Mark 7
7
Calao hijukʼkan ạn reaṅ
(Mathae 15.1-20)
1Ado okoeko Jerusalem khonko hecʼakan tahẽkan onko modren adom Phạrusi ar sostor baḍaeko do Jisu ṭhenko hecʼ jarwayena. 2Onkoko ńelkeda, Jisuren celako modren adomko do ti begor ạbukte bhonḍ hoṛko leka jojomko duṛupʼakana.
3Phạrusiko ar Jihudiko do sedaeren dhorom guruko okaṭakʼ niạmko emakan ona reakʼ niạm lekate ti begor ạbukte jãhãnakʼge bako jometʼ tahẽkana. 4Ar hạṭiạ bajar khon hecʼkate hõ begor umte cetʼge bako jometʼ tahẽkana. Ona chaḍa onko do arhõ aema lekan ạri-cạliko pańjayetʼ tahẽkana, jemon loṭa, bạṭi, thạri gasao mańjao ar emanteakʼko.
5Onate Phạrusiko ar sostor baḍaeko do Jisuko kulikedea, “Hapṛamko khon hecʼạgu akan ạri-cạli do amren celako cedakʼ bako manaoeda? Onko do begor ti ạbukte cedakʼko jom ńũiyeda.”
6 #
Jes 29.13 (LXX) Jisui roṛ ruạṛatʼkoa, “Ape dope phạsiạrako kana! Jesaea nạbi do ṭhikge ape reaṅe nạbi akada. Uniyakʼ puthire ol akana:
noko hoṛ do mocategeko ganaoedińa,
menkhan onkoakʼ ontor do iń khon sạṅgińgetakoa.
7Onko do ạuṛiyakʼgeko sewawạń kana,
ar manwakoakʼ hukumkoge dhorom reakʼ sikhnạt menteko cetʼako kana.
8Ape do Isor emakʼ hukumko bạgikate, manwa benaoakʼ ạri-cạlikope pańjayeda.”
9Arhõe metatʼkoa, “Isorakʼ hukumko bạgikate manwakoakʼ cạliko pańja do bhagegepe baḍaekana. 10#Exo 20.12; Bib 5.16; Exo 21.17; Lev 20.9 Moseye menakada, ‘eṅgam ạpum ganaokinme,’ ar eṅgat se apat bạṛicʼ memenicʼ do gocʼte hõ goje hoyokʼa. 11Menkhan apepe meneda, jãhãege eṅgat se apattetʼe metae iń hotete okaṭakʼem porhokokʼ ona do ‘Korban,’ metakʼme Isor ṭhen samaṅ akana. 12Enḍekhan uni do eṅgat ar apat lạgitʼ cetʼge bape ceka ocowae kana. 13Nonkate hecʼ ạgu akan ạri-cạlikope cetʼako kante Isorakʼ kathape ạuṛiyakʼeda. Ona chaḍa noa lekanakʼ arhõ ạḍi utạrakʼkope kạmiyeda.”
Okaṭakʼte manwa bae bhonḍokʼ
(Mathae 15.10-20)
14Noa tayom Jisu do hoṛko arhõ acʼ ṭhen hoho sorkateye metatʼkoa, “Jotoko ińakʼ katha ańjompe ar bujhạupe. 15Bahre khon manwa bhitrite okaṭakʼ bolokʼkan onate manwa do ohoe bhonḍlena, bickom manwa bhitri khon okaṭakʼ oḍokokʼ kan, onatege manwa doe bhonḍokʼa. 16Lutur menakʼtae hoṛ doe ańjomma.
17Inạ tayom gadel hoṛko bạgikate oṛakʼe boloyen khan celako do ona katha reakʼ bhedtetʼko kulikedea. 18Jisui metatʼkoa, “Cekate nunạkʼ dope bebujgea? Ape do cetʼ bape bujhạueda, bahre khon okaṭakʼ manwa bhitrite bolokʼkan onate manwa do bae bhonḍ daṛeaea. 19Ente uniyakʼ ontorre ona do baṅ bolokʼ kana menkhan lacʼre bolokʼkana, ar tayomte ona do hoṛmo khon oḍok giḍikʼa.” Ona kathate uni do joto jomakʼge saphagea menteye bujhạu ocoyeda.
