Kutachika 30
30
1Racheli chamweniyi chabuliliyi kumuvwela Yakoba anyana, Racheli wamutiyilili manakwindi #Lev 18:18ichima. Hakumwila Yakoba, nindi, Nyinki nyana, mukunkulwayi nukufwa.
2Yakoba wamuzuwilili Racheli, nindi, Ami yami #50:19; 2 Anya 5:7Nzambi mwaka nikulekeshi kuvwala?
3Iŋodindi nindi, Tala nduŋu yami Biliha owu, iŋilaku mudi yena; kulonda akanvweli nyana hanyendu yami, ninami nawa nakamweni nyana kudi yena.
4Yomwinka ninduŋu yindi Biliha ekali iŋodindi; Yakoba niyena hakwiŋila mudi yena.
5Biliha yobaaba nikubaaba, hakumuvwela Yakoba mwanindi weyala.
6Racheli nindi, Nzambi nanhakwili dehi, natiyi niizu dami nawa, nanyinki dehi mwanami weyala. Dichi chamutumbililiyi ijina dindi, nindi Dani (Wanhakwilili).
7Nduŋu yaRacheli Biliha wabaabili cheŋi ivumu dikwawu, wamuvweleleli Yakoba mwana weyala wamuchiyedi.
8Racheli nindi, Nadikwati dehi kampaŋa kakeni mapampa kakavulu namanakwami, namubulumu futu. Wamutumbili ijina dindi, nindi Nafwatali (Kampaŋa kaNzambi).
9Leya chamweniyi nakumishi dehi kuvwala, hakutambula nduŋu yindi Zilipa, hakumwinkayi Yakoba akeli iŋodindi.
10Zilipa nduŋu yaLeya wamuvweleli Yakoba mwana weyala.
11Leya nindi, O kukooleka. Yomutumba niijina dindi, nindi Gadi (Kukooleka).
12Nduŋu yaLeya Zilipa wamuvweleleli Yakoba mwana weyala wamuchiyedi.
13Leya nindi, O kuwaha kunatiyami. Akwetu ambanda akantenaŋa nawu, Watiya kuwaha. Yomutumba niijina dindi, nindi Asheri (Kutiya kuwaha).
14Hamafuku aaŋulaŋawu tidiku Rubeni waweni nyitookela mwiha, hakutwala kudi mama yindi Leya. Racheli hakumwila Leya, nindi, Anyinkuhu mwani, nyitookela yamwaneyi.
15Yena hakumwakula, nindi, Kuntambula mfumwami chikehi, wutambuli nawa nyitookela yamwanami? Racheli nindi, Komana wufuku owu wukukama nindi nanoyu nyitookela yamwaneyi.
16Yakoba wafumini kwiha namelela, Leya hakuya nakumukinkilila, nindi, Chiŋa wiŋila mudami, muloŋa nakukwati dehi nanyitookela yamwanami. Wakamini nindi wena wufuku owu.
17Nzambi wamutiyililili Leya, yobaaba nikubaaba, yomuvwela niYakoba mwana weyala wamuchitanu.
18Leya nindi, Nzambi nanyinki dehi wulooku wami, nanochu chinamwinka mfumwami nduŋu yami. Yomutumba niijina dindi, nindi Isakari (Wulooku).
19Leya wabaabili cheŋi ivumu, wamuvweleli Yakoba mwana weyala wamuchitanu nawumu.
20Leya nindi, Nzambi nanheteshi maheta alala. Ichi dinu mfumwami wukushakama nanami, muloŋa namuvweli dehi anyana amayala atanu nawumu. Yomutumba niijina dindi, nindi Zebuluni (Kushakama.).
21Chanafuntilumu yovwala mwana wamumbanda, yomutumba niijina dindi, nindi Dina (Kusompa).
22Nzambi wamwanukili Racheli, wamutiyililili, wamujikwili lusemu lwindi.
23Yobaaba nikubaaba, hakuvwala mwana weyala. Nindi, Nzambi namfumishili dehi nsonyi.
