JOHAN 18

Jesu mat a aumna

(Mat. 26.47-56; Mak. 14.43-52; Luk. 22.47-53)

1Jesu’n tam thute agen zouin anuazuite toh apawtdoh ua, Kidron luita akan ua, tuanah huon khat aum a, tuanah anuazuite toh alut uhi. 2Tualeh Jesu lebawl a mansahpa Judas in zong tua mun athei hi, aziehpen tua mun khu Jesu’n anuazuite akimupi zelna mun ahi. 3Tuachi’n Judas in siempu liente leh Pharisaite apat in Biehinn veng galkap pawl leh miman lamkaite apui a, thaumeite, meiselte leh hiemleheite tawi in tuanah ahing pei uhi. 4Tuaziehin Jesu’n atunga sil tung ding zousie theiin ava pei a, akung uah, “Koi ahiei na sui uh?” achi hi.

5Amauten adawng ua, “Nazareth Jesu” achi uhi, Jesu’n akung uah, “Kei ka hi,” achi hi. Tualeh amansahpa Judas zong akung uah a ding hi. 6Tuachi’n Jesu’n “Kei ka hi,” achitahin, akinuatawn ua, tuol ah apuata uhi. 7Tuachi’n Jesu’n “Koi ahiei na sui uh?” chi’n adong kia a, amaun “Nazareth Jesu” achi uhi.

8Jesu’n adawnga, “Kei ama ka hi, chi’n ka hing hilta; Tuaziehin Kei hing sui nahi u’leh tam mite pei sah un,” achi hi. 9“Nangman kei na hing piehte khat zong ka mangsah sih hi” chia agen, atangtun theina dingin.

10Tuachi’n Simon Peter in anamsau kuo adohkhie a, siempulian suohpa asat a, abil zietlam asatkhiet pieh hi. Tua suohpa min khu Malkus ahi. 11#Mat. 26.39; Mak. 14.36; Luk. 22.42Jesu’n Peter kungah “Na namsau apai ah sietin, ka pain ahing pieh nou#Nou gimthuohna nou or hai or van. khu dawnlou ding ka hiei mah?” achi hi.

Jesu siempulien Annas mai a adinna

(Mat. 26.69,70; Mak. 14.66,68; Luk. 22.55-57)

12Tuachi’n biehinn veng galkap pawlte leh lamkai vaisaite leh Judaten Jesu aman ua, akaanta uhi. 13Ama Annas kungah apeipi masapen uhi, aziehpen ama tuami kum a siempulien apang Kaiapha sungpa ahi. 14#Jn. 11.49,50Tam Kaiapha khu, mipite taanga mi khat shi ahoizaw hi, chia Judate kung genpa ahi.

Peter in Jesu akilepsanna

15Tualeh Simon Peter in Jesu nua azui a, tuamabangin nuazui dang khat in zong azui hi. Tua nuazuipa khu siempulien in amelthei ahia, siempulien inn huong sungah Jesu toh alut khawm uhi. 16Hinanleh Peter khu pulam ah kotpi bul ah ading hi. Nuazui khatpen siempulien meltheipa khu ava pawt a, kotpi ngahnu ahoupi a, Peter a hing puilut hi. 17Kotpi ngah nungahnu’n Peter kungah, “Nang zong tam mipa nuazuite lah a khat hilou na hiei mah?” achi hi. Aman “Ka hi sih” achi hi. 18Tualeh khuo avot ziehin suohte leh inn huong sung veng lamkaiten meihol tawi in akimkot a dingin akisanglum uhi. Tualeh Peter zong amau’toh ding khawm in mei ah akisanglum hi.

19Tuachi’n siempulien in Jesu kungah, anuazuite tungtang leh athuhilna tungtang adong hi. 20Jesu’n adawnga, “Ken alangtangin leitung thu ka gen a, Judate kikhopna innte leh biehinn ah thu ka hil ngitnget a, asimtham in bangma ka gen sih hi. 21Bangdinga kei hing dong na hiei? Ka thugen zate kung ah dong ve, bangthu ahiei ka gen, amaun athei uhi,” achi hi. 22Tam thute agen zouin, akunga ding, milien khat in akhut peh in Jesu ngeiphe abehpieh a, “Nang siempulien tambangin na dawng ngam vazuou maw?” achi hi. 23Jesu’n adawnga, “Thugilou ka gen leh ka gitlouna hing theisah in, hinanleh thudih ka gen leh bangding a nang beh ahiei?” achi hi. 24Tuachi’n Annas in Ama hentomsain siempulien Kaiapha kungah asawlta hi.

