PAWTDAWNA THU 39
39
Thiampute Kithuamna Ding Puan
(Pdt 28.1-43)
1Chuleh, pat dum, a sandup leh a sandângte mang in mun thiangtho ah thiampu nasêmte kivanna ding ah mêlpha theipen in a siam ah; Aron â dingin zia gual kivanna thiangtho chule a siam a; Mosi kiang ah Lalpa’n thu a piak gual ah khan a bawl a.
2Ama chun thiampu sana puanâk chual chu, pat ngat thuksa, a dum, a sandup leh a sandângte mang in a siam a.
3Sana pêk padik dek in a sek ah, pat ngat thuksa, a dum, a sandup leh a sandângte khutthiam tak in a bawl a.
4A liangko ah puanâk chual kuana ding dâlbak tawhbang siam in, a geite gêl ah suitua dingin a bawl a.
5Zia puanâk chual kawnggâk ding ah chun puan malngat, thiamnêl tak in a ga, a puanâk chual chu tawh kibang ma ma, sana ah kisiam a dum, a sandup leh a sandângte ah kibawl ngen ahi; zia haw zosia chu Mosi kiang ah Lalpa’n thu a piak gual chiat ah khan a bawl a.
6Chun, sana pumphial ah Onik suang umte jemna jam kual vêl kikâl ah te chun, Israel chate min dungzui chiat in min namna gual in a zik a.
7Israel chate min hetzingna hi dingin, zia suang haw chu puanâk chual liangko chung ah chun a koi a; Mosi kiang ah Lalpa’n thu a la piak dungzui tak in a bawl hi.
Thiampu Awmphaw Siamna
(Pdt 28.15-30)
8Chun, awmphaw chule thiampu puanâk chual kisiam dan gual tho ah khan mi khutthiam tak in a bawl gual in sana in, patngat thuksa, a dum, a sandup leh a sandângte’n a siam a.
9Zia chu ning li nei ahi’n; awmphaw chu thua ni ah kisiam ahi; I thep phat leh a dung lam chu khâp khat, a vailamle khâp khat ma ahi.
10Zia chun suang mantamte chu tian li’n a tiang ua. A tian masa pen ah chun karnelian, khrusolit leh emeral suangte a hiu a;
11a tian ni’na chun tarkuois, saphir leh moonston suangte a hiu a;
12a tian thumna chun jakin, agat leh amethis suangte a hiu a;
13a tian li’na chun beril, onik leh jaspar suangte a hiu a; amau chu min namna kijemmawi gual chiat ah bawl ahi.
14Suang mantamte chu Israel chate min tawh kituak in sawm leh ni, a min uh dungzui in bawl ahi; min namna gual in, a nam uh sawm leh nite min chiat chu sut ahi.
15Awmphaw chung ah chun sana thiangtho in pumphial a siam un, khauhual gual in a hêklom un;
16chuleh, sana pumphial pani tawh sana kol pani ma a siam un; zia a kolte chu awmphaw chung lam ningte gêl ah chun a tuau a;
17awmphaw ningte gêl ah kol pani sung ah chun sana pumphial pani chu a thun lut un.
18Pumphial panite mong langkhat chu sana pumphial panite chu tawh a zop mat un; zia chu thiampu puanâkchual ânglam ah dâlbak sung ah chun a thun lut un.
19Sana bil panile a siam un, ziate ni chu awmphaw ningte gêl ah puanâk chual sung lam geichin ah chun a tuau hi.
20Sana bil pani a siam un, ziate ni chu dâlbak kuana malam nuai lam geichin ah, puanâk chual kawnggâk chungchin ah chun a tua kit un.
21Zia awmphaw a kolte ni ah chun puanâk chual bilte ni chu khauhual dum in a khitden un; chutichun, zia puanâk chual kawnggâk chung ah chun a um den theina ding leh awmphaw chule puanâk chual ah kipat chu a kitoldaw theilona dingin: Mosi kiang ah Lalpa’n thu a piak gual in bawl hi.
Thiampu Kithuamna Dang Siamna
(Pdt 28.31-43)
22Chun, thiampu puanâk chual, pat dum ngen ah kigat in a siam a;
23a puanâk chual âng lai tak chu puanâk bânbei ângkêk gual in a bawl ah, a kêkthenlona dingin a kîm a.
24A puanâk chual mong lam ah chun theibufaiga mûk pal gual in, patngat, thuksa, a dum, a sandup leh a sandângte ngen in a siam hi.
25A puan mong gei jul ah theibufai ga lim umna kikâl ah chun sana telneng a kîmvêl in a koi hi;
26telneng pakhat tawh theibufaiga khat chiat kikâlhel in biakbûk ah ho’na nasepna ding puanâk chual gei kîmvêl ah chun a bawl ah; Mosi kiang ah Lalpa’n thu a piak gual ah khan a bawl tau a.
27Chun, Aron tawh a cha pawsalte â ding puanâkle puan malngat kigat in a bawl un;
28puan malngat tak ah kisiam thiampu lukhuk ding, puan malngat tak ah kisiam dialkop ding, puanmalngat thuksa ah kisiam tawka nuai dingte le a siam un;
29puan malngat thuksa, a dum, a sandup leh a sandângte mang ah puanjem pha tak ah kikhui thaw kawnggâk dingle; Mosi kiang ah Lalpa’n thu a piak gual ah khan a bawl un.
30Chuleh, lukhuk thiangtho â ding ah sana thiang ah kibawl pek khat a siam ah, a pêk ah chun min namna gual ah lekha nal tak ah, “Lalpa â ding ah Thiangtho,” kizik le a um a.
31Thiampu lukhuk chung lam ah kândenna dingin patkhau dum khat in a khit ua; Mosi kiang ah Lalpa’n thu a la piak gual ngei in a bawl hi.
Bawl Ding Zosia Siam Zaw’na
(Pdt 35.10-19)
32Zia gual ah chun kikhopna biakbûk bawlna zosia chu zawthian a hung hita’n; Mosi kiang ah Lalpa’n thu a piak dungzui tak in Israelte’n a bawl tau a.
33Ziaphatchun, Mosi kiang in a biakbûk bawl uh, a puanbûk leh a matchâk ûm leh bêl zosia, a kuaikâte, a khuam kilem khawmte, a jawlte, a khuampite leh a kibulna ding ah kikhuakte tawh;
34a chungkhû ding ah belamchal vun kidianipte leh a khû’na ding ah savun kisiamte leh a puanjakte;
35thuthunna thingkuang jawnna ding molte, ja’ngaina chutpha,
36dawkân leh van matchâk zosiate, umpi zing vaithum,
37thaumei tunna thiangtho ah kikoi thaumeite, a van matchâk zosiate, a tui ding ah thau,
38sana mâichâm, kinu’chi sathau, gimtuite, biakbûk kotkhak ah puanjakte tawh;
39sum-eng mâichâm leh a sum-eng lênte, a jawnna molte leh a van matchâk zosiate, tui kuangpi tawh a tunna pum in;
40a huang ûmna puanjak, a khuamte, a tunna ding ah kikhuakte, a hênna ding ah kikhente pum in; chuleh, kikhopna biakbûk nasep thil bawlna kimang ûm leh bêl zosiate tawh;
41mun thiangtho ah nasepna ding ah kivanna a mêlpha thei pen ah kibawlte, thiampu Aron kivanna ding leh thiampu nasêm ding ah a chapate kivanna dingte tawh pum in a hun pawkhawm un.
42Mosi kiang ah Lalpa’n thu a piak gual chet in Israelte’n bawl ding zosia chu a bawl zo tau a.
43 Lalpa’n thu a piak gual chet in bawl ding zosia chu a bawl zo tau hi ti Mosi’n a mu phât in a maljawl tai.
Currently Selected:
PAWTDAWNA THU 39: VAIPBSI
Highlight
Copy
Compare
Share
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
