MAIPEI PHOUYU 32
32
Jordan vei Teinghei Palova buyu Maityatao
1Reuben alia Gad maityatao hai kikhaorü taoli bue. Puletao nou Jezer ae Gilead teidei hai kikhaorü kiyu donou buh veishoyu sü ngaolou khaie, 2puletao nou Moses, Eleazar ae süthai-apei maitao hi ve paoe, 3-4“Mapao nou Israel maiye soukha peia panou polouyu Ataroth, Dibon, Jezer, Mimrah, Heshbon, Elealeh, Sibmah, Nebo, ae Beon nuhdutao hai kikhaorü kire donou buh veisho-e, ae neletao vei kilai Etao hai kikhaorü taoli bue. 5Zhuvea nou teidei haitao hai Etao vei zha panou souloure donou Etao hi peio, ae Etaoye panou Jordan Rei sü tachopa holova bumoa baio.”
6Ana Moses nou puletao hi haibüa chila peie, “Neletao vei thaihou jürai soua buyu Israel mai kukhetao nou soureih souta-a buyu phaki, neletao nou buh hai hinou so-a bünüa baivu? 7Mapao nou peikhai touyu teidei nasü neletao daisounou Israel maiye panou Jordan rei tachopa thaoloure sü chathai tayu vah soupeiwe? 8Sübütoua nou neletao vei puopaoh maitaoye Enou Kadesh Barnea hinou teidei taho zhutare donou seitayu phaki puletao nou soupeie. 9Puletao nou Eshkol Deikho hi koute hai taho teidei sü zhuta-e, ana puletao nou dakhai veyu phaki, Mapao nou puletaoye peikhai touyu teidei hisü puletao nou maikhe maiye panou talou poloure sü paochathai peie. 10Süzhou teithe Mapao nou rarou loua haibüa chaachou soue: 11‘Enou Abraham, Isaak ae Jakob hi peilai tea paokhai touyu teidei hisü Ejipt hinou tapayu po kai jünou layu mai ali-a panou talou ngaolai more, daiolouzü puletao nou Eye sü louche more.’ 12Hai hisü Keniz puona Jephunneh nahpoutu Kaleb, ae Nun nahpoutu Joshua puhai louzü loumoe, daiolouzü puhai nou puhai vei tsüle veishi nou peia achi züwe. 13Mapao nou Israel mai pei hi rarouloua puh nghoujü nou vah ashi souyu khaphao veishi sü thaita khaimo koute hai panou po raidai sü sühaopoa nou ta-e. 14Chua neletao vei puopaoh maitao büa Mapao nou Israel maiye panou raroupure vei vah sü neletao nou soua bure. 15Chuo Reuben ae Gad maitao nou puh thaifü balouzü, puhnou Israel mai hrülaiye sü panou radeiki hai hinou thaokhaiwua bailai, ae puletaoye soushiyu hai neletao vanou baie tea paolai.”
16Puletao nou Moses hi ve haibüa paoe, “Etaoye panou buh hai hinou Etao vei kikhaorü khaire buh sü soulo ae Etao vei toudzü maitaoye panou baichao loure vei nuhdu khesü soushulo. 17Süthaisü Etao thaihou jürai soua buyu Israel mai kukheye koa soureih soutalai, ae puletaoye panou teidei sü poloua füsho loumo koute hai Etao nou rai-a soureih sü soupeilai. Haibüyu teile hi pehao hinou hrüyu maitao hinou Etao vei maipfü ae nahmaitaoye panou baichao loure donou kaopo poa nuh khesü souloua bulo. 18Israel mai kukhetao nou füdei sü poloua füsho loumo koute hai Etao nou lah Etao vei füdei hai hisü dakhai velai moe. 19Etao nou Jordan rei talapa polouyu füdei hisü Etao vei zha khalai moe, daiolouzü Etao vei zha hai Jordan rei hailova nou ngaoloure.”
20Moses nou chila peie, “Neletao nou sübülai toulouzü, reih soutare donou Mapao vei nghoujü nou reihna sü tudalo. 21Jordan rei talapa Mapao nghoujü nou puhye ngaobayu maitaoye hulai loumo koute, 22ae teidei sü poloumo koute hai neletao nou soureih sü soulai. Süthaisü neletao hai lahvei füdei hisü dakhai ve-a bailai, daiolouzü neletao nou Mapao hi ae Israel mai hi soupeire vah hai soupeiwure. Süthaisü teidei hai nasü neletao zha soua poloua bailai, haisü Mapao nou aetou peilai. 23Ana neletao nou paokhai touyu sü souvete peilou more toulouzü, neletao hai Mapao nghoujü nou mah souwure, ae neletao vei mah thaifüa veahoyu sü lah neletao nou ngao-a bailai. 24Südonou neletao vei nuhdutao ae kikhaorü khesü buh soushulo, ana neletao nou paokhai touyu nasü souvete peio.”
25Gad ae Reuben maitao nou paoe, “Apaopuwo, nenou kharochi peikhai touyu thaifüa Etao nou soulai. 26Etao vei chapfü ae nahmaitao, alia Etao vei kikhaorü ae zhaotu khesü Gilead nuhdu hai hi khaiwulai. 27Ana Mapao vei kharochi thaifüa soureih soulou süyu Etao mai hrülai nou Jordan rei tachopa nenou paoyu bütoua soureih sü soutalai.”
28Südonou Moses nou kharochi hainasü Eleazar, Joshua ae Israel mai pei hinou khoyu mai hrülai hisü paoe, 29“Hakinou Gad ae Reuben maitao nou Jordan tachopa Mapao vei kharochi thaifüa soureih soulouzü, ae puletao vei soukha vanou neletao nou teidei hai khesü reih veiloua poloure toulouzü, puletaoye Gilead teidei hai nasü puletao vei zha soua puletao hi peio. 30Ana puletao nou Jordan tachopa neletaoye koa reih soumo louzü, neletao nou Kanaan teidei hinou neletaoye raibütoua zha sü ngao-a bailai.”
31Gad ae Reuben maitao nou chila peie, “Apaopuwo, Mapao nou kharochi peiyu thaifüa Etao nou soupeilai. 32Etao nou Kanaan teidei hisü Mapao vei nghoujü nou soureih hai soutalai, sübüa Jordan rei teinghei palova nou buyu teidei haisü Etao vei zha soua khailoulai.”
33Südonou Moses nou Gad, Reuben ae Manasseh khü dali hisü Amor maivei veo Sihon vei teideitao ae Bashan hi veo Og vei vedeitao alia süpehao hinou buyu teideitao hai peiwure. 34Gad maitao nou Dibon, Ataroth, Aroer, 35Atroth Shophan, Jazer, Jogbehah, 36Beth Nimrah, ae Beth Haran nuhdutao hai soushu dakhai loure. 37Reuben maitao nou Heshbon, Elealeh, Kiriathaim, 38Nebo, Baal Meon (haina vei zhih hai sadare), ae Sibmah nuhdu haitao hai soushu dakhai loure. Puletao nou soushu dakhai louyu nuhdu haitao hai puletao nou zhih ashu nou sapeiwure.
39Manasseh nahpoutu Makhir vei khü nou Gilead maivei teidei sü reih hulou poloure ae buh sühinou hrüyu Amor maiye sü hulaiwure. 40Südonou Moses nou Gilead teidei hai Makhir khü hi peiwure, ae puletao nou sühinou hrüe. 41Manasseh khü hinou buyu Jair maitao nou nuh teidei taoli soureih soua poloure, ae nuh teidei sütao hai “Jair vei Nuhdutao” tea zhih sadaloure. 42Nobah touyu maitao nou Kenath ae süpehao hi buyu nuhtao hi soureih soulou poloure, ae buh sütao hai Nobah tea puh vei zhih hinou saloure.
Currently Selected:
MAIPEI PHOUYU 32: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.