Mark 8
8
Pon hajar hoṛe jom bi ocoyetʼko
(Mathae 15.32—16.4)
1Mitʼ din arhõ ạḍi utạr hoṛko jarwayena. Ar onko hoṛ ṭhen jãhãn jomakʼ baṅ tahẽkante Jisu do acʼren celako hohowatʼkoteye metatʼkoa, 2“Noko hoṛkoreń mãyãkʼ kana, ente teheń pe din hoyokʼ kana iń sãote menakʼkoa; onko ṭhen do jãhãn jomakʼge bạnukʼa. 3Ar niạ halotre oṛakʼiń kolkako khan onko do horkoreko lorao botejokʼa, ente onko modren ḍherkoge ạḍi sạṅgiń khonko hecʼakana.”
4Celakoko metadea, “Menkhan noa nisun jaegare noko jom ocoko lạgitʼ piṭhạ do okarele ńama?”
5Jisui kuliketʼkoa, “Tinạkʼ piṭhạ menakʼtapea?”
Metadeako, “Eae goṭecʼ.”
6Uni do gadel hoṛko otre duṛubokʼe hukumatʼkoa. Ar ona eae goṭecʼ piṭhạ hataokate Isore gun manao joharadeteye kecakʼkeda ar hoṛko emako lạgitʼ celakoakʼ tireye calatʼkoa, ar celako do gadel hoṛkoko ematʼkoa. 7Celako ṭhen thoṛa thuṛi kạṭicʼ hako hõko tahẽkana. Jisu do hako hõe bhoratʼkote gadel hoṛko emako lạgitʼe metatʼkoa. 8Adoko jomkeda arko biyena. Ar okako kecakʼ kaṭra kuṭrạ ńur tahẽyen celako do onakoko halaṅ jarwaketʼ khan eae phạtiạkʼko perecʼkeda. 9Onḍe do pon hajar gan herel hoponko tahẽkana. 10Ona tayom gadel hoṛe bidạkatʼkote uni do celako sãote mitʼṭecʼ lạukạre decʼkate Dalmanuthạ elakateye calaoena.
Phạrusiko cinhạ ńeńelko khojkan
(Mathae 16.1-4)
11 #
Mat 12.38; Luk 11.16 Ado onḍe Phạrusikoko oḍok hecʼen khan Jisu sãote reṭe peṭekʼko ehopʼena, ar biḍạue lạgitʼ serma khon mitʼṭecʼ cinhạko khojkeda. 12#Mat 12.39; Luk 11.29 Noa iạte Jisu do kũhrạuateye menkeda, “Niạ piṛhiren hoṛko do cinhạ reakʼ cedakʼko khojkana? Ińiń metapekana, cetʼ cinhạge onko do baṅ udukʼakoa.”
13Ona tayom uni do onkoe bạgiyatʼkote arhõ lạukạreye decʼena ar doreão hanasae parom calaoena.
Celakoe sontoretʼko
(Mathae 16.5-12)
14Celako soṅgete piṭhạ iditora hiṛiń akatʼ tahẽkana. Onko do lạukạre eken mitʼṭecʼ piṭhạge tahẽkantakoa. 15#Luk 12.1 Unre Jisui metatʼkoa, “Phạrusiko ar Herodrenkoakʼ khạmi khon sontor akae tahenpe.”
16Onate celako do ako akoreko menjoṅana, “Piṭhạ bạnukʼ tabonte noae metabon kana.”
17Ado celakoko galmaraokan reaṅe baḍaeketʼtako khan Jisui metatʼkoa, “Cedakʼpe meneda piṭhạ bạnukʼtapea? Ape do cetʼ ńit hõ bape baḍaekana se bape bujhạueda? Apeakʼ ontor do cetʼ goṛdho akantapea? 18#Jir 5.21; Jeh 12.2; Mrk 4.12 Mẽtʼ menakʼ tulucʼ cetʼ bape ńeńelkana? Lutur tahen tulucʼ cetʼ bape ańjomeda? Disạ hõ cetʼ bape disạyeda, 19mõṛẽ hajar hoṛko lạgitʼ mõṛẽ goṭecʼ piṭhạń kecakʼletʼre ape do tinạkʼ phạtiạkʼpe halaṅ jarwaleda?”
Celakoko roṛ ruạṛadea, “Gelbar phạtiạkʼ.”
20Jisu do arhõe metatʼkoa, “Pon hajar hoṛko lạgitʼ eae goṭecʼ piṭhạń kecakʼletʼre tinạkʼ phạtiạkʼpe halaṅ jarwaleda?”
Adoko lạiadea, “Eae phạtiạkʼ.”
