Johan 13
13
Celako jaṅgae ạbuketʼko
1Sen-parom porob thoṛa laha reakʼ ghoṭna. Jisu do noa dhạrti bạgikate Baba ṭhen calakʼ reakʼ okte seṭer akana menteye bujhạu daṛeatʼ tahẽkana. Ar dhạrtire okoeko acʼren hoṛko tahẽkan onkoe dulạṛetʼko tahẽkana ar mucạtʼ hạbicʼe dulạṛketʼkoa.
2Unre kedokʼ jokhecʼ Soetan do Simon hopon Jihudạ Iskariotakʼ monre bạirikoakʼ tire Jisu soprote lạgitʼ sanae rakapʼ ocoletʼtaea. 3Jisu doe baḍaekan tahẽkana, Isor Baba do acʼakʼ tire jotowakʼe jimạ akada. Ar noa hõe baḍaekan tahẽkana, acʼ do Isor ṭhen khone hecʼakana ar uni ṭhengeye ruạṛ calao lạgidokʼ kana. 4Onate kedokʼ khone beretʼena ar oyonakʼe dohokeda ar mitʼṭecʼ gamcha hataokate ḍanḍareye paṭheyena. 5Ona tayom gamlare dakʼe dulketʼte celako jaṅgae ạbuk ketʼkoa ar ḍanḍareye paṭhe akan tahẽkan gamchate do jojotʼe ehopʼena.
6Ado Simon Patras ṭhene hecʼen khan Patras do uniye metadea, “E Probhu Isor, am do cetʼ ińakʼ jaṅgam ạbuktińạ?”
7Jisui roṛ ruạṛadea, “Okań cekayetʼkan ona do ńitokʼ bam baḍaeyeda menkhan tayomtem bujhạua.”
8Patras do uniye metadea, “Ińakʼ jaṅga do tis hõ bam ạbuk ńama.”
Jisu do Patrase metadea, “Bạń ạbukletam khan iń tulucʼ amakʼ bakhra do bạnukʼ tama.”
9Unre Simon Patrase menkeda, “E Probhu Isor, enḍekhan eken jaṅga moto do alo, ińakʼ ti ar bohokʼ hõ ạbuk tińme.”
10Jisu do uniye metadea, “Um akanicʼ do jaṅga chaḍa ar cetʼge ạbukokʼ reakʼ jạruṛ bạnukʼtaea, ente uni do jotoge saphagetaea. 11Ape dope saphagea, menkhan sanamko do baṅ.” Okoe acʼe soprote uni doe baḍae akade tahẽkana. Onate uni doe menkeda, “Ape joto do bape saphawa.”
12 #
Luk 22.27
Ado joto hoṛe ạbuk sạtketʼko khan Jisu do acʼakʼ oyonakʼ hataokate arhõ duṛupʼenteye metatʼkoa, “Iń cetʼ iń cekaketʼ ona dope bujhạuletʼgea? 13Ape do Guru ar Probhu mentepe hohowạńkana, ar ona do ṭhikgepe meneda, ente uni kangeạń. 14Menkhan iń do Probhu ar Guru hũyạte hõ cetʼ lekań ạbukketʼpe onkage ape hõ eṭakʼkoakʼ jaṅga ạbuk lek tapea. 15Iń do noań udukʼ atʼpea jemon apere cetʼlekań cekaketʼ ape hõpe onkae. 16#Mat 10.24; Luk 6.40; Jhn 15.20 Sạrigeń metapekana, guti do acʼren kisạ̃ṛ khon bae maraṅa. Ar kol ocoyicʼ hõ kokolicʼ khon bae maraṅa. 17Noako baḍaekate onako lekape kạmile khan enḍekhan ape dope bhạgangea.
18 #
Ser 41.9
Ape sanamkoakʼ katha do bạń meneda. Iń okoeyiń bachao akatʼko onko doń baḍae akatʼkogea. Menkhan sonot sostor reakʼ noa katha do purạukʼtege hoyokʼa, ‘okoe iń tulucʼ piṭhại jojomkan unige iń upạrte jaṅgae tulketʼtaea.’ 19Iń do noa hoyokʼ laharegeń lạiyape kana, jemon hoylenrepe pạtiạukʼ baṅma, iń kangeạń. 20#Mat 10.40; Mrk 9.37; Luk 9.48; 10.16 Sạrigeń metapekana, iń okoeyin kole, ar uni okoeye ataṅe, uni do ińgeye ataṅedińạ ar iń okoeye ataṅiń uni do kol akadińicʼgeye ataṅedekana.”
