Aposkạmi 28
28
Malṭa dipre
1Ado nirạite ghuṭutele rakapʼen khan ona do Malṭa dip kana mentele baḍaekeda. 2Ona dipren hoṛko do ale sãote ạḍi mońjko beoharkeda. Unreye dakʼetʼkan tahẽkana ar rabaṅkan tahẽkante onko do seṅgel jolkate sanamkoko hohowatʼlea. 3Pạul do mitʼ bojha rohoṛ jhuriko samṭaokate seṅgelreye khadleketʼ khan seṅgel reakʼ lolote mitʼṭen bisan biń do ona bojha khone oḍokena ar Pạulakʼ tireye gerbitʼena. 4Ado Pạulakʼ tire uni bińe ḍhilwạṅ akanko ńelkede khan ona dipren hoṛ doko menkeda, “Nui hoṛ doe khũniạhi kana ente jalapuri khone bańcaoenre hõ hokren bicạricʼ do jiwetʼ bae tahẽ ocowae kana.”
5Menkhan Pạul do uni biń seṅgelreye irci giḍikadea ar cetʼ hõ bae hạ̃nlena. 6Hoṛko doko hudisetʼ tahẽkana uniyakʼ hoṛmo do phulạkʼtaea se ackageye gocʼ bhindạṛokʼa nahakʼ. Menkhan ḍher ghạṛicʼre hõ unire cetʼge baṅ hoyokʼkanko ńelketʼ khan hudis ạcurenteko menkeda, “Uni doe deb kana.”
7Ona jaega sorre Publius ńutuman mitʼṭen napṛakʼ hoṛ do jumidari tahẽkantaea. Uni do acʼakʼ oṛakʼteye idiketʼlea ar pe din hạbicʼ ạḍi mońjteye peṛaketʼlea. 8Unre Publiusren apattetʼ do ruạ ar amasateye jaṛao akan tahẽkana. Pạul do bhitrite uni ṭhene boloyena are koe adea ar capokedeteye bogekedea. 9Ado noa ghoṭna tayom ona dipren sarecʼ sanam rugiko hõ hecʼkateko boge ocoyena. 10Onko do ạḍi lekateko manotketʼlea ar tayomte jahaj laṛao jokhecʼ aleakʼ jạruṛokʼakʼko bojha gotʼatʼlea.
Pạul do Romre
11Niạ pe cando tayom ale do mitʼṭecʼ jahajtele mohnḍayena. Ona jahaj do inạ diprege rabaṅ dine ṭalao akatʼ tahẽkana. Ona do Aleksandriạ nagraha reakʼ jahaj tahẽkana ar ona reakʼ bohokʼre jawa debakʼ muṭhạn tahẽkana. 12Ale do Surạkusre jahajle teṅgoketʼte onḍe pe dinle tahẽyena. 13Ar onḍe khonle monḍhayente Regiumrele seṭerena. Ar dosar hilokʼ dạkhin secʼ khone hoeyetʼ tahẽkante tesar hilokʼ do Puteolitele seṭerena. 14Onḍe do thoṛa biswạsi boehakole ńamketʼkoa. Onko do ako sãote mitʼ hapta tahen lạgitʼko nehõratʼlea. Nonkate ale do Romtele hecʼena. 15Onḍenko biswạsi boehako do aleakʼ hijukʼ reaṅko ańjom akatʼ tahẽkana. Ar horte ale sãote soṅgekʼ lạgitʼ onkoren adomko do Appius Haṭ, ar adomko do Pe Sạrại ato hạbicʼ ale daramko oḍok hecʼena. Khan noko hoṛko ńelte Pạul do Isore sarhaokedea ar acʼ hõ monre udgạue ńamkeda. 16Ar Romtele seṭeren khan Pạul do acʼ eskarge mitʼṭecʼ oṛakʼre tahen lạgitʼ hukume ńamkeda. Ar mitʼṭen palṭon do uniye pahrayede kan tahẽkana.