21Unreye metatʼkoa, “Enḍekhan ńitokʼ hõ cetʼ bape bujhạueda?”
Mitʼṭen kãṛã hoṛe bogeyen
22Jisu ar acʼren celako do Bethsaeda atoteko calaoena. Ar onḍe do mitʼṭen kãṛã hoṛ Jisu ṭhenko ạgukedea ar joṭedea menteko nehõradea. 23Jisu do uni kãṛã hoṛ tire sapʼkate ato bahreteye oḍok idikedea. Ar ona tayom mẽtʼreye thoadea ar capokedeteye kulikedea, “Jãhãnakʼem ńel ńameda?”
24Uni hoṛ do beṅgetʼ rakapʼkateye menkeda, “Iń do hoṛkoń ńel ńametʼkoa; onko do ńelokʼte dare leka, arko taṛam baṛayeda.”
25Jisu do arhõ uni hoṛakʼ mẽtʼe joṭetʼketʼtaea. Onate uni hoṛakʼ mẽtʼ do jhicʼentaea ar ńeńel daṛeye ńamkeda. Ar pusṭạute jotowakʼ ńeńele ehopʼena. 26Ar noa menkateye kolkadea, “Bethsaeda atote do bolo hõ alom bolokʼa.”
Probhu Jisu kangeae Mạsi do
(Mathae 16.13-20; Luk 9.18-21)
27Ona tayom Jisu ar acʼren celako do Kạisạriạ Philipi reakʼ atoteko oḍok calaoena. Uni do calakʼ jokhecʼ celakoe kuliketʼkoa, “Hoṛko do okoe kạnạń menteko meneda?”
28 #
Mrk 6.14,15; Luk 9.7,8 Celakoko metadea, “Adomko doko meneda Johan bạbạptisicʼ kanam; ar adomko doko meneda Eliạ kanam arhõ adomko doko meneda nạbiko modren mitʼ hoṛ kanam.
29 #
Jhn 6.68,69 Unre Jisui kuliketʼkoa, “Menkhan ape do okoe kạnạń mentepe meneda?”
Patrase roṛ ruạradea, “Am do uni Mạsi kanam.”
30Unre Jisu do onkoe sontorkatʼkoa jemon acʼ reaṅ okoe ṭhen hõ aloko lại baṛae.
Acʼakʼ gujukʼ reaṅe lại lahayetʼ
(Mathae 16.21-28; Luk 9.22-27)
31Jisu do acʼren celako noa menkate cetʼakoe ehopʼena, Manwa Hopon do ạḍi okocʼ duk jojom hoyokʼtaea. Uni do murubbiko, maraṅ naekeko ar sostor baḍaekoko nihạ̃tea. Are gocʼ ocokʼa, ar pe mãhã hilokʼre uni do arhõ gocʼko khon jiwetʼ beredokʼ hoyokʼtaea. 32Uni do pusṭạute noako kathae lạiyatʼkoa. Unre Patras do Jisu mitʼ secʼe begar idikedete nisṛạueye ehopʼkeda. 33Jisu do ạcurente celako secʼe beṅgetʼkeda ar Patras dhomkaokedeteye metadea, “Eya Soetan, iń samaṅ khon pharakokʼme. Ente Isor reakʼakʼko do bam moneyakʼ kana, menkhan manwa reakʼakʼkogem moneyakʼ kana.”
34 #
Mat 10.38; Luk 14.27 Noa tayom celako ar gadel hoṛko acʼ ṭhen hoho sorkateye metatʼkoa, “Jãhãege ińakʼ horte hijukʼe menetʼ khan uni do acʼakʼ sana leka aloe calakʼma; bickom acʼakʼ kurus gokʼkateye pańjayiń ma. 35#Mat 10.39; Luk 17.33; Jhn 12.25 Okoe acʼ lạgitʼ jiwetʼ tahene menjoṅkan uni do jiwiye khuạutaea; menkhan okoe iń ar Isorakʼ bhage sombat iạte acʼakʼ jiwiye khuạutae, uni do onae rukhiyạitaea. 36Jãhãege goṭa dhạrtiye labte acʼakʼ jiwiye khuạutae enḍekhan cetʼ porho hoyokʼtaea? 37Ente jiwi ńam ruạṛ lạgitʼ uniyakʼ do emokʼteakʼ ar cetʼ menakʼtaea? 38Niạ piṛhiren bepạtiạr ar kại hoṛko talare iń ar ińakʼ kathako iạte jãhãegeye lajaokʼ, enḍekhan Manwa Hopon hõ sonot goḍetko soṅgekate acʼren Apatakʼ ṭhonokanteye hijukʼre uni hoṛ iạteye lajaokʼa.”
Santali Bible © Bangladesh Bible Society, 2021.