Jisu do acʼakʼ soprotokʼ reakʼe lại lahayetʼ
(Mathae 26.20-25; Mark 14.17-21; Luk 22.21-23)
21Ado noako katha menkate Jisu do jiwireye khad badaoena. Uni do pusṭạuteye menkeda, “Sạrigeń metapekana, ape modren mitʼ hoṛ bạirikoakʼ tireye soprotińạ.”
22Jisu okoeyakʼ kathae meneda ona bako bujhạu daṛeatʼte celako do ako akoreko beṅgetʼ baṛawana. 23Onko modren Jisu okoeye dulạṛede tahẽkan uni do Jisuakʼ koṛam pheḍreye ṭenḍar akan tahẽkana. 24Simon Patras do uni isạrawadeteye metadea, “Kuliyeme uni do okoe reaṅe roṛeda.”
25Unre uni cela do Jisure ṭenḍarenteye menkeda, “E Probhu Isor, uni doe okoe kana?”
26Jisui roṛ ruạṛkeda, “Noa piṭhạ kecakʼ bạṭire topokate okoeyiń emae unikangeae uni hoṛ do.” Ado piṭhạ kecakʼ bạṭire topokate Simon Iskariotren hopon Jihudại emadea.
27Piṭhạ kecakʼe ńamketʼ khan Soetan do Jihudạreye boloyena.
Jisu do uniye metadea, “Okaṭakʼ cekayem menetʼkan ma usạraeme.”
28Jisu sãote okoeko jojomkan tahẽkan onko do bako bujhạuleda cedakʼ Jisu do Jihudạ noa kathae metadea. 29Adomko doko bujhạukeda, porobre lạgitʼ jạruṛokʼakʼko kiriń ạgui se reṅgecʼ orecʼko jãhãnakʼ emako lạgitʼ Jisu do Jihudại metadea, ente ṭaka reakʼ baksa do Jihudạ ṭhenge tahẽkana. 30Ado piṭhạ kecakʼe hataoketʼ torage Jihudạ do bahreteye oḍok calaoena. Unre do ńindạ tahẽkana.
Nãwã hukum
31Ado Jihudạ bahreteye calaoen khan Jisui menkeda, “Manwa Hoponakʼ ṭhonokokʼ reakʼ okte do seṭerena ar unire Isorakʼ ṭhonok do sodorokʼa. 32Isorakʼ ṭhonok tinre unire sodorokʼa unre Isor hõ Manwa Hoponakʼ ṭhonok acʼreye sodora ar usạrageye ṭhonok ocoyea.
33 #
Jhn 7.34
“E bachako, iń do ape tulucʼ ar thoṛa ghạṛicʼ minạńa. Ape do ińpe ńam baṛańạ, menkhan Jihudi mukhiyạko cetʼlekań metatʼko tahẽkan, ‘okateń calakʼkan onḍe do ohope sen daṛelena,’ onkage ape hõ ńitiń metapekana. 34#Jhn 15.12,17; 1 Jhn 3.23; 2 Jhn 5 Mitʼṭecʼ nãwã hukumiń emape kana dupulạṛpe. Cetʼleka iń do apeń dulạṛ akatʼpe onkage ape hõ dupulạṛpe. 35Nonkage ape apere dulạṛ tahen khan sanamkoko bujhạu daṛeakʼa ape do ińren celako kanape mente.”
Jisu do Patrasakʼ ńurokʼ reakʼe lại lahayetʼ
(Mathae 26.31-35; Mark 14.27-31; Luk 22.31-34)
36Simon Patras do Jisui metadea, “E Probhu Isor am do okatem calakʼ kana?”
Jisui roṛ ruạṛkeda, “Iń okateń calakʼkan, onḍe do ńitokʼ iń sãote ohope sen daṛelena, menkhan tayomtepe hijukʼa.”
37Patras do uniye metadea, “E Probhu Isor, cedakʼ ńitokʼ do am sãote bạń calao daṛeakʼa? Am lạgitʼ ińakʼ jiwi hõń emokʼa.”
38Unre Jisui menkeda, “Iń lạgitʼ cetʼ jiwim alaetama? Sạrigeń metam kana, sim sạnḍi ạuriye ragre am do pe dhaoem baṅeńa.
Currently Selected:
Johan 13: SBT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Santali Bible © Bangladesh Bible Society, 2021.