MAIPEI PHOUYU 28
28
Teisa nou Posheela Peiretao
(Tap 29.38-46)
1-2 Mapao nou Israel mai hi haibüa paopeio tea Moses hi kharochi peie, “Paokhai touyu teiletao hisü kaozü soua Eye thoudzü vei posheela khesü pove peio, süsü Enou jüpa-e.”
3 Mapao hi thoudzü vei posheela haitao hai pove sheela peilai: chaa lia ha-a nou po ali payu zhaotsü ahai hai teithechü nou meidei-a posheela peilai. 4Zhaotsü ali nou shona noulai, ae ali nanou koukhe nou posheela peilai, 5ae posheela sünaye koa nou thoudzü vei posheela soua sou sühcho ali hai oliv theadzü veikayu tyanou sühchovou ali hai thouhrüloua posheela peilai. 6Haisü teisa nou meidei-a posheela peiyu sü soulai, haibüyu hai Sinai Deichi hinou arai nasoua thoudzü vei posheela peie. Haibüa posheela peiyu kai hai Mapao nou ngivei-e. 7Zhaotsü arai naye koa nou darkha zhaoh vei posheela hai sühchovou ali sü posheelabu hi nghoupeio. 8Koukhe hi-a shona vei posheela peiyu raibütoua zhaotsü ali nasü darkha zhaoh noupu koa posheela peio. Hai nasü thoudzü vei posheela peiyu-e, süsü Mapao nou jüpa-e.
Soteithe vei Posheela
9Soteithe zhou hai chaa lia ha-a nou po ali payu zhaotsü ahai hai sou sühcho ahai hi oliv theadzü thouhrüloua nou thoudzü vei soua posheela peio, alia darkha zhaoh hai-a posheela peio. 10Soteithe zhou hai teisa vei soua posheela peiyu pei hinou meidei-a posheela peiyu hai nasü posheela peilai.
Khoukha Ngaorai Zhou Posheela
11Khoukha ashu ngaorai zhouchü hai Mapao hi posheela haitao sü pove sheela peilai: chode ahai, zhaotu ali, po ali payu zhaotsü anai, haitao hai chaa hayu tyanou pove peilai. 12Thoudzü vei posheela vei soua oliv theadzü noupu sou hai posheela peio. Chode aliva nou sou hai sühcho asü, ae zhaotsü ali hi sou sühcho ahai; 13ae zhaotu ali hi sou sühcho alili peio. Meidei-a posheela peiyu hai nasü thoudzü vei asheela-e, haisü Mapao nou jüpa-e. 14Chode ali hi darkhazhaoh sühchovou ahai, zhaotsü ali hi darkhazhaoh litar ali-a da, ae zhaotu ali hi darkhazhaoh litar alili hai koa nou posheela peilai. Haisü po hi khouh ngaorai zhousa hai haibüa posheela peilai. 15Teithechü vei darkhazhaoh ae meidei-a posheela peiyu pei hinou nghitsü ali hai mah vei posheela soua posheela peilai.
Kheih Thoumoyu Raokhao Nüh hi Posheela
(Lev 23.5-14)
16 Mapao ye tsükhouyu hinou Tachopa Nüh hai khouh arai navei khoukha kiadai zhou nou nütalai. 17Khoukha kiangou zhou nou poa teithe anai koute hai khonüh nülai, ae süteile hi hai kheih thoumoa souyu raokhao likhei toua bailai. 18Khonüh nüta raikai zhou hai maisou nou vejüloua ratholai, ae vah lia soulai moe. 19Mapao hi thoudzü vei posheela hai meidei-a posheela peio, süolouzü chaa lia hayu chode ahai, zhaotsü ali, ae po ali payu zhaotsü anai hai posheela peio. 20Thoudzü vei posheela hai sou veikayu nou theadzü thouhrüloua posheela peio: chode alili hi sou sühcho asü, zhaotsü ali hi sou sühcho ahai, 21ae zhaotu ali hi sou sühcho alili hai sheela peio. 22Süpei hinou nghitu ali hai mah vei posheela soua maikhe maiye sousheeyu vei naanou hai soupeio. 23Haitao hai teithechü vei meidei-a posheela peiyu pei hinou posheela peio. 24Haibüa nou teithe anai koute hai Mapao hi thoudzü vei posheela sü posheela peio, haisü Mapao nou jüpa-e. Posheela haisü teithechü nou meidei-a posheela peiyu ae darkhazhaoh nghou peiyu pei nou posheela peio. 25Teithe anai zhou sü neletao nou vejüloua ratholai; vah lia soulai moe.
Chachiyu hi Khonüh vei Posheela
(Lev 23.15-22)
26Chanüh nüyu teithe araizhou, neletao nou Mapao hi thoudzü ngaolou raikayutao hai pove sheela peiyu phaki, neletao nou tave jüloua ratholai, süzhou hai neletao nou vah lia soulai moe. 27Mapao panou kai nüveire donou chaa lia taomoyu chode ahai, zhaotsü ali, po ali payu zhaotsü anai hai meidei-a posheela peio. 28Thoudzü vei posheela soua theadzü thouhrü khaitouyu sou noupu chode ali hi sou sühcho asü, zhaotsü nahi sou sühcho ahai, 29ae zhaotu alili hi sou sühcho alili hai poa sheela peilai. 30Süpei hinou nghitsü ali hai mah vei posheela peio, sübüa maikhe maiye sousheeyu vei naanou sü soupeio. 31Haitao hai teithechü nou meidei-a posheela peiyu ae thoudzü vei posheela peiyu jünou tyakua darkhazhaoh vei posheela soua posheela peio.
Currently Selected:
MAIPEI PHOUYU 28: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.