Romreye porcaretʼkan
17Pe din tayom Pạul do onḍenko Jihudiko mukhiyạko mitʼ ṭhene hoho jarwaketʼkoa. Adoko jarwayen khan Pạul do onkoe metatʼkoa, “E ińren boehako, iń do abo jạtrenko se hapṛamkoakʼ cạli upạrte cetʼge bạń ceka akada, enhõ Jerusalemre sapʼ ocokate Romikoakʼ tireń jimạ ocoakana. 18Arko kuli baṛakediń khan onko do aṛakʼkạńgeko menleda, ente gocʼ ocokʼ lek jãhãn cetʼ dosge bạń kạmiakada. 19#Apos 25.11 Menkhan Jihudikoko roṛ daramketʼ khan maharaj Kạisạr dohayae lạgitʼ jạruṛ hoyentińạ. Menkhan iń jạtren hoṛko jãhãnakʼ dusiko lạgitʼ do bạń hecʼakana. 20Onate iń do apeko sãote ńapamokʼ ar galmarao lạgitʼ iń khojkeda. Ar Israel jạtrenkoakʼ oka as menakʼ ona lạgitʼge iń do noa sikṛiteń tol ocoakana.”
21Unre Jihudi mukhiyạkoko metadea, “Jihudạ khon am reaṅ do jãhãn ciṭhige bale ńam akada. Ar boehako modren okoe hõ onḍe hecʼkate am reaṅ cetʼge bako baḍae ocoakatʼlea se jãhãn bạṛicʼ do bako roṛakada. 22Menkhan ale do amakʼ mon reakʼ kathakole ańjomtama, ente alele baḍaea joto jaegarege hoṛko do ona dol reakʼ upạrte kathako roṛeda.”
23Onko do Pạul são ńapamokʼ lạgitʼ mitʼṭecʼ dinko goṭakeda. Ar Pạul okareye tahẽkan onḍe do onko chaḍa arhõ aema hoṛko hecʼena. Unre Pạul do setakʼ khon ạyupʼ hạbicʼ Isorakʼ raj reaṅe galmaraoatʼkoa are bujhạuatʼkoa. Uni do Moseyakʼ ạn-ạri ar nạbikoakʼ puthi khon hõ Jisu reaṅe bujhạu akokan tahẽkana. 24Ar uni okakoe roṛketʼ onate adomko doko pạtiạuena ar adomko do bako pạtiạulena. 25Pạulakʼ kathate ako talare katha baṅ jurilente onko do onḍe khonko calaoena. Adoko calakʼ lahare Pạule menkeda, “Sonot Jiu do Jesaea nạbi hotete aperen hapṛamko ṭhen ṭhikgeye roṛlakʼa, 26#Jes 6.9,10 (LXX) Noko hoṛ do senkate metakom,
ańjom dope ańjomgea,
menkhan bape bujhạua,
ńeńel dope ńeńelgea
menkhan bape oroma.
27Noko hoṛakʼ ontor do goṛdho akana,
ar lutur hõ tepetʼakan takoa,
ar mẽtʼ doko jạpitʼ akada,
jemon mẽtʼte aloko ńeńel,
luturte aloko ańjom,
ar ontorte aloko bujhạu,
ar bogekʼ lạgitʼ iń ṭhen aloko ruạṛ hijukʼ.
28-29“Onate baḍae joṅpe, Isorakʼ noa bańcao do boṅgan hoṛ jạtrenko ṭhen kol akana; onkoge ańjom hõko ańjoma.” 30Ar Pạul do purạ bar bochor acʼakʼ bhaṛa oṛakʼreye tahẽkana ar acʼ ṭhen bolokʼ sanamkogeye ataṅetʼko tahẽkana. 31Uni do sohosate ar bin akoṭte Isorakʼ raj reakʼe porcaretʼ tahẽkana ar Probhu Jisu Mạsi reaṅe cetʼakokan tahẽkana.
Currently Selected:
Aposkạmi 28: SBT
ማድመቅ
ያጋሩ
ኮፒ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Santali Bible © Bangladesh Bible Society, 2021.