea mente jahaj reakʼ lạukạ do jalapurireko pheḍkeda. 31Unre Pạul do subedar ar palṭonkoe metatʼkoa, “Noko cakʼlaoko jahajre bako tahen khan rukhiyạ ohope ńamlea.” 32Khan palṭonko do lạukạ reakʼ barahikoko samakʼ topakʼketʼte dakʼreko aṛakʼgotʼkada.
33Ado ạuri marsalokʼre Pạul do sanamko thoṛa jom lạgitʼ nehõratʼkoteye metatʼkoa, “Teheń gelpon din hoyokʼkana, ar cetʼ hoyokʼa baṅ hoyokʼa ona reakʼ bhabnate upạsge menakʼpea ar cetʼge bape jom akada. 34Menkhan ńitokʼ do thoṛa jom reakʼ iń nehõrape kana. Ente bańcao tahen lạgitʼ jojom jạruṛtapea. Ente, apeakʼ bohokʼ reakʼ mitʼṭecʼ upʼ hõ baṅ nosṭokʼtapea.”
35Ado noa katha menkate Pạul do piṭhạ hataokate onko samaṅre Isore gun manao joharadea ar ona kecakʼkate jojome ehopʼena. 36Unre onko sanamko dilko ńamketʼ khan jojomko dhurạuena. 37Jahajre jotote ale do bar sae eaegel turui hoṛle tahẽkana. 38Ar sanamkoko jom biyen khan jahaj reakʼ hamal komao lạgitʼ joto guhum do doreãoreko giḍikada.
39Ado setakʼ bela ona jaega do bako ńel orom daṛeada, menkhan onko do mitʼṭecʼ huḍiń macha jalapuriko ńel ńamkeda one ona reakʼ aṛe do gitilte perecʼge tahẽkan. Unreko goṭakeda jahaj do ona aṛere idikateko ḍhaṅkakʼa. 40Onate onko do jahaj reakʼ loṅgorko samakʼ topakʼkate jalapurireko giḍikada ar hạl reakʼ tonol doko raṛakada. Inạ tayom hoe ńam lạgitʼ laha reakʼ badomko rakapʼkeda ar aṛe secʼ laha idiyente ona do gitilre ḍhaṅena. 41Ar jahaj reakʼ samaṅ secʼ gạḍiạu uricʼente teṅgo hapeyena ar ḍheoko reakʼ tạpiste jahaj reakʼ tayom secʼ rạpudokʼ ehopʼena.
42Unre palṭonko do kạidiko gocʼko reakʼko goṭakeda jemon onko modren okoe hõ paera oḍokokʼte aloko dạṛ daṛeakʼ. 43Menkhan subedar do Pạul bańcaoe lạgitʼ mon tahẽkantaete palṭonko akoakʼ kusi leka bae kạmi ocowatʼkoa. Uni doe hukumkeda okoe paerakʼko baḍae onko do pạhilre jahaj khonko don pheḍokʼte guṭuteko rakabokʼma, 44ar sarecʼko do jahaj reakʼ tokta se eṭakʼ jãhãnakʼ kaṭ kuṭrạ sapʼkateko paera rakabokʼma. Ar nonkate sanamko nirạite ghuṭuteko rakapʼena.
Currently Selected:
Aposkạmi 27: SBT
ማድመቅ
ያጋሩ
ኮፒ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Santali Bible © Bangladesh Bible Society, 2021.