LUK 17
17
Pap Alamthe Kapaklang
(Mot. 18:6-9; Mrk. 9:42-48)
1Jisu anang adun hel yok pulo, “Aduk kipi pap honjat hel wang penne, manta ingho parasi mehel wang, anang kaphere meme do! 2Labang arleng akibek hel asitem ihutyok pap kapatiki yok ke, anang angphun long isi aghai phukuli arlong hom dungsi langpe long kiti plupsi anang phanke kime.” 3Nang bithang meso chilang! Kamprek adunpo pap tiki, tene nang ado katiki poyok ingjenot, aro anang neng chipharlep, tene anang pap ronpinot. 4Aro labang matmat arlengpo nanglang setsetsi anang inirsi long phong thorok-isi yok pap inghol jong, aro phong thorok-isi yokta nangdung chipharlepsi wang, aro puye, “Neneng chipharlep mo,” pu tene anangyok ronpinot.”
Kikrol Alam
5Kangthir adun hel Hemphu yok pulo, “Hali kikrolpo pa-ongchot!” 6Hemphu pulo, “Nali jamu amuso ateng kikrol do, tene nang chingphur plangne, langpe long chi-eh dam pune labang Liskuri arongpe yok than un, “Abithang chiphur plang aro langpe long chi-eh dam,” aro bangpo kithan nalimeng dune.
Murkiya Ihut Katiki Asal
7“Nali sitem ladi ihut ingho do, lake anang turupo chorong panongsi, lale bik honsi bithar para wango tene, “Nang minon wangot, kicho ayok iningot, anangyok labadi than une ma? 8La-aholan ke, “Ne phan an honjok pinot, aro ne chotangte lengke, amicheng pe chi-kokne, neyok al en not aro la aphel nang chojun pusi thantheye ma? 9Labang murkiya po kapatiki badi katiki apot ahemphu anangyok jinsose ye ma? 10Ladisi, nali ta, konam potsi kapatiki yok kithan, labang ahuwit tiki tangsi, punot, “Hali ke kamichangche aturu helo; hali ke pot katiki nange kido, bangposi tikilo.”
Bang kep Arje-ibeng Kiso Kapame
11Jerusalem ayok kidam jong amun Jisu Samariya aro Galili asitem lut hletsi damo. 12Anang rongso isi long kilut dam amun bang kep arje-ibeng kiso arleng adung wango. Anali akaholo long arjapsi, 13hang solsi pulo, “Jisu, Hemphu, nang hali jinso not.” 14Konam Jisu anali yok thekngo, pulo, “Damot aro bangthehel yok nali bithang chipaklang damot.” Aro anali duwar kidam amun, anali me phrotno. 15Laparake anali sitem ihut ke, konam anang kime det chithekngo, chirul phaksi wango, hangwongsi Arnam yok parklamo. 16Anang Jisu akeng ari tarhup baksi chirdomo, aro anangyok kardom pilo. Aro anang ke ihut Samaritan arleng kido. 17Laparake Jisu pulo, “Bang kep arleng kimephrot kalek ma? Tene la bang sirkep, abang ke daklongte? 18La Bang-ajat arlengpo apar ke, prek kaiyok ta, wang chirulsi Arnam yok kaparklam phak thek hlonghle yongot kalek ma? 19Laparake Jisu anangyok pulo, “Thurnot aro nang kidame along damot; nang kikrol si nang pame phrotno.”
Arnam-Alongri Kiwange Alam
20Inirsi Pharisi hel Arnam-alongri konam wange, pusi bangpo alam Jisu yok arjulo, aro anang pulo, “Arnam-alongri kamainot nange abihini badi chiklang ke wangwe; 21lale “Langot, holek do!” lale “Lalong do!” labadi thanthe ye. Piyok pu tene, khanang ke, Arnam longri nali daksi do. 22Laparake anang adun hel yok pulo, “Ladi apor wange, inirsi Arleng Aso yok konam nali kilange ar-ih ye, manta nalithek hlonghle ye. 23Anali nali pu ye, “Langot, lalong do!” lale “Holek do!” Manta damek, aro anali phel-phel bisar ke dunek. 24Piyok pu tene suneng kabarlang ihi aga para ihi aga yok katha-ang badisi Arleng Aso arnita chiplang nge. 25Manta ango anang ako-ong aduk-tap hlonge aro labang awe arleng helsi anangyok seye. 26Labang ke Nowa po apor kachiplang badisi, Arleng Aso kiwang arnita chiplange. 27Nowa po jahaj long kilutdam arni yok, arleng hel cho-jun si kido, jorme-chihapsi, pachihap jongsi kido; la-amun lang akithe wangsi ahuwityok kamari. 28Labadisi, Lut po aporta labadi kachiplang: arleng hel kicho, kijun, kinam, kijor, ki-eh aro hem kikem, 29manta la-arni Lut po Sodum para olene kidam amun, ethakpe para me aro gondhok jangsi ahuwit analiyok kamari. 30—ladisi Arleng Aso kachiklang arnita chiplange. 31Labang arni, ingho bangposi sarnuk athak do aro anang bihinimar hem arlo do anali wang ki-en yok wang pasunse nang; aro la badisi inghosi bithar long do hemyok pawangwe nang. 32Lut po apisope yok neng chipurki. 33Inghosi anang jiuli kachiral yok bisare, anang chipangbo ye, manta inghosi anang jiuli chipangbo ye, anang chipajok une. 34Ne nali thando, la-arni anuwe tar ipak long bang hini ki-ih para ihut yok ke pon detne aro prek poyok ke tikang jange. 35Arloso bang hini ilong sok kitok amun, ihutpe yok ke pon detne aro prek pe ayok ke tikang jange. 36“Bang-hini arleng bithar long kido amun; ihut yok ke pon detne aro prek yok ke tikang jange.” 37Adunhel anangyok pu phakngo, “Dak longte, Hemphu?” Anang pulo, “Dak longsi kithi arangpo doye, lalongsi wo hungun chipangrum punge.”
Currently Selected:
LUK 17: AMRI-BSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.