JOHAN 17
17
Jesu thungetna
1Jesu’n tam thute agen zouin, vanlam ngain adahtou a; “Pa aw ahun atungta, Na Tapa pahtawi in, na Tapa in zong Nang ahing pahtawi theina dingin. 2Nangman Ama kunga na pieh poumate kumtawn hinna apieh theina dinga, mi zousie tunga thuneina na pieh bangin. 3Tualeh tami ahi kumtawn hinna, Nang Pasian dihtah thei leh na sawl Jesu Khrist athei uh. 4Leitungah Na min ka pahtawita, ka bawl dinga na hing pieh nna ka sem zouta hi. 5Tu in Aw Pa, leitung masanga#Jesu leitung kisiem masanga um zou ahita, Pasian ahina tanah agen chien hi. na kunga ka nei, thupinain nangma kung ngel ah hing pahtawi in.
Jesu anuazuite ding a thu angetna
6“Leitunga kipat a kei nahing piehte kungah, Na min ka theisahta hi; amaute nanga ahi uh, Nang kei na hing pieh ahi, tualeh na thu azuita uhi. 7Tu in Kei na hing pieh silte zousie, Nangma hing kipan ahi chi amauten atheita uhi. 8Aziehpen nangman kei kunga thu na hing pieh zousie, ken amaute ka peta a, amaun zong apomta uhi; tualeh nanga kipat a hing pei tahtah ka hi, chi atheita ua, nangma hing sawl ahi chi agingta ta uhi.
9Amaute dingin ka ngetpieh hi, leitunga dingin ka ngetpieh sih a, Nangman na hing piehte dingin ka ngetpieh zaw hi; amaute nanga ahi ziehun. 10Kei ate zousie nanga ahia, Nang ate zousie Kei a ahi, tualeh amauah pahtawi in ka um hi. 11Tu in Kei leitungah ka um nawn sih dinga, hinanleh tamte pen leitungah aum ding uhi, kei na kunga hing pei ding ka hita, Pa siengthou aw, eigel pumkhat ihi mabanga, amaute zong pumkhat ahi theina dingun, Nangman na hing piehte Na min in kem in. 12#Late. 41.9; Jn. 13.18Nang kei nang piehsa teng toh leitunga ka um khawm sungin na min in amauh ka kem a, Laisiengthou thu atangtun theina dingin, mangthang tapa loungal khatbeeh amangthang sih uhi. 13Tuin na kunga hing pei ding ka hita; tualeh ama ua ka kipahna abukim theina dingin, tam silte leitungah ka gen ahi. 14Na thu amauh ka peta a, leitungin amauh amuda hi; Kei leitunga ka hilou mabanga amauh zong leitunga ahilou zieh un. 15Amauh leitung akipat ladoh dinga hing ngen ka hisih a, hinanleh gitlouna akipat veng dinga ka hing nget ahizaw hi. 16Amauh leitunga ahisih uh, Kei leitunga ka hilou mabangin. 17Na thuin amauh susiengthouin; Na thu thutah ahi. 18Kei leitunga na hing sawl mabangin, ken zong amauh leitungah ka sawl hi. 19Amauh ziehin kei ka kisusiengthou hi, thutah jal a ama u’zong suhsiengthou a a um theina ding un.
Khrist in gingtu zousie a ding a thu angetna
20“Tamte behbeh a dingin ka hing ngen sih a, hinanleh amauh thugenna zieh a, Kei hing gingta dingte a dingin zong ka hing ngen hi. 21Pa aw, Nang keima ah na um a, Kei nangma a ka um banga, amauh zong eima a pumkhat ahitheina dingun, tualeh Nang kei na hing sawl ahi chi leitungin agintat theina ding un. 22Nang leh kei pumkhat ihimabangin, amaute zong pumkhat ahing hitheina dingun, nangman kei na hing pieh thupinate, ken amauh ka peta hi. 23Kei ama uah ka um a, Nang keima ah na um hi; tuachi’n amauh pumkhat a suhbukim a aum theina ding un, tualeh Nang kei na hing sawl a, kei na hing it bangin amauh na itta chi leitung in atheina dingun.
24Pa aw, Nang kei na hing piehte zong ka umna a keima toh um a, Nang Kei nang it man a, leitung kisiem masang peha na hing pieh thupina amaun mu u’leh ka dei hi. 25Pa dihtat aw, leitungin Nang ahing theisih a, hinanleh Ken ka hing thei hi, tualeh nang kei na hing sawl hi chi tam miten zong atheita uhi. 26Tualeh amaute kungah na min ka theisahta a, ka theisah zel ding hi; Kei na hing itna bangbang itna ama ua aum theina leh, kei ama ua ka um theina dingin,” achi hi.
Currently Selected:
JOHAN 17: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.