20Jisu do arhõe metatʼkoa, “Manwa bhitri khon okaṭakʼ oḍok hijukʼkan onatege manwa doe bhonḍ ocokʼ kana, 21ente manwa bhitri khon, metakʼme ontor khonge joto lekan bạṛicʼ hudis, laṭghaṭ, kombṛo, khũn, 22laloc, dusṭạmi, eṛe, umtạ umti, mẽtʼ jolokʼ, opoman, bạḍại ar bebujko oḍok hijukʼa. 23Noako sanam bạṛicʼakʼ do manwa bhitri khonge oḍokʼ hijukʼ kana ar noatege manwa doe bhonḍokʼa.”
Boṅgan hoṛ jạtren maejiuakʼ pạtiạu
(Mathae 15.21-28)
24Inạ tayom Jisu do ona jaega bạgikate Tur ar Sidon elakateye calaoena. Uni do mitʼṭecʼ oṛakʼteye boloyena ar okoe hõ aloko baḍaeyea menteye menwana, menkhan bae oko tahẽ daṛeada. 25Onḍe mitʼṭen maejiue tahẽkana ar uniren kuṛi do bạṛicʼ jiue capaṛ akawade tahẽkana. Ado Jisu reaṅe ańjomketʼ khan hecʼkate uniyakʼ jaṅgareye giḍiyena. 26Uni do Junạni maejiue tahẽkana ar Surophoenikireye janamlena. Uni do Jisui nehõradea jemon acʼren kuṛi khon bạṛicʼ jiue oḍok giḍikae.
27Jisu do uniye metadea, “Gidrạkoge lacʼ bikʼ jom maṛaṅ ocowakome, ente gidrạkoakʼ jomakʼ hataokate setako samaṅre giḍikakʼ do baṅ bhagea.”
28Maejiue roṛ ruạṛkeda, “E Probhu, am do ṭhikgem men akada, menkhan gidrạkoakʼ jomakʼ reakʼ ganḍa gunḍạ oka do mej latarre ńurokʼkan setako do onakogeko jomeda.”
29Jisui menkeda, “Katha do bhagegem menakada, Do calakʼme; ar ńelme, bạṛicʼ jiu do hoponeram khone oḍok calao akana.”
30Ado oṛakʼe ruạṛen khan, acʼren kuṛi aṭetʼreye giticʼ akan ar bạṛicʼ jiu uni khon oḍok akane ńamkedea.
Kala ar Gungạ hoṛe bogeyen
31Noa tayom Jisu do Tur elakae bạgi oṭowatʼte Sidon nagraha talate Gạlil doreão sor Dekapoli elaka reakʼ atokoteye calaoena. 32Onḍe do mitʼṭen kala ar guṅgạ hoṛ Jisu ṭhenko ạgukedea ar capoye lạgitʼko nehõraedea.
33Jisu do bhiṛ tala khon mitʼ aṛeteye idikedete uniyakʼ banar luturre acʼakʼ kạṭupʼe gutukeda; ar thokate uni hoṛakʼ alaṅe joṭetʼketʼtaea. 34Ona tayom serma secʼ beṅgetʼ rakapʼkate kũhrạuateye menkeda, “Ephata” mane do “Jhijokʼme.”
35Ar inạtege uniyakʼ lutur do jhicʼentaea, ar alaṅ reakʼ gitạtʼ hõ chaḍaoente pusṭạute katha roroṛe ehopʼena. 36Unre Jisu do noa reaṅ hoṛko lại baṛaeye manakatʼkoa. Menkhan tinạkʼe manaketʼko, unạkʼge onko do ona reaṅ artetʼ lại baṛaeko ehopʼena. 37Onate hoṛko do hahaṛayenteko menkeda, “Jotowakʼ tinạkʼ bhageye kạmiyeda. Uni do kalakoe ańjom ocoyetʼkoa ar guṅgạko hõ katha roṛ reakʼ daṛeye emako kana.”
Santali Bible © Bangladesh Bible Society, 2021.