24Wamutumbili ijina dindi, nindi Yosefu (Kubomba), nindi, Yehova wakambombelaku mwana mukwawu weyala.
Yimuna yaYakoba hiyikuvula
25Cheliliyi Racheli navwali dehi Yosefu, Yakoba hakumwila Labani, nindi, Nleki nifunti cheŋi kwituŋa detu.
26Anyinki niaŋodijami nianyanami inakukalakeleli, nleki niyi; wuneluki mudimu wunakukalakeleli.
27Labani wamwilili nindi, Neyi wunamonami kuwaha, shakamaku. Nashinshiki dinu komana Yehova nankoolekeshi dehi hamujimba weyeyi.
28Nindi, Nleji #29:15; 31:7wulooku weyi wunakakwinka.
29Wamwilili nindi, Eyi weluka dehi chinakukalakeli ami, niyimuna yeyi chiyanashakamuwu nanami.
30Ami chinenjili, nakuweni nayimuna yantesha hohu, ichi yasemununa dehi, yavula dehi nankashi; saŋa nashakamina kunu kweyeyi. Yehova nakukoolekeshi hohu; indi awa ahamukala wamami aweni namba kayihetela kumwakanyi?
31Nindi, Nikwinkidi? Yakoba nindi, Hiwukunyinka chumaku. Tiya chuma chiwakaŋilila kulonda nakadiishi cheŋi yimuna yeyi nakuyihemba.
32Ami nukuhita lelu mukachi kayimuna yeyi nakufumishamu nyikoku yejima yikweti tumabeŋa niyamansamansa niyiyila yejima, niampembi akweti tumabeŋa niamansamansa; diwu akela wulooku wami.
33Chiwamba kenza nakuhosha jawulooku wami wakamona chinashinshika, neyi wakawana kudami ampembi akadi tumabeŋa, niakubula mansamansa, nianyikoku akubula kwiyila, wakankwata kweyi wukombi.
34Labani nindi, Chachiwahi, twilenu muwunahoshi.
35Ifuku dodenodu wafumishilumu yizamba yawampembi yejima yikweti nyilenji, ninyikaji yawampembi yamansamansa, niyikweti tumabeŋa, yejima yikweti kutooka kwanti, ninyikoku yiyila yejima. Wayinkeli anyanindi.
36Washili mukachi kayena naYakoba mpata yakweseka mukwenda kwamafuku asatu. Yakoba hakudiishaŋa yimuna yaLabani yasheluhu.
37Yakoba hakuteta tunyitondu twatwovu twanyichidi yisatu, hakutubwambula mabeka mabeka.
38Hakusha tunyitondu twabwambwiliyi kumesu awayimuna mwawoŋakana muyizawu yakunwishila menji kwanwininuwu yimuna menji. Chayilaŋawu nakunwa hiyakwimita nimavumu.
39Hiyakutachika nimavumu kuna kutunyitondu, hiyakuvwala anyana, nianyilenji niamansamansa niatumabeŋa.
40Yakoba wayambwili anyana, hakutalisha mesu awayimuna kudi anyilenji, nikudi eyila ejima ahadi yimuna yaLabani. Nyikanka yayomwenindi wayishili hakankawawu, hayibombeli nayimuna yaLabanuku.
41Nochu welili, chakwimitawu mavumu, yimuna yakola Yakoba hakuyishila tunyitondu kumesu awu muyizawu, kulonda akemiti mavumu mukachi katunyitondu;
42ilaŋa yimuna yayonda hatushili mwoku; chochenochu yayonda hiyikwikala yaLabani, hakwila yakola yaYakoba.
43Yena iyalowu hakuheta nankashi, waheteli ninyikanka yayeni yawayimuna, nianduŋu awambanda nianduŋu awamayala, niaŋameli, niayimbulu.
المحددات الحالية:
Kutachika 30: MWW04
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
The Holy Bible in Lunda Ndembu © United Bible Societies, 2003.