MAIPEI PHOUYU 31
31
Midian Mai Pei hi Sheeyu Reih Souyu
1 Mapao nou Moses hi paoe, 2“Midian mainou Israel mai hi soupeiyu büa puletao hisü khüngu hai phoulo. Süthaisü ne hai thaita-a bailai.”
3Südonou Moses nou maikhe mai hi paoe, “Midian mai pei hi soureih soure donou soudalo, daiolouzü puletao nou Mapao pei hi vah ashi soukhai touyu thaifüa tudee peilai. 4Israel maivei khü alili hinou soureihmai hai thelili seitalai.”
5Südonou Israel mai khü chekhei hinou mai theli theli hai soudaloua soureih soure donou mai 12,000 sü sapaloure. 6Moses nou soureih maitaoye süthaisa-a panou tare donou napao Eleazar nahpoutu Phinehas sü seitawure, ae puhye panou sheeyu natao alia shee soungao peire donou shabe sü pa pota-e. 7Mapao nou Moses hi kharochi peiyu thaifüa puletao nou Midian mai pei hisü reih soutare, ae poutumai hrülaiye sü southawure. 8Puletao nou Midian maivei veo angou: Evi, Rekem, Zur, Hur, ae Reba hai maitao-a southare. Puletao nou Beor nahpoutu Balaam-a southawure.
9Israel mainou Midian naotumai ae nahmai hrülai sü nüloure, alia puletao vei kikhaorü ae kini veishi hai poloure, 10ae puletao nou nuhdu teitei hai meidei laire. 11Puletao nou polouyu kinitao, nülouyu maitao, ae kikhaorü khesü 12Moses, Eleazar ae Jeriko nou Jordan rei alilo vatha buyu Moab maivei deikho hinou fühao soua buyu Israel maitao hisü poa nou ve-e.
Soureih Maitao nou Dakhai Veyu
13Moses, napao Eleazar alia süthai-apei maitao nou puletao vei fühao hinou vakou tapaloua soureih maitaoye sü sühloue. 14Moses nou soureih hinou dakhai veyu reihmai peikho maitao, mai theli peikhoyu ae mai kaihli peikhoyu maitao hisü raroure. 15Moses nou puletao hi paoe, “Neletao daisounou naotumai haitaoye southa mowe? 16Naotumai nou Balaam vei chi züloua Israel maiye Peor hinou süthaimah peie touyu sü sülo. Südonou Mapao vei maitao hi rahta sü pove peie. 17Südonou chuo nahpoutu mai hrülai ae poutu maiye sabu sazüyu naotumai hrülai hai southawo, 18ana neletaoye donou poutumaiye sazükhai toumoyu loumai nahtao hai khailoua bailai. 19Maiye southayu mai hrülai moyuma thaiphao deiyu mai hrülai hai fühao vei vakou nou teithe anai koute bulai. Teithe asü zhou ae teithe anai zhou hai lah neletaoye naanou hinou sousheelo ae neletao nou hukhamai soua nülouyu naotu maitao-a sousheelo. 20Neletao vei sabanü veishi, ae souhee, nghitumai alia süü nou soukhai touyu natao-a sousheelo.”
21Napao Eleazar nou soureih souyu hinou dakhai veyu maitao hisü paoe, “Haitao hai Mapao nou Moses hi peikhai touyu chikha-e. 22-23Mei taolou hoyu na veishi, süolouzü sana, shahu, baosahu, hu, tinhu moyuma mishinghu hai mei hinou thou sousheelai. Ana na kukhetao hai dzü hinou naanou soua sousheelai. 24Teithe anai zhou hai neletao vei sabanü khesü dzüshao loulai; sükulouzü neletao hai naanou hinou shee-a bailai, ae neletao vei fühao hisü talouloua bailai.”
Shaopoa Veyu Natao Zha Zhiyu
25 Mapao nou Moses hi paoe, 26“Ne ae Eleazar alia Israel mai khü-khü hinou peikhoyu maitao koa nou soureih hinou shaopoa veyu natao, nüpoa veyu hukha maitao ae kikhaorü veishi sü phoulo. 27Sütao hai raibütoua zha ahai soua dade zhilo, zha ali hai soureih soutayu maitao hi peilai, ae zha ali nahai Israel maisouye donou tea zha zhipeilai. 28Soureih soutayu maitao zha hinou Mapao hi kikha soua peire hai hukhamai kaihngou hinou mai ali hai peilai, sübütoua kikhaorü, rheisüh, zhaotu ae nghitu-a peilai. 29Sütao hai Mapao hi posheela peiyu soua napao Eleazar hi peio. 30Maisou hi peikhai touyu zha hinou hukhamai, kikhaorü, rheisüh, zhaotu ae nghitu raingou hinou ali hai Mapao vei Sahpao hi poa vah soure donou Levi maitao hi peio.” 31Mapao nou kharochi peikhai touyu büa Moses ae Eleazar nou soupeie.
32-35Soureih soutayu maitao nou shaopoa veyu natao hai puletao vei zha noupu loua zhaotu ae nghitu nou 675,000, kikhaorü nou 72,000, rheisüh nou 61,000, ae loumainah nou 32,000. 36-40Soureih soutayu maitao vei zha sü haitao-e: zhaotu ae nghitu nou 337,500, hai hinou Mapao vei kikha hai 675 sü peie; kikhaorü nou 36,000, hai hinou 72 hai Mapao hi kikha peie; rheisüh nou 30,500, hai hinou 61 hai Mapao hi kikha peie; ae loumainah nou 16,000, hai hinou loumainah 32 sü Mapao hi kikha peie. 41Mapao nou kharochi peiyu thaifüa Mapao hi posheela peikhai touyutao sü Moses nou napao Eleazar hi peiwure.
42-46Maisou vei zha hai-a soureih soutayu maitao vei raibütoue: zhaotu ae nghitu nou 337,500, kikhaorü nou 36,000, rheisüh nou 30,500, ae loumainah nou 16,000. 47Zha haitao hinou Moses nou hukhamai soua nüpoa veyu loumai nahtao ae kikhaorü tao-a raingou hinou ali hai poloua Mapao hi sheela peie, ae Mapao nou kharochi peikhai touyu thaifüa Mapao vei Sahpao hi poa panou vah soure donou Levi maitao hi peiwure.
48Süthaisü süthaisa-a soureih soutayu hi peikhoyu maitao nou Moses hi ve 49haibüa paoe, “Apaopuwo, ne kilai Etao nou satayu reihmaime hi reihmai ali-a hamoe. 50Südonou Etao vei hrümamai khailupa peiyu donou Etao nou ngaolouyu sana vei zhusanatao, baokha, baosa, noubo, ae tou khesü Mapao hi Etaoye panou vupa peire donou pove peiwe.” 51Puletao nou zhusanatao pove peiyu hai Moses ae Eleazar nou poloure. 52Peikho maitao nou pove peiyu sanatao hai sühcho kaih-hai phali-e. 53Reihmai kukhetao hai puletao nou polouyu sü lahkuku hi khailoure. 54Südonou Mapao ye panou Israel maiye vupa peire donou Moses ae Eleazar nou sanatao hai Shapao hi pove peiwure.
Currently Selected:
MAIPEI PHOUYU 31: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.