Mwanzo 39
39
Yusufu na muka wa Potifa
1Yusufu, wakija naye mpaka Miswiri. Sambi, Potifa nkulungwa wa manakola wa Firyauna nfalume wa Miswiri, akimuza Yusufu mmakono mwa wanu wa rikolo ra Sumaila wajire naye nkaya mure. 2Novyo-sivyo, Mola ákiwa pamoja na Yusufu. Iye ákiwa mwananlume wa kusitawi sana-sana, na Miswiri kure ákikala nnyumba mwa ntwawe, mwenye Potifa. 3Potifa, pawonire kuwa Mola kawa pamoja na Yusufu na piya vyaakitenda vikinlawira sana mmakono mwake kwa sababu ya Mola wetu, 4akitenda radi pakulu pawenye. Basi, akintula kunkorera kazi yake, akimpa piya nyumba yake, na vinu vyake piya vyaákiwa nawo akimpa kusunga Yusufu. 5Sambi iwa javi: Tangu wakati wagabiziwe nyumba ya Potifa ire Yusufu, pamoja na piya vinu vyaampere vire, Mola akijanliya nyumba ya Potifa ire kwa kupendiwa ka Yusufu. Kujanliya kanjanliye Mola kúkiwa ka piya vinu vyaawere navyo ukaya mpaka na masamba kwake piya. 6Ntamana, Potifa vyawere navyo piya kangabizi Yusufu mmakono mwake, iye aakiwa na shuguli ya kinu cisaka kuwa conse, ila cakurya cake iye tu basi. Na Yusufu ákiwa munu mwema na kasitawi pakulu futi umbo wake.
7Mwinsho ya kukuna piya vire, muka wa mwenye wake kannang'aniza Yusufu, akajibiwa naye, akimwambira javi: “Uwe! Újuzi ulare nomi-pa.” 8Yusufu akikatala, akimwambira muka wa mwenye wake ire akamba: “Ngawona! Anta mwenye aashugulika na vinu viripo nnyumba-mu. Piya vinu vyaari nawo viwa mmakono mwangu. 9Aapo munu wa kunizaidi omi nnyumba-mu na hapana caanifísire anta kimoja, ila uwe-po, kamana uwe kuwa nkawake. Nisaka kukidiri mwaja kutenda kitendo kikulu kamba eci? Sipata dambi ka Mwenyezimungu?” 10Basi iwa daima usemi moja noure, mwanamuka ire akimwambira Yusufu na iye sasaka kusikiriza usemi wake kulala naye.
11Sambi suku moja, Yusufu kaja nnyumba mure kutenda kazi yake yaátendanga daima, na wákazi wengine piya awáwerepo nnyumba mure. 12Basi muka wa Potifa ire akikola anzu ya Yusufu, akimwambira: “Uwe újuzi ulare nomi-pa!” Iye akivula anzu ire akimwasira mmakono mwake, akituwa akilawira panja! 13Wakati wankori iye kavula anzu ire kamwásira, mwanamuka ire akiweta wanu wákikalanga nnyumba mure ware akiwambira javi: 14“Ngawonani nlume wangu kaja naye eyu Mwebraniya-yu kutisezera ofwe-pa basi. Kanijirira ásaka alare nnomi, fala omi nibiya lukuto. 15Iye wakati wanisikire nikibiya lukuto, kasa anzu yake, katuwa kalawira panja!” 16Basi mwanamuka ire akitula anzu ire mpaka nlume wake akiludi.
17Wakati waaludire nlumake, muka ire kanza kumwereza noure usemi ure akamba: “Cakazi Mwebraniya-yu wautijisire pakaya-pa-yu, kaja kutisezera ofwe basi, kanisezera-pa mpaka nibiya lukuto. 18Wakati wanibiye lukuto, iye kavula anzu yake kanasira katuwa kalawira panja.”
19Basi mwenye ire wakati wasikire usemi wasowere nkawake ure, akamba: “Epa ntwana wangu ndi vyanikunishe javi!” Mwenye ire akikimiwa. 20Potifa ntwawe Yusufu akamuru atwariwe Yusufu, atayiwe nkalaboshu, mahala mwawafungíriwe maperezu wengine wa nfalume. 21Falakini nkalaboshu nomuremure, Mola wetu aanriware Yusufu, kazidi kumpa rehema na baraka ya kupatana naye nkulungwa wa kalaboshu ire. 22Nkulungwa wa kalaboshu ire, kawatwala maperezu piya kangabizi Yusufu na piya kazi zikitendiwa, Yusufu ndi akisema kuwa zitendiwe ezi kazi-zi. 23Nkulungwa wa kalaboshu ire, aakishugulika kunang'aniza kazi zangabizire Yusufu, konta Mola ákiwa pamoja na Yusufu na kila cakitenda conse cikinlawira sana.
Currently Selected:
Mwanzo 39: wmwBI
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
