Luka 7
7
Uneki u ka̱ɗu u jagaba vo osoji
(Mat. 8:5-13; Yah. 4:43-54)
1Ayin a na Yesu u kotsoi kudansa ili i nam pa ra̱ka̱ a atsuvu a uma, ɗa u uwai a Kafarnahum. 2Jagaba† vo osoji vu Roma vi yoku wi ta̱ ɗe n kagbashi ka na u laꞋi n kuciga. Ɗa ka yaꞋin mɓa̱la̱ ali ɗevu n ukpa̱. 3Jagaba va u panai ukuna u Yesu. Ɗa u suki nkoshi ma Ayahuda n yoku wa̱ ni, m bana n dana yi u ta̱wa̱ a kpaꞋa ku ni u potsokpoko yi kagbashi. 4Ana a yawai wa̱ ni, ɗa o folonoi ni n utsura, “U gaꞋan ta̱ vu bana vi yaꞋanka yi nannai. 5Adama a na u ciga ta̱ iɗika i tsu, ali ɗa u maꞋi kunu ka avasa ku tsu.” 6Ɗa ta na u banai n ele.
A̱yi wi daꞋin m kpaꞋa ku vuzagbayin ka ba, ana u suki a̱ja̱Ꞌa̱ a̱ ni a bana a dana yi tsu nam pa, “Vuzagbayin, ka̱ta̱ vu takacika ka̱ci ka̱ nu ba. N yawa m banka wu a̱ ka̱va̱li ka kpaꞋa ka̱ va̱ ba. 7I ɗaɗa i zuwai ɗa n ɗikai ka̱ci ka̱ va̱ vuza ba, ali m kpa̱ɗa̱i kuta̱wa̱ wa̱ nu. Avu dansa koci, kagbashi ka̱ va̱ ki ta̱ o kupotso. 8Mpa feu mi ta̱ a̱ ka̱ca̱pa̱ ka vuza, mi ta̱ kpamu n osoji a na i ka̱ca̱pa̱ ka̱ va̱. N dana baci vuza nam pa, ‘Wala!’, ka̱ta̱ ta na u wala. A̱yi na kpamu, ‘Ta̱wa̱!’, ka̱ta̱ u ta̱wa̱. N tsu dana ta̱ kagbashi ka̱ va̱, ‘YaꞋan na!’, ka̱ta̱ ta na u yaꞋan i ɗa.”
9Ana Yesu u panai nannai, ɗa u yaꞋin mereve, ɗa u kpatalai ɗa wi indai koɓolo ka uma ka, ɗa u danai, “N dana ɗa̱, ka̱ta̱ n saꞋwa kene uneki u ka̱ɗu tsu nan lo ko a̱ ubuta̱ wi Israila ba.” 10Ɗa ta na a̱ja̱Ꞌa̱ a o bonoi a cinai kagbashi ka wana ɗai u potso.
Yesu u ɗengusa̱i maku ma na ma̱ kuwa̱i
11M megeshe mo yoku kpamu, ɗa Yesu u banai a̱ likuci i na e ci ɗeke Nayin. Mukumitoni n ni n ka̱bunda̱i ka uma kpamu a banai n a̱yi. 12A̱yi a kuyawa a̱ utsutsu u likuci wa, ɗa u gasai n keven ka maku mo kolobo ka na a ɗikai. A̱na̱ku a̱ ni kpamu vali vi ni vu kuwa̱ ta̱, ma ɗaɗa yi ta na endeꞋen. Ka̱bunda̱i ka uma ka̱ likuci ka ki ta̱ koɓolo n a̱yi. 13Ana Vuzagbayin we enei ni, ɗa asuvayali a̱ ka̱na̱i ni n vuka va, ɗa u danai, “Ka̱ta̱ vi shika̱ ba.”
14Ɗaɗa u banai u saꞋwai kajiba ka na a ɗikakai keven ka, aza a na kpamu i ucanuki n kaꞋa a shamgbai bini. U danai, “Maku ma̱ va̱, mi ta̱ a ku dana wu, ɗenga̱!” 15Keven ka ka̱ ɗenga̱i ka̱ da̱sa̱ngi, ɗa u ka̱na̱i kadanshi. Ɗa Yesu u nekei ni wa̱ a̱na̱ku.
16Ra̱ka̱ vi le a panai wovon, ɗa a cikpai Ka̱shile, a danai, “Keneki ka gbayin ka̱ ta̱wa̱ ta̱ wa̱ tsu. Ka̱shile ka̱ ta̱wa̱ ta̱ kuɓa̱nka̱ uma a̱ ni.” 17Arabali a ili i na Yesu u yaꞋin na a̱ ka̱ra̱Ꞌa̱ ta̱ Yahuda dem n likuci i na yi lo a ukambu ra̱ka̱.
Yesu n Yahaya vu Kusumbu ka Akucina
(Mat. 11:2-19)
18Mukumitoni n Yahaya† n danai ni ukuna wi ili i nam pa dem. U ɗekei aza e re, 19u suki le u Vuzagbayin e ece yi, “Avu ɗa vuza na u kuta̱wa̱ va, ko tsu vana vuza yoku kpamu?”
20Ana uma a a yawai u Yesu, ɗa a danai, “Yahaya Vuza vu Kusumbu ka Akucina u suku tsu ta̱ ce ece wu, ‘Avu ɗa vuza na u kuta̱wa̱ va, ko tsu vana vuza yoku kpamu?’ ”
21A ayin a nan lo a ɗa, Yesu u potsokpoi uma n a̱bunda̱i nu mbanaki kakau, n u lokoi wunla̱i u gbani-gbani, n u paɗukpai a̱yimba̱. 22Ɗa wu ushuki aza a na u suki va, “Banai i dana Yahaya ili i na ye enei ɗa kpamu i panai: A̱yimba̱ e enei, nkutsuma̱ n walai, nkutu feu m potsoi, agulani dem a panai, a̱kpisa̱ a̱ ɗenga̱i n wuma, kadanshi ka̱ Ka̱shile ka yawai wa aza a unambi. 23Una̱singai u ɗa a kubana u vuza na u ta̱ɗa̱tsa̱i adama a̱ va̱ ba.”
24Ana aza a usuki a lazai, Yesu u ka̱na̱i kuyaꞋanka ka̱bunda̱i ka uma ka kadanshi ka Yahaya, “Yi ɗa̱i i banai a kakamba kene? Burugu vu na wunla̱i wi a̱ kugba̱ɗa̱sa̱? 25Nannai ɗa baci ba, yi ɗa̱i yu uta̱i kene? Vuza na u ukai aminya a singai? Aza a na i n aminya e ikebe, ka̱ta̱ o yongo a kupana uyoꞋo, a ci cina le ta̱ e kefeku ko tsugono. 26Amma yi ɗa̱i yu uta̱i kene? Keneki? E, n dana ɗa̱, u laꞋa ta̱ keneki. 27Na va ɗaɗa uteku u na a ɗanai a Katagarda ka Ciɗa adama a̱ ni,
‘Mi ta̱ a̱ kusuku vuza kelime ka̱ nu, vuza na u kufoɓusoko wu uye.’#Mal. 3:1. 28N dana ɗa̱ a umaci u vuma dem, babu vuza na u laꞋi Yahaya. Amma vuza na wi kenu o tsugono tsu Ka̱shile, u laꞋa yi ta̱ biꞋi.”
29(Uma ra̱ka̱, ali ishi a utafu, ana a panai kadanshi ke Yesu, ɗa e yevei an kadanshi ka̱ Ka̱shile ka gaꞋin adama a na Yahaya va u yaꞋanka le ta̱ kusumbu ka akucina. 30Amma Afarishi n eyevi a̱ Wila̱ o yoku a iwain ili i na Ka̱shile ka cigai adama e le, adama a na a iwain kusumbu ka akucina ku Yahaya.)
31Yesu u doku u danai, “N iya̱n i ɗai n kugisanku uma o gogo na a nam pa? Yi ɗa̱i o yotsoi? 32I ta̱ adanshi muku n ɗa a̱ ida̱shi e kuden e meɗekenei tsu nam pa:
‘Ci liꞋa̱ka̱i ɗa̱ vishari, amma i jeꞋe ba.
Ci yaꞋankai ɗa̱ vishipa vu kpalu, amma i shika̱ ba.’
33Yahaya Vuza vu Kusumbu ka Akucina u ta̱wa̱i, amma u takuma burodi ba, u soꞋo kpamu makula ko ma̱ra̱ ba, ɗa i danai, ‘Wi ta̱ n wunla̱i u gbani-gbani.’ 34Mpa Maku ma Vuma n ta̱wa̱ ta̱ kulyaꞋa nu n soꞋi, ɗa kpamu i danai, ‘Vuza vu ulyuwa ɗa, n ka̱ga̱li ka washi. Ka̱ja̱Ꞌa̱ kaꞋa ka ishi utafu n aza a̱ unushi.’ 35Amma uyevi u mayun wi ta̱ o kuyotsongu a̱ ubuta̱ wa aza o kutoni a̱ ni ra̱ka̱.”
Vuka vu tsunki Yesu maniꞋin
36Kafarishi ko yoku, kula ku ni Sima, u banuki Yesu u bana u lyaꞋa ilikulyaꞋa n a̱yi. Ɗa u banai a kpaꞋa ku ni ka, ɗa u da̱sa̱ngi kulyaꞋa. 37Vuka vu unushi vi yoku vi ta̱ lo a̱ likuci ya. Ana u panai Yesu wi ta̱ ɗe a kulyaꞋa ilikulyaꞋa a kpaꞋa ka, ɗa u tuka̱i n kedele ka maniꞋin ma̱ ma̱gula̱ni mi ikebe. 38Ana u shamgbai ɗevu n ene e Yesu a̱ ma̱shi, ɗa kujilya ku ni ku ɗa̱kpa̱i e ene a. Ɗa ta na wu urasai ku ɗa n ka̱nji ka̱ ni, n wo oɓongushi, ɗa u tsungi a ɗa maniꞋin.
39Ana Kafarishi ka ke ene nannai, ɗa u sheshei n ka̱ci ka̱ ni, “Vuma vu nam pa keneki ka baci, u gaꞋan ta̱ u yeve vuza na wi a kusaꞋwa yi. Ka̱ta̱ kpamu u yeve vuka vu unushi vu ɗa.”
40Yesu wu ushuki ni, “Sima, mi ta̱ n ili i na n cigai kudana wu.”
Ɗa u danai, “Dana mu, malum.”
41Ɗa Yesu u danai, “Uma o yoku a ɗa aza e re vuza yoku wi o kutono le ikebe,#7:41 La̱na̱ a kaci ku udani “Ikebe”, punu ɗe ka̱ta̱ vu la̱na̱ “Dinari” a̱ Ubuta̱ wi ili i Kuyeve. vuza te amangatawantawun, vuza ire tamkpamu amangerenkupa. 42Ra̱ka̱ vi le babu vuza na ka̱ta̱ wi n ikebe an wa tsupa yi. Ɗa ta na u ka̱sa̱kpa̱ka̱i le ikebe ya ra̱ka̱. Gogo na, ra̱ka̱ vi le, yayi u kulaꞋa n kuciga yi?”
43Sima wu ushuki, “N ciga ta̱ kudana, vuza na u laꞋi n ikebe ya̱ a̱bunda̱i ɗa a̱ ka̱sa̱kpa̱ka̱i ni.”
Ɗa Yesu u danai, “Vu dansa ta̱ derere.”
44Ɗaɗa u kpatalai u vuka va, ɗa u danai Sima, “Ve ene ta̱ vuka vu nam pa? N ta̱wa̱i a kpaꞋa ku nu, vi neꞋe mu mini ma na n kusaꞋa ene ba, amma u ta̱na̱ta̱ngi ene a̱ va̱ n kujilya ku ni. Ɗa kpamu wu urai a ɗa n ka̱nji. 45Ana vi kya̱sa̱i mu, vo oɓongu mu ba. Amma vuka vu nam pa, n ayin a na n uwai ali n gogo na, u ka̱sa̱kpa̱ koɓongu ene a̱ va̱ ba. 46Vu tsunku mu maniꞋin a kaci ba, amma u tsungu ta̱ maniꞋin ma̱ ma̱gula̱ni e ene a̱ va̱. 47Mayun n dana