Ператварэньне блуднага сына з Кайлам АйдлманамУзор

“АБУДЖЭНЬНЕ–Сьцерці голад”

Нядаўна я прачытаў пра адзін досьлед, які правёў псыхоляг Джонатан Хайт. Ён прыдумаў захапляльнае гіпатэтычнае практыкаваньне накшталт гэтага:

Удзельнікам далі прачытаць падсумаваньне жыцьця нейкага чалавека. Потым іх папрасілі ўявіць, што той чалавек — іхняя дачка, і тое падсумаваньне — немінучая гісторыя ейнага жыцьця. Дачка яшчэ не нарадзілася, але народзіцца ў хуткім часе, і гэта тое, што зь ёй станецца. Удзельнікам далі пяць хвілінаў, каб адрэдагаваць ейную гісторыю. З гумкай у руках, яны маглі выдаліць зь ейнага жыцьця ўсё, што яны жадалі.

Удзельнікаў спыталі: Што б вы сьцерлі перш-наперш?

Большасьць з нас пачала б інстынктыўна і ашалела сьціраць няздатнасьць да вучэньня, аўтамабільную аварыю, грашовыя цяжкасьці. Мы любім сваіх дзяцей і жадаем, каб яны жылі безь нястачы, смутку і няўдачаў. Кожны з нас хоча, каб жыцьцё нашых дзяцей было пазбаўленае болю і пакутаў.

Але ж спытайцеся самі сябе: ці тое сапраўды было б найлепшым для іх?

Ці мы сапраўды думаем, што прывілеяванае і бестурботнае жыцьцё зрабіла б нашых дзяцей шчасьлівымі? Што сталася б, калі б вы сьцерлі нейкія цяжкія абставіны, якія падштурхнулі б іх да малітвы? Што сталася б, калі б вы сьцерлі якую-небудзь цяжкасьць, што навучыла б іх радавацца незалежна ад жыцьцёвых акалічнасьцяў? Што сталася б, калі б вы сьцерлі нейкі боль і пакуты, якія сталі б Божым каталізатарам на тое, каб яны пачалі шукаць Яго? Што сталася б, калі б вы сьцерлі якія-небудзь цяжкія абставіны, што дапамаглі б ім усьвядоміць Божы плян для іхняга жыцьця?

Тое можа прагучаць жорстка, але тое, што найбольш спрыяе нашаму духоўнага росту — гэта ня казані, кнігі ці хатнія групы. Найбольш спрыяюць духоўнаму цяжкія абставіны. Я кажу гэта вам, зыходзячы з уласнага досьведу, а таксама прачытаўшы апытаньні аб духоўным росьце і пачуўшы сьведчаньні тысячаў людзей у форме жыцьцёвых выпадкаў, пра якія яны распавялі мне на працягу многіх гадоў. “AHA” момант (“Абуджэньне, адкрытасьць, дзеяньне”) здараецца праз пакуты, няўдачы і жыцьцёвыя выпрабаваньні. Шмат якія людзі назавуць тыя моманты найважнейшымі момантамі іхняга духоўнага абуджэньня.

У якія пэрыяды вашага жыцьця вы вырасьлі духоўна найбольш? Ці былі гэта пэрыяды міру й дастатку, або пэрыяды цяжкасьцяў? Ці намагаецца Бог дапамагчы вам вырасьці празь цяжкія выпрабаваньні ці абставіны, у якіх вы знаходзіцеся цяпер?