Johan 14
14
Jisu kangeae hortetʼ
1“Apeakʼ mon do alo khad badaokʼtape ma. Isorre pạtiạukʼpe ar ińre hõ pạtiạu akae tahenpe. 2Ińren Babawakʼ oṛakʼre ạḍi utạr tahen jaega menakʼa. Ona baṅ tahẽlen khaniń lạikepea, ape lạgitʼ jaega teariń calakʼ kana. 3Ar senkate ape lạgitʼ jaegań benaole khan arhõń ruạṛ hijukʼa ar iń ṭheniń ataṅ idipea, jemon iń okareń tahen ape hõ onḍepe tahen. 4Ar iń okateń calakʼkan ona reakʼ hor mape baḍaege.”
5Thoma do Jisui metadea, “E Probhu Isor, bale baḍaea okatem calakʼkana, ente cekate hor dole baḍaea?”
6Jisu do Thomae metadea, “Ińge hortetʼ, sạriyakʼtetʼ ar jion do. Iń hotete baṅkhan okoe hõ Baba ṭhen do ohoko calao daṛelena. 7Ińpe baḍaeliń khan honaṅ ińren Baba hõpe baḍaekea. Ape do ńitokʼ unipe baḍae akadea ar ńel hõpe ńelakadea.”
8Philip do Jisui metadea, “E Probhu Isor, Baba baṛe udukʼaleme, inạge ale lạgitʼ ḍhera.”
9Jisu do uniye metadea, “E Philip, nunạkʼ din ape tulucʼ minạńa, enrehõ cetʼ bape baḍae akadińạ? Okoe ińe ńelakadiń uni do Baba hõe ńelakadea. Am do cekatem meneda, ‘Baba baṛe udukʼaleme?’ 10Am do cetʼ bam pạtiạukʼ kana, iń do Babare minạńa ar Baba do ińre menaea mente? Iń okako kathań lại apekan ona do apnar khonakʼ do bạń roṛeda, menkhan ińre menae Babageye kạmikana. 11Ińakʼ kathare pạtiạukʼpe je, iń do Babare ar Baba do ińre menaea mente. Ar baṅkhan ińakʼ noako kạmi iạte pạtiạuạńpe.
12“Sạrigeń metapekana, okoe ińreye pạtiạukʼkan uni do iń okakoń kạmikan uni hõ onakoe kạmiya. Ar Baba ṭheniń calakʼkante uni do noako khon arhõ maraṅ maraṅakʼkoe kạmiya. 13Jãhãnakʼge iń ńutumtepe koe iń do onań onkaea, jemon Babawakʼ ṭhonok Hopon hotete sodorokʼtae. 14Iń ńutumte jãhãnakʼgepe koe enḍekhan onań onkaea.
Sonot Jiu kole reaṅ gokʼakʼ
15“Ińpe dulạṛediń khan ińakʼ sanam hukumkope dohoya. 16Iń do Baba ṭheniń koeapea, ar uni do jaejug hạbicʼ mitʼṭen sohotʼicʼe kolapea. 17Uni sohotʼicʼ kangeae sạriyakʼren Jiu do. Dhạrtiren hoṛko uni do ohoko ataṅ daṛelea, ente onko do ńelhõ bako ńelekana ar baḍae hõ bako baḍae akadea. Menkhan ape dope baḍae akadea, ente uni do ape são sãoteye tahẽkana ar apeakʼ ontorreye girobasokʼa.
18“Bạń ṭũạr oṭokapea; iń do ape ṭheniń hijukʼa. 19Ar thoṛa ghạṛicʼ khange dhạrtiren hoṛko do ar bako ńel ńameńa, menkhan ape dope ńeleńgea. Iń do jiwetʼge minạńte ape hõ jiwetʼpe tahena. 20Enhilokʼgepe baḍae daṛeakʼa, iń do Babare, ape do ińre ar iń do apere minạńa mente. 21Okoe ińakʼ hukumkoe baḍaekan ar onakoe manaoetʼkan unige iń doe dulạṛedeńa.” Ar okoe ińe dulạṛedeń ińren Baba hõ uniye dulạṛea. Iń hõ uniń dulạṛea ar uni ṭheniń sodorokʼa.
22Unre Jihudạ do (Iskariot do baṅ) uniye metadea, “E Probhu Isor, am do cetʼ eken ale ṭhengem sodorokʼa, ar dhạrtiren hoṛko ṭhen do baṅ?”
23Jisu do uniye roṛ ruạṛadea, “Jãhãege ińe dulạṛiń uni do ińakʼ kathae dohoya. Ińren Baba do uniye dulạṛea ar uni ṭhen liń hijukʼte uni soṅgeteliń tahena. 24Okoe bae dulạṛiń uni do ińakʼ katha leka ohoe calaolena. Okaṭakʼ kathape ańjometʼkan ona do ińakʼ katha do baṅkana menkhan okoe ińe kol akadiń uni Babawakʼ katha kangea. 25Ape sãoteń tahenrege noako kathań galmarao akawatʼpea 26Uni sohotʼicʼ sonot Jiu one okoe do Baba iń ńutumteye kolape, unige sanamakʼkoe cetʼapea, ar okakoń lại akatʼpe onako joto doe disạ ocopea.
27“Iń do ape lạgitʼ suluk iń doho oṭokakʼ kana, ińakʼ sulukge apeń emape kana; dhạrti cetʼ lekae emokʼkan onka do bạń emokʼ kana. Apeakʼ ontor do alo khad badaokʼtapema ar monre botor hõ alo tahentape ma. 28Ańjom akadape ińiń menakatʼpea, ‘iń doń calakʼkana ar ape ṭhen arhõń ruạṛ hijukʼa.’ Ape do ińpe dulạṛliń khan Baba ṭheniń calakʼkan iạtepe rạskạkokʼa, ente Baba do iń khon hõe maraṅgea. 29Noako hoyokʼ laharege iń doń lại dohoakatʼpea jemon hoylenrepe pạtiạukʼ. 30Iń do ape tulucʼ ar ḍher ghạṛicʼ do bạń galmaraoa, ente noa dhạrtiren raje hijukʼkana. Ińre uniyakʼ jãhãn ektiạri do bạnukʼtaea. 31Menkhan noa do hoyokʼ kana jemon hoṛkoko baḍae daṛeakʼ je, iń do Babań dulạṛede kana ar Baba cetʼ lekae hukum akadiń onkage jotowakʼ iń kạmikana. Ma beredokʼpe, dela nonḍe khon bon calakʼa.
Currently Selected:
Johan 14: SBT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Santali Bible © Bangladesh Bible Society, 2021.