PAWTDAWNA THU 38
38
Hâlmang Thillatna Mâichâm
(Pdt 27.1-8)
1Ama chun thinggi thing ma in, hâlmang thillatna ding mâichâm le a siam ah; tong nga sau leh tong nga lian a hia; ning li nei leh tong thum ah sâng ahi.
2A ning li ah um chiat dingin a ningbawkte a siam ah; a ningbawkte chu le sakhat ngen ah siam ahi: ziate chu sum-eng tui a luan khum hi.
3Mâichâm ah matchâk ding ûm leh bêl zosia, bêlte, vutluate, tui kuangte, sasutna ding thik-haikhaw kâte leh khângbêlte haw chule a siam ah: Zia matchâk zosiate hi sum-eng ngen ah siam ahi.
4Mâichâm â dingin sum-eng lên, mâichâm kimkhat nuai lam tuam dingin a siam a.
5A jawnna molte thunna dingin sum-eng, lên ning li ah bul dingin a kol pali le a siam a;
6a jawnna ding molte chu thinggi thing ngen a siam ah, zia chu sum-eng tui a luan khum a.
7Chuleh, zia molte chu a jawnna dingin mâichâm ning li a kol umte sung ah chun a thun ah; mâichâm chu thingpêk kikilkhawm, a sunghawm ah kisiam ahi.
Sum-eng Tuikuang Chu
8 #
Pdt 30.18
Chuleh, sum-eng tuikuang le a keng sum-eng tawh, biakbûk kotbul ah numeite nasepna mun ah lîm-et kiang ah um ding chule a siam a.
Biakbûk Huang Siamna
(Pdt 27.9-10)
9Chuleh, biakbûk huang a siam ah; a simlam pang dâi ah puanjak dingin puan malngat, thuksa kisiam tong za khat ah sau a siam a:
10A khuam sawmni leh a kitunna ding ah kikhuak sawmnite chu sum-eng ngen ah kisiam ahi’n; a khuam ah puanjak bâtna ding kuaikâte leh a kaidennate chu dangka thik ngen ah kisiam ahi.
11A mallam pang dâi ah puanjak ding chu tong za khat ah sau a hia; a khuam sawmni leh a kitunna ding ah kikhuak sawmnite chu sum-eng ngen a kisiam a hia; a khuam a puanjak kibâtna dingin kuaikâte leh a kaidennate chu dangka thik ngen a kisiam ahi.
12A tumlam pang dâi ah puanjak ding chule tong sawmnga sau a hi’n; a khuam sawmkhat tawh a kitunna ding ah kikhuak sawmkhatte chu sum-eng ngen ah kisiam ahi; a khuam ah puanjak bâtna ding kuaikâte leh a kaidennate chu dangka thik ngen ah kisiam ahi.
13A mai lam sualam pang chu tong sawmnga ahi.
14Kotkhak langkhat lam ah puanjak ding chu tong sawm leh nga, khuam pathum tawh a kitunna ding ah kikhuak pathum tawh ahi.
15Kotkhak langkhat lam ah puanjak ding chule zia gual ma chu ahi: a kotkhak langtuak gêl ah jak ding ah chun puanjak tong sawm leh nga; a khuam ding pathum tawh a kitunna ding ua kikhuak pathum gêl ah bawl ding ahi.
16A huang ûmna puanjak zosia chu puan malngat, thuksa ngen leh,
17a khuam kitunna ding ah kikhuakte chu sum-eng ngen ahi’n; a khuam ah puanjak bâtna ding kuaikâte leh a kaidennate chu dangka thik ngen ah siam ahi’n; a khuam lubawkte chule dangka tui ah luan ahi: a huang sung ûmna khuam zosia mat dênna chule dangka thik ah siam ahi.
18Biakbûk huang sung lûtna ding kotkhak ah puanjak ding chu khutthiam tak ah pin ah kikhui, a dum, a sandup leh a sandângte ah siam ahi.
19A khuamte chu pali ahi’n, a kitunna ding ah kikhuakte chule sum-eng ngen ahi; a puanjak bâtna ding ah kuaikâte chu dangka thik ngen ahi’n, a khuam ah lubawk kisiamte leh a kaidenna ding ah kisiamte chu dangka thik ngen ah kisiam ahi.
20Biakbûk leh a huang sung ûmna zosia hênna chu sum-eng ngen ah kisiam ahi.
Biakbûk Siamna Ding ah Matchâkte
21Ziate hi Mosi thupiak dungzui ah thiampu Aron chapa Ithamar mapuina nuai ah Levi chate’n biakbûk a bawl uh tepte’na leh thuthung suangpêk a koina ding siamna a matchâk zosiau a tiam dan uh chu ahi:
22Bezalel, Uri chapa, Hur chapa, Judah nam ah mi chun Mosi kiang ah Lalpa’n thu a piak zosia chu a bawl suak kêi a;
23ama chu Oholiab, Ahisamak chapa, Dan nam ah mi, suang sunpa, mi khutthiam, puan malngat, a dum, a sandup leh a sandâng leh puan malngat chitin jem bawlpa chunle a kithuapi a.
24Mun thiangtho â ding ah a poimawna zosia bawlna ding ah sana kimang zosia, mipite hung piak khawm kimang cheng chu talent sawmni leh kua tawh, mun thiangtho te’na dan dungzui ah shekel za sagi leh sawmthum ahi.
25 #
Pdt 30.11-16
Mipi lak ah kisim khawm zosiate dangka thik hun piak khawm kimang zo cheng chu talent za khat tawh, mun thiangtho ah te’na dungzui ah shekel sang khat za sagi sawmsagi leh nga ahi;
26 #
Mat 17.24
Kum sawmni ah kipat a chung lam, mi tin kisimna pang zosia chu nuai guk sang thum za nga leh sawmngate chu mun thiangtho ah shekel a piak sek gual ua tiam in beka khat chiat (zia beka khat chu shekel kimkhat tawh kibang ahi) pia tawhbang a hiu.
27Zia lak ah dangka thik talent za khat chu mun thiangtho khuam kitunna ding ah kikhuak ding leh, a puanjakna khuam kitunna ding ah kikhuakte tunna ding chun a kimang zo ah; khuam kitunna ding ah kikhuak za khat â ding ah chun talent za khat a kimang zo ah, talent khat chiat in a kikhuak pakhat siam ahi.
28Shekel sang khat za sagi sawmsagi leh nga ah chun a khuam ah kuaikâte, a khuam lubawkte sana tui luankhumna ding leh a khuam kaimatna ding jawlte siamna’n le a mang a.
29Chuleh, sum-eng hung kipekhawm zosia chu talent sawmsagi leh shekel sang ni leh za li ahi’n;
30ziate chun biakbûk kotkhak kituana zosia leh sum-eng ah kisiam mâichâm leh sum-eng lên leh mâichâm matchâk ding ûm leh bêl zosia tawh;
31a huang ûmna kisuktuana zosia, a huang kotkhak kituanate, biakbûk hênna ding ah kikhênte zosia tawh a huang ûmna kihênna ding ah kikhên zosia chule a siam hi.
Currently Selected:
PAWTDAWNA THU 38: VAIPBSI
Highlight
Copy
Compare
Share
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
