LUK 18
18
Himepe pen Bisarpo Alam
1Laparake Jisu adun hel ayok neng chipanghohe si, arnita pingkitsi do nange, la-aphan isi athenghlan thano, 2“Dakne bak rongpe isi long Arnam yok kapherere aro arleng yokta kimengme bisar ihut kido. 3Labang rongpe long hime arloso ihut kido bangpe anang dung yok wang jong jongsi pulo, “Ne kilang un-ehsi ojor kipi abisar kangthir nepitha.” 4Bekso arniyok anang mengmesi kido; manta aphelyok anang abithangyok chipulo, “Ne Arnam phere yongta aro bang arlengyok mengme, 5yongta labang himepe nedung wangjong jongsi nekithan anat ne bisarpi nange; pene badi anang kiwang jong jong anat, ka-ongnai hel kolsi anangyok pajoknge; lale tene anang wang jong jongsi aphel nemahang ardepme.” 6Aro Hemphu pulo, “Kangho bisar po pot puman onenot. 7Aro anuwe anelo Arnam yok chingduk tene, anang karwal abanghel yok kime aphan kangho hel para arwalsi me-at bisarsi kangthir pipeye ma? Anang anali phan kirap adin pading hrimme ma? 8Ne nali thando, anang analiyok parjang dapsi bisar-kangthir piye. Aro layongta, konam Arleng Aso wang, la-amun pirthimipe athak kikrol pahlonge ma?”
Pharisi Aro Kalukdarhel Athenghlan
9Laparake abithangyok dhorom kangthir pusi kikrolman, aro bangyok pangweman, ladi angkhan arleng helyok labang athenghlan Jisu thano: 10“Bang-hini arleng Arnam ahem long kapingkit yok damo. Ihut ke Pharisi aro prek ihut ke kalukdar kido. 11Pharisi po ke arjapsi labadi pingkit no, “O Arnam, ne prek arleng badi kachobel, kadhoromre, bang pen kidoner lale labang kalukdar hel badi kalek, lasi ne nangyok kardom pajirman. 12Ne hathi-arul long bar-ni an-humman; ne kakome para bhak kep para ibhak piman.” 13Manta kalukdar poke akaholo arjap dingsi, ethakpe aga kilang chipaha un-ehsi, anang nenglong chiteng chitengsi pulo, “Arnam, ne badi papi ihut yok nelang ngot.” 14Ne naliyok thando, ha bang arlengpo dhorom kangthir puke alekhot en-ehsi, labang poyok si alekhot ensi anang hemyok damo; piyok pu tene inghosi abithangyok ihutpo pusi parklame, anangyok ke pabeknge; manta inghosi abithang yok chipabek nge, anangyok ke pathe ye.”
Jisu Osoyok Bor-eh Kibat
(Mot. 19:13-15; Mrk. 10:13-16)
15Arleng hel osohel yokta ensi Jisu adung wansi, lahel athak anang ari pa-otyok wano, aro konam adun hel analiyok thekngo anali patiki hlongeyok aneng thilo. 16Manta Jisu osohel yok anang dung taramo aro pulo, “Osohel nedung pawang nang, aro analiyok tengek; piyok pu tene Arnam-alongri ke oso badi arleng hel aphansi. 17Khanangsi ne nali thando, inghosi osohel badi chiplangsi Arnam-alongri chidengde ye, anangke jatsi lalong lut un-eh ye.
Hem Kime Arleng
(Mot. 19:16-30; Mrk. 10:17-31)
18Dakne bak ihut kipangdom phu-phangpo anangyok arjulo, “Akime Paklang po, ne pot tikisi or-eh len ajiubong hlonge?” 19Jisu anangyok pulo, “Neyok akime piyok nepu do? Ihut det, lake Arnam aparke, akime ihut ta ingjong. 20Nang bangpen donerek, arleng mari yek, nang chunghu yek, nang asisik hakhi piyek, nang ai nang pa yok aman pi : labang kanong hel nangthan undo. 21La-amun arlengpo pulo, “Riso amun para lamehel ke ne mengsi wang do.” 22Jisu labang karju amun anangyok pulo, “Minon hok isi alam do-er dolang; nang pot si abihini do, ahuwit jorne kicho kangwe arlengyok thak det, tangsi ethakpe long nang apuru hlonge; aro wangot, ne phel-phel wang dunot.” 23Manta labang alam arjusi, anang aneng doho dakngo, piyok pu tene anang ahem kime arleng kido. 24Jisu anangyok lang etsi pulo, “Arnam-alongri long hem-kime arleng ihut kilut dam konbak akisum! 25Piyok pu tene Arnam-alongri long hem kime arleng ihut kilut dam yok ke mihonghang ijon imprim amek aga kilut damsi kajalso chot.” 26Anang lampo arjusi arleng hel pulo, “Tene, inghote jok hlonge?” 27Anang pu phakngo, arleng ke potsi tiki un-eh, Arnam ke un detman. 28Laparake Pitor po pulo, “Langot, hali hem tikang phrotsi nang phel wang duno. 29Aro anang analiyok pulo, “Khanang si ne nali thando, Arnam-alongri anat ingho ahem, apiso, korte, ape-apo, asohel yok tikang do, 30analike kihreng adak yok ongchot, aro kiwange awepo long kijutje ajiu hlonghle ye, ladike ke wepen.”
Jisu Phong-thom Anang Kithi Alam Kithan
(Mot. 20:29-34; Mrk. 10:46-52)
31Jisu bang kere-hini adun helyok bhalak chomsi analiyok pulo, “Langot, ili Jerusalem yok damsi do aro turkihel Arleng Aso aphan kiwi alam chok phrotne. 32Piyok pu tene Bang-ajat arideng anangyok cham piye aro sime aro patharaknge aro ingthi ingthoknge. 33Anali anang yok sabuk pen sapsi mari ye, manta anang ni-thom arni aphel bur phak nge. 34Manta anali lamehel alam isita abhu hlonghle yongo; aro khanangke, anang kipu alampo anali para buti lo, aro potsi pulo bangpo anali nepdun un-eh yongot.
Jeriko Adung Chotok Ihutyok Jisu Kapame
(Mot. 20:29-34; Mrk. 10:46-52)
35Jisu Jeriko adung wang kihleng apor, chotok arleng ihut duwar akung iningsi chohang-worsi kido. 36Konam anang rat hel labang duwar kidam arjusi, anang potsi chiplangdo ma pusi ratyok arjulo. 37Lahel anangyok pulo, “Najaret Jisu damsi do.” 38Laparake anang hang-wongsi pulo, “Dabhit po aso, Jisu, ne-jinso not!” 39Anang dung abangke kidosit ayok tamo; manta anang hangchot-chot si, “Dabhit po aso, ne-jinso not.” 40Jisu sangkukngo aro chotok arlengpo anang dung kapawang yok thano, aro konam anang dung kiwang amun Jisu anangyok arjulo, 41“Nang phan pot ne patiki tol? La amun anang pulo, “Hemphu nemek pathek phak ngot.” 42Jisu anangyok pulo, “Nang mek thekngot; nang kikrolposi nang pajokngo.” 43Lajongsi anang amek thekngo aro anang phel phel dunsi, Arnam yok jortang pilo; aro konam ahuwit arleng bangpo thekngo, Arnam yok parklamo.
Currently Selected:
LUK 18: AMRI-BSI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.