PAWTDAWNA THU 40
40
Biakbûk Sakzawna leh Thiansuana
1Mosi kiang Lalpa chun:
2“Tha masa pen, a ni masa pen ah chun kikhopna biakbûk chu la tundaw ding ahi.
3Thuthunna Thingkuang chu In sung ah koi lut in la tin, thingkuang khû ding puanjak chule la jak ding ahi.
4Dawkân chu a sung ah a umna ding dik tak ah chun koi in la tin; thaumei tunna chule a sung in la lut in la tin, a thaumeite chu la det ding ahi.
5Gimtui hâlna ding sana mâichâm chu thuthung thingkuang ma-âng jawn tak ah chun koi inla; chuleh, biakbûk kot ah puanjak ding chule la jak ding ahi.
6Hâlmang kithoina mâichâm chu kikhopna biakbûk puan In kotkhak ma-âng ah chun koi inla,
7tuikuang chu kikhopna biakbûk tawh mâichâm kikâl ah chun koi inla, tui sung in.
8A huang ûmna dâi a kîmvêl in bawl inla, a kotpi lûtna’ a puanjak ding chu khâidok in.
9Ziaphat chuleh, sathau la’n la, biakbûk tawh a sung ah um zosia chu sathaunu’ in; biakbûk tawh a matchâk zosia chu hithiangtho in: tichun, a thiangtho hung hita’n a.
10Hâlmang kithoina mâichâm chule matchâk zosiate chu tawh sathau nu’ inla, mâichâm chu a thiangtho pen a hung hitheina dingin la hi’thiantho ding ahi.
11Tuikuang chule a kengte chu tawh sathaunu’ inla, la hi’thiantho ding ahi.
12Ziazaw chuleh, Aron tawh a chapate chu kikhopna biakbûk kotbul ah chun hun pui inla, amau chu tui in la sil ding ahi;
13Aron chu a kithuamna ding thiangtho in thuam inla, sathaunu’ inla, la hithiantho ding ahi; kei â ding ah thiampu na ei sep piak theina dingin.
14A chapate chule hun pui in la tin, a puanâk chualteu ah chun la thuam ding ahi;
15a pau Aron sathau la nu’ gual ah khan amau chule la nu’ ding ahi; amau inle ka thiampu na ei sep piak theina ding un: Amau sathau nu’ ahi’nau chu a suan zosiau kumtuang thiampu hi’na ding ah sathau nu’na ahiziak in,” ti in.
16 Lalpa’n a kiang ah thu a piak dungzui in Mosi’n a bawl tai.
17A kum ni’na, tha masa pen, zia tha a nimasa pen ni’ chun biakbûk chu tundaw in a hung um tai.
18Mosi’n biakbûk chu a hun tungdok ta’n: A khuam kituana dingte chu a phut ah, zia chun a khuamte a bul ah, a jawlte a thun ah, a khuamte chu a tungding tai;
19Mosi kiang ah Lalpa’n thu a piak dungzui in, puanbûk chu biakbûk chung ah chun a jak ah, a puanbûk khû’na chu a chung in a koi tai.
20Thuthung zikna suangte chu a la’n, thuthung thingkuang sung ah chun a koi ah, thuthung thingkuang jawnna ding molte chule a thun ah; ja’ngaina chutpha le a chung in a koi a;
21Mosi kiang ah Lalpa’n thu a piak dungzui in, thuthung thingkuang chu biakbûk sung ah chun a paw lut ah; a lia dingin puan a jak ah, thuthung koina thingkuang chu a khû hi.
22Dawkân chu kikhopna biakbûk sung ah, biakbûk mallam kâi ah, puanjak pawlam ah chun a koilut a;
23Mosi kiang ah Lalpa’n thu a piak gual tak in, Lalpa âng ah dawkân chung ah chun vaithumte chu a um ding gual tak in a koi a.
24Thaumei tunna chu kikhopna biakbûk sung ah, biakbûk simlam kâi ah, dawkân mai jawn tak ah chun a koi a,
25Mosi kiang ah Lalpa’n thu a piak gual in, Lalpa âng ah chun thaumeite chu a deta’n.
26Sana mâichâm chu kikhopna biakbûk sung ah puanjak pawlam ah chun a koi a,
27Mosi kiang ah Lalpa’n thu a piak gual in, a chung ah chun gimtui a hâl tai.
28Biakbûk kotkhak ah jak ding puanjak chule a jak ta’n.
29Mosi kiang ah Lalpa’n thu a piak gual in, hâlmang thillatna mâichâm chu kikhopna biakbûk kotbul ah chun a koi ah, a chung in hâlmang thillat leh thâiga thillatte chu a hâl tai.
30Tuikuang chule kikhopna biakbûk tawh mâichâm kikâl ah chun a koi ah, kisilna dingin tui a koi a,
31zia tak ah tui chun Mosi tawh, Aron tawh a chapate’n a khut leh kengteu chu a sil un.
32Mosi kiang ah Lalpa’n thu a piak dungzui in, kikhopna biakbûk sung ah a lut ua, mâichâm a nai phat si’n ua leh a kisil sek ui.
33Biakbûk leh mâichâm kîmvêl ah chun a huang ding a bawl ah; a huang ah lutna ding kot ah chun puan a jak ah. Tichun, Mosi’n bawl ding zosia chu a bawl zo suak tai.
Biakbûk Chung ah Lalpa Lopina Sûmpi
(Kis 9.15-23)
34 #
1 Le 8.10,11; Isa 6.4; Ezk 43.4,5; Tpn 15.8 Ziazaw chun, kikhopna biakbûk chu sûmpi’n a hun khû ta’n; tichun, Lalpa lopina chun biakbûk chu a hun lua dim tai.
35Sûmpi’n a chup zing ziak leh, Lalpa lopina’n biakbûk chu a lua dim zing ziakin, Mosi chu kikhopna In sung in a lût thei ta puai.
36Biakbûk chung jawn ah sûmpi chu lâk to ah a hung um phat leh Israelte’n a khualzinnau ma lam zuan in a kipandok kit sek ui;
37ahi’n la, sûmpi chu lak to ah a um masangsia chu kichawn lo in a um den mai sek ui.
38Biakbûk chung ah Lalpa, sûn ah sûmpi leh jan ah meikuang ah um zing chu Israel chate zosia’n a khualzin sungsiau a mu zing ui.
Currently Selected:
PAWTDAWNA THU 40: VAIPBSI
Highlight
Copy
Compare
Share
Want to have your highlights saved across all your devices? Sign up or sign in
Vaiphei CL Bible - PATHIAN LEKHABU THIANGTHO
Copyright © 2014 by The Bible Society of India
Used by permission. All rights reserved worldwide.
