Mwanzo 33
33
Kusimanana ka Ezau na Yankubu
1Basi Yankubu na kwefya maso kammona Ezau akisengereza karibu ya wanu miya nne ware. Noparepare akiwawanya wanawe ware akimpa Leya wake na Rakeli wake pamoja na ware watumisi wawiri. 2Watumisi waka ware, pamoja na wana wawo akiwatula mbere, ikisa akifulata Leya na wanawe na nyuma akintula Rakeli na mwanawe Yusufu. 3Ikisa iye mwanyewe akilongorera mbere yawo, akenenda kábula sanafika ka nyenyeye kure kasujudi pansi mara saba.
4Basi Ezau akintuwirira nduye ire akimwirukira akimpatika nsingo na akimpa beju, piya wó-wawiri wakigwirirana kurira kwa radi. 5Ezau na kwefya maso panang'anize kawawona wanawaka ware pamoja na wana wawo akindairi: “Ewa wananizo?” Yankubu akinjibu: “Ewa ndi wana wesusiriwe kitumisi wako na Mwenyezimungu mwanyewe.” 6Sambi wajakazi wake waka ware wakisengereza nokure pamoja na wana wawo wakisujudi. 7Akija Leya pamoja na wanawe newo novyo wakisujudi. Mwinsho akija Rakeli na Yusufu newo wó-wawiri wakisujudi. 8Ezau kandairi tena: “Kundi ra mifuwo ra nisimane nawo munjira rire mana ake kinani?” Yankubu akinjibu: “Kwa eyo mifuwo-yo, nikitumaini fadili kwako kunipokerera kwa wema.” 9Falakini Ezau akisema: “Nanawo mali mengi awenye a kutosha, nduyangu. Cako conse ikala nawo mwanyewe.” 10Falakini Yankubu akinkenekezera: “Sisaka javyo! Kamba úsaka kunipokerera, tenda fadili ukubali zawadi yangu, paniludire kuwona uso wako, niwa kamba niwonire uso wa Mwenyezimungu mwanyewe, kwa kunipokerera vyema. 11Basi, nukulebela kubali kupokerera zawadi yanukupere-yo, kwa sababu anta nomi novyo Mwenyezimungu kanijanliya, nanawo mali mengi awenye, acipo cakunitowa.” Yankubu akinkenekezera mpaka Ezau akikubali.
12Ezau akamba: “Sambi omi nisaka tuke wo-wawiri tilongozane nipite nukukolotera njira.” 13Yankubu akijibu: “Falakini mukwijiwa sana-sana kuwa wasimana-wa wasokera-sokeranga, na inibidi niwawaze makondoo na ng'ombe wari na wana watoto-watoto. Tikiwenendesa ka upesi, anta iwe suku moja, piya ng'ombe zínifwira. 14Fadari ulongorere omi nukufulate more-more, nikifulata mwendo wa mifuwo-yi pamoja na wasimana-wa, mpaka patisaka kufika Seiri.”
15Ezau akamba: “Basi nase nukwasire wanu wangu-wa aba.” Akamba: “Nyenye, wa kinani nowa kunasira? Vitosha kunipokerera ka wema.” 16Basi Ezau akitwala njira, akiludira Seiri. 17Falakini Yankubu akúka Sukoti, nokurekure akijenga nyumba yake, na vitundu vya manyama wake. Ndi ntamana mahala pare pakibaki na zina ra Sukoti#33:17 Sukoti mana ake “kitundu”..
Yankubu afika Shekemu
18Mwinsho ya safari yake ya kuludi Mezopotamiya, Yankubu kafika salama kwa kuvuka kaya ya Shekemu, inti ya Kanaa, akimanga mbere ya kaya. 19Uweru wamagire akitenga ema yake, akiuza mmakono mwa wana wa Shekemu, ujukulu wa Hamori isabu ya “pesa” miya#33:19 Atijiwa faida ya “pesa” moja., 20na noparepare akijenga uralu wakocera nyama za kafara ya Mwenyezimungu Mola wa Iziraeli.
Currently Selected:
Mwanzo 33: wmwBI
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
