UPUTUKILO 10
10
1Yisemuko ya ana ja Noe a malunga yino; Sheme ni Hame ni Yafwe. O asemene ana kulutwe lia sanga lia meya.
2Ana ja Yafwe a malunga wano, Ngome, ni Mangoke, ni Matai, ni Yavwane, ni Tupale, ni Mesheke, ni Tita. 3Ana ja Ngome a malunga wano, Akanase, ni Ripate, ni Tokama. 4Ni ana ja Yavwane a malunga wano, Elisha, ni Tashi, ni Kitime, ni Ndotane. 5Alitechelele mbaka ja mavungu hakachi ka wano mu yifuchi yo nikulita ni malimi jo ni minyachi yo ni mavungu jo.
6Ni ana ja Hame a malunga wano, Kushe, ni Mizerane, ni Pute, ni Kanana. 7Ana ja Kushe a malunga wano, Sepa, ni Havila, ni Satahe, ni Raema, ni Seteka. Ni ana ja Raema a malunga wano, Shipa ni Ndetane. 8Kushe yasema Nimorote. Iye waputukile kupwa mukwa ndundo hashi. 9Iye te chinyanga munene kumeso ja Yehova, kashika akwamba ngwo, Ngwe Nimorote chinyanga munene kumeso ja Yehova. 10Uputukilo wa wanangana wenyi Mbapele, ni Ereke, ni Akate, ni Kalenehe mu chifuchi cha Shinare. 11Yakatukako, yaya ku chifuchi cha Asuria. Yatunga Ninive, ni Rehombote-Ire, ni Kala. 12Ni Resene hakachi ka Ninive ni Kala (lie limbo linene). 13Mizerane yasema Lutime, ni Anamini, ni Lehapi, ni Naputuhi. 14Ni Perushimi, ni Kaluhime, (kwenako kwakatukile A-Filistea) ni Kafetore.
15Kanana yasema kapula-jimo Sendone, ni Hete, 16ni A-Yepushe, ni A-Amore, ni A-Ngikashe, 17ni A-Hevwe, ni A-Aki, ni A-Sini, 18ni A-Arvada, ni A-Zemare, ni A-Hamate. Kulutwe lia chize minyachi ya A-Kanana yalitanda. 19Njiza ya A-Kanana yachiza ku Sendone mu jila ya kutalikisa ku Ngerare, ndo ku Ngeza, mu jila ya kutalikisa ku Sondome ni Ngomora, ni Andama ni Zepoime ndo ku Lasha. 20Wano e ana ja Hame a malunga, nikulita ni minyachi, ni malimi, mu yifuchi yo, ni mavungu jo.
21Kuli Sheme kalamba ka ana eswe a Epere iye te yayo ya Yafwe, kuli iye nawa kwasemukine ana. 22Ana ja Sheme a malunga wano, Elame, ni Ashure, ni Apakasha, ni Lutu, ni Arame. 23Ana ja Arame a malunga wano, Uze, ni Hule, ni Ngete, ni Mashe. 24Apakasha yasema Shela. Shela yasema Epere. 25Kuli Epere kwasemukine ana aali a malunga. Jina lia umwe Pelege mumu ha matangwa jenyi alitechelele hashi. Jina lia mwanakwo Yokatane. 26Yokatane yasema Alamote, ni Shelepe, ni Hazamavwe, ni Jera, 27ni Handorame, ni Uzale, ni Ndikala, 28ni Opale, ni Apemaele, ni Shipa, 29ni Ofiri, ni Havila, ni Jobaba. Wano eswe te ana ja Yokatane a malunga. 30Chifuchi cho chapwile chize ku Mesha muze mutalikisa ku Sefa, chifuchi cha milundu ku Chivumbuko. 31Wano e ana ja Sheme a malunga nikulita ni minyachi yo, ni malimi jo, mu yifuchi yo nikulita ni mavungu jo.
32Wano e ana ja Noe a malunga nikulita ni yisemuko yo mu mavungu jo. Wano yalipulapula mavungu hashi kulutwe lia sanga lia meya.
Currently Selected:
UPUTUKILO 10: Csa
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Chokwe Bible © Bible Society in Angola, 1975.