MAIPEI PHOUYU 30
30
Chaachou Souyu hi Tare Zhaitao
1Moses nou Israel maivei süthai-apei maitao hi tare zhai haitao hai peie. 2Mai talinou Mapao hi hali donou chaachou soukhai touyu nasü puhnou puhvei chaachou hai pfüphe pfüpholai moe, puh mü hinou paopayu nasü thaifüa souvete peiyu sü soulai.
3Puh puo ki hinou buyu loumainah ali nou Mapao hi hatarali vanou chaachou soukhai toulouzü, 4ae honapai puo nou sünasü chouloua halia paomo louzü, honapai nou soulai tea chaachou soukhai touyu nasü souvete peilai. 5Ana honapai vei puo nou sünasü chouloua honapaiye panou souba louzü, honapai nou süsü soumoa bailai, Mapao nou puhye sü khaipeilai, daiolouzü puhye sü puh puo nou pa souba-a baie.
6Loumainah alinou hatarali vanou chaachou soukhaitoua nghita louzü, 7ae haisü puh kipuo nou süloua halia paomo louzü, honapai nou soulai tea chaachou soukhai touyu nasü souvete peilai. 8Ana puh cha nou sünasü puhye panou soubare toulouzü, honapai nou sünasü soumoa bailai, Mapao nou puhye sü khaipeia bailai.
9Mimeapfü alinou moa reikhaimai alinou chaachou soukhai touyu nasü puhvei chipao thaifüa souve teyu sü soulai.
10Maipuo phi hinou buyu naotumai alinou hatali donou chaachou soukhai toua bulouzü, 11ae honapai vei cha nou halia paomo louzü honapai nou chaachou soukhai touyu nasü souvete peilai. 12Ana honapai cha nou sünasü chouloua honapaiye panou souba louzü, honapai nou soumoa bailai, daiolouzü honapai ye sü puh cha nou pa souba-a baie. 13Honapai nou chaachou soukhai touyu hataralia maipuo nou aetou peilaiyuma moa panou soulai moe tea nuyuma puhvei zü hai bue. 14Ana honapai vei kipuo nou choulouyu teithe hinou haliro paomore toulouzü, honapai nou sünasü souvete peilai. Puhnou chouloua chi lia paomo louzü, süsü puhnou ae-ao touwe touyu vei shee soungao-e. 15Ana haithai naki honapai nou chaachou soukhai touyu nasü puhnou pa soulai moe tea nulouzü, mah nasü puhnou pfüa bailai.
16Zhai haitao hai Mapao nou Moses hi loumainah ali nou moa nghitayu naotumai ali nou chaachou soukhai touyu phaki panou tare donou peie.
Currently Selected:
MAIPEI PHOUYU 30: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.