25Simon Peter in dingkawm in mei a awi a, tuaziehin, amaun akung ah, “Nang zong nuazuite lah a khat na hi, na hiei leh?” achi ua, aman theilou khem kipang in “Ka hisih,” achi hi. 26Tuachi’n Peter in abil asatkhietpiehpa sanggam siempulien suohte khat in, “Huon a Ama toh na umkhawm uh ka hing mu ngel hilou amah?” achi hi. 27Peter in akitheimawbawl kia a, tualeh aah akhuong paita hi.

Rom gam uhpipa Pilat masang a Jesu adinna

(Mat. 27.2,11-14; Mak. 15.1-5; Luk. 23.1-5)

28Tuachi’n amauten Kaiapha inn apat in Jesu khu gam uhpipa thukhenna innpi huong sungah apeipita uhi, tua hun khu zingmawng matah ahi. Hinanleh amaute pen thukhenna innpi huong sung ah alut sih uhi, tuachilouin akisubua kha ding ua, Peikaan annkuong anethei sih kha ding uhi. 29Tuachi’n Pilat akung uah ahing pawtkhie a, “Tam mipa na hehna uh bang ahiei?” chi’n adong hi. 30Amaun adawng ua, “Ama silgilou bawl hisih leh na kungah ka hing pekhe sih ding uhi,” achi uhi. 31Tuachi’n Pilat in akung uah, “Ama peipi unlen, nouma dan toh kituohin atungah thukhenta un,” achi hi. Judaten akungah, “Kou a dingin mi ka thalup ding uh dan ahi sih hi,” achi uhi. 32#Jn. 3.14; 12.32Tami khu bangchibanga shi ding ahiei, chi Jesu mama in agensa atangtun theina ding ahi.

33Tuachi’n Pilat thukhenna inn sung ah alut kia a, Jesu ahan a, akungah, “Judate kumpipa na hiei?” achi hi. 34Jesu’n adawnga, “Tuakhu nang lungsim a hing suoh a na gen ahiei? ahisihleh midangin ka tungtang thu a ahing hil sawn ahiei?” achi hi. 35Pilat in adawnga, “Kei Juda mi ka hiei mah? Na china nampite leh siempulienten nang ka kungah ahing piehkhie uhi; bang na bawla ahiei?” achi hi. 36Jesu’n adawnga, “Ka leenggam pen tam leitung ahi sih hi. Ka leenggam pen tam leitung toh kisai hitaleh, Judate khuta piehkhiet ka hilouna dingin ka suohte’n adou ding uhi. Hinanleh ka leenggam pen tam leitung ahisih hi,” achi hi.

37Tuaziehin Pilat in akungah; “Ahileh kumpi na hiei leh?” achi hi. Jesu’n adawnga, “Kumpipa nang chi nachi dih hi. Tami ding mawnga pieng ka hi a, tualeh thutah theipi dinga leitunga hing pei ka hi. Koipou thutah a um poumain ka aw aza uhi,” achi hi. 38Pilat in akungah “Thutah bang ahiei?” achi hi. Aman tam thu agen zouin, Judate kungah ava pawtkhe kia a, akung uah, “Ama ah khelna ka mu sih hi, achi hi. 39Hinanleh peikan pawi hun a henta khat ka hing ha pieh ding ahi chi tawndan khat na nei uhi; tuaziehin Judate kumpipa hing hadoh pieh leng na ut uoi?” achi hi. 40Tuachi’n abawnpi un akikou kia ua, “Tam mipa hilouin Baraba ahi nang ha zawh ding,” achi uhi. Baraba pen Suomhat ahi.

Currently Selected:

JOHAN 18: ZOUBSI

Highlight

Copy