MAIPEI PHOUYU 27
27
Zelophehad Nahnaotu Maitao
1Mahlah, Noha, Hoglah, Milkah, ae Tirzah hai maitao hai Hepher nahpoutu Zelophehad nahnaotu maitao-e. Hepher hai Gilead nahpoutu-e, Gilead hai Mikhir nahpoutu-e, Makhir hai Manasseh nahpoutu-e, Manasseh hai Josef nahpoutu-e. 2Puletao tounah maitao nou Moses, napao Eleazar, süthai-apei maitao ae maisou hisü Mapao nou buyu Sahpao kijü hisü veloua nou paoe, 3“Etao puo hai radeiki hinou nahpoutu ali-a hrümoa thaitare. Puh hai Mapao pei hi khaitya raoyu Korah thaifümai hrohi loumoe; puh sü lah puhvei mahmo donou thai-a baie. 4Puhnou nahpoutu hayu vanou daisouyu donou puh zhih sü panou Israel mai hinou halai touwe? Epuo vei thaihou jürai maitao koa nou Etao hi Epuo vei kaalo khesü peio.”
5Moses nou puletao vei chi sü Mapao hi popapeie, 6ae Mapao nou puh hi paoe, 7“Zelophehad nahnaotu maitao nou khoyu nasü kaowe, puletaoye sü puletao vei puo thaihou jürai maitaoye koa nou kaalo sü peio. Puhvei kikaa nasü panou puletaoye ngaolo. 8Israel mai hisü haibüa paopeio, süolouzü mai talinou nahpoutu ha-a nou thaita louzü, puhvei kaalo hai nahnaotu maitao nou thaoloulai. 9Hakinou puh hai nahnaotu mai-a halouzü, puhvei thaihou jürai mainou puhvei kaalo sü thaolai. 10Hakinou puh hai thaihou jürai mai lia halouzü, puhvei kaalo hai puh puo vei thaihou jürai maitao nou thaolai. 11Hakinou puh puo thaihou jürai mai-a hare toulouzü, puhvei kaalo nasü puhye nghikayu kityarai mai ali nou thaolai. Hai hai Mapao nou Moses hi kharochi peikhai touyu thaifüa Israel mainou teisa nou chikha ali soua talai.”
Joshua ye panou Moses Thao Süthai-apeio Soure donou Dolouyu
(Paod 31.1-8)
12 Mapao nou Moses hi paoe, “Abarim vei Deichitaoh hisü taopaloua Enou Israel maiye peilaiyu teidei sü zhukhaio. 13Nenou teidei süna ngaolouyu thai, nevei jüraio Aaron büa ne-a thaita bailai, 14daiolouzü ne hai nou avei kharochi hai Zin vei radeiki hinou pfüthowure. Israel maisou nou Meribah hinou Eye khaitya-a raoyu phaki, nenou avei sheeyu khouko nasü puletao vei nghoujü hinou soungaopei more.” (Meribah touyu hai Kadesh hinou dzüla payu nasü paowe, ae süsü Zin vei radeiki hinou bue.)
15Moses nou Mapao hi haibüa veachi paoe, 16“Mai hrülai pei hinou buyu Ramai Mapao, maikhe maiye süthaisa-a tapeilou süyu mai ali dolo tea Enou veachi paowe, 17sübüa nevei maitaoye panou kaozü hinou süthaisa-a talo, sükulouzü nevei maitao hai zhaokhowo hayu zhaotu ali bülai moe.”
18 Mapao nou Moses hi paoe, “Soulou süyu Nun nahpoutu Joshua sü saloua puh pei hi ne bah khaipeio. 19Puhye panou napao Eleazar ae Israel maisou nghoujü nou lalo, ae puletao vei nghoujü nou puhye sü ne thai hai süthai-apeio nasü soulaire tea paosüpa peio. 20Israel maitaoye panou puh chi züloure donou puh hi nevei khouko sü daotu peio 21Puhnou napao Eleazar ye koa vah soulai, ae Eleazar nou Urim ae Thummim poloua nou avei leli nasü zhulai. Haibüa nou Eleazar nou Joshua ye sü kabüa Israel maiye khasa-a hülai touyu hai paodou peilai.” 22Mapao nou kharochi peiyu büa Moses nou souloue. Puhnou Joshua sü panou napao Eleazar ae Israel maisou nghoujü hinou pa laloure. 23Mapao nou kharochi peikhai touyu bütoua Moses nou Joshua pei hisü puh bah khailoua puhye nou puh thaosü thaolai tea paosüpa peie.
Currently Selected:
MAIPEI PHOUYU 27: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.