JOHAN 16

1“Na kipalpua louna dingun tam thute na kung ua ka gen ahi. 2Kikhopna innte akipat ahing notdoh ding ua, ahi, noute hing that pouma, Pasian nasem hoi a akingaituo hun uh, hing tung ding ahi. 3Tualeh tam silte na tung uah abawl ding uhi, amaun Pa lah theilou, Kei lah hing theilou ahizieh un. 4Hinanleh ahun ahing tun chienga, tam thute ka hing hilta chi na theidoh na ding ua, amauh tungtang ka hing hil masah ahi. “Na kung ua ka um nahlai ziehin, tam thute achiil in na kung uah ka gen sih hi. 5Hinanleh tu in Kei ahing sawlpa kunga pei ding ka hita, Koima’n hei a pei ding na hiei? chiin na hing dong sih uhi. 6Hinanleh tam thute na kung ua ka gen ziehin, na lungtang uh lunggimna in na dimta uhi.

Hagau Siengthou nasepte

7Ahivang in thutah ka hing hil ahi. Ka peimang ding nou a dingin ahoizaw hi; aziehpen ka peimang sihleh, Hamuonpa na kung uah, ahing pei sih ding hi. Hinanleh ka peimang leh na kung uah Ama ka hing sawl ding hi. 8Ama ahing tun chiengin, khelna thu ahte, dihtatna thu ahte, tualeh vaihawmna thu ahte, leitung asiemlou dan atheisah ding hi. 9Khelna thu ah siemlou atangsah ding, kei ahing gintat lou zieh un. 10Dihtatna thu ah, siemlou atangsah ding, Kei ka Pa kunga pei a, na hing mu nawnlou ding zieh un. 11Vaihawmna thu ah, siemlou atangsah ding, tam leitung vaihawmpa thukhen pieh a aum tah ziehin.

12“Na kung uah thu gen ding tampi ka nei nalai hi, hinanleh tuin na theisiem nai sih ding uhi. 13Bangtenghitaleh thutah Hagau ahing tun chiengin, thutah zousie ah noute ahing puilut ding; aziehpen Ama thuneina in bangma agen sih dinga, hinanleh azah pouma agen zaw ding hi; tualeh sil hing tung dingte noute ahing hil ding hi. 14Aman kei ahing pahtawi dinga, Keima ate ala dinga, noute ahing hil ding hi. 15Pa sil nei zousie kei a ahia, Tuaziehin Hagau in Keima ate ala dinga, noute ahing hil ding, kachi ahi.

Jesu’n ashina ding leh athawkiana ding agenna

16“Hun tomnoukhat nua chiengin nouten na hing mu nawn sih ding ua, tualeh hun tomnoukhat nua chiengin na hing mukia ding uhi; Pa kunga pei ding ka hizieh in.” 17Tuachi’n Anuazuite pawlkhat in, “Hun tomnoukhat nua chiengin nouten na hing mu nawn sih ding ua, tualeh hun tomnoukhat nua chiengin na hing mu kia ding uh, Pa kunga pei ding ka hiziehin, ikunga achi khu bang achina adiei?” akichi uhi. 18Tuaziehin amaun, “Tam athugen, Tomnoukhat nua chiengin, achi bang achina adiei?” Ithei sih uhi, akichi uhi.

19Tuachi’n Ama adong nuom uh chi Jesu’n athei a, akung uah, “Hun tomnoukhat nuachiengin na hing mu nawn sih ding ua, tualeh hun tomnoukhat nuachieng in na hing mu kia ding uh, chia ka gen, kidongtuo hi uteh maw? 20Chitahtah vawt in ka hing hil ahi, noute na kap ding ua, na mau ding uh, hinanleh leitung akipah ding; noute na lunggim ding ua, hinanleh na lunggimna uh kipahna asuoh ding hi. 21Numei, anau suoh hun atun chiengin, nauvei in gimgentheina athuoh a, hinanleh anau asuoh zou tah chiengin, tua agentheinate aphawh kha nawn sih hi, leitunga mihing khat hing pieng kipahna ziehin. 22Tuaziehin nouten zong tuin lunggimna na nei uhi, Hinanleh noute ka hing mu kia dinga, na kipah mama ta ding uhi, tualeh na kipahna uh koiman ahing lahpieh sih ding hi. 23Tua ni chiengin nouten bangma na hing ngen sih ding uhi. Chitahtahin ka hing hil ahi, ka min a Pa kunga na nget pouma uh, Aman noute ahing pe ding. 24Tutanin Ka min in bangma na ngen nai sih uh; ngen un na mu ding uh, na kipahna uh abukimna dingin.

25“Tam thute na kung uah gentena in ka gen hi; hinanleh gentena thu a na kung ua ka gen nawn louna hun hing tung ding ahita; Pa tungtang thu chientah in ka hing hilta ding hi. 26Tua hun chiengin ka min in na ngenta ding ua; Noute a dingin, Pa kungah hing nget pieh vang ka china ahisih hi. 27Aziehpen nouten Kei na hing it ua, Pasian akipat a hing pei ka hi chi na gintat zieh un, Pa mama in noute ahing it hi. 28Kei Pa a kipat a hing pawt a, leitunga hing pei ka hi; tualeh leitung nuasie a Pa kunga pei kia ding ka hi,” achi hi.

29Anuazuiten akungah, “Ngai vawi, tuin vang gentethuin na hem gen sih a, kichientahin na genta hi. 30Tuin vang Nang bangkim na thei a, koiman ahing doh na kiphamaw sih chi ka theita uhi. Tami zieh in Pasian a kipat a hing pei na hi, chi ka gingta uhi,” achi uhi.

31Jesu’n amaute adawnga, “Tuin na gingta khong khongta u’maw? 32Ngai un, ahun hing tung ding ahi, tuin zong atungta hi, michin na inn chiet uah na kithethang ding ua, keimatangin na hing nuasie ding uhi, ahivangin Keimatangin ka um sih hi, ka Pa’n ahing umpi ziehin. 33Keima a hamuonna na nei theina dingun, tam thute na kung ua ka gen ahi. Leitungah gim gentheina na thuoh ding uhi; hinanleh kipah thanuom in um un, Ken leitung ka zouta hi,” achi hi.

Currently Selected:

JOHAN 16: ZOUBSI

Highlight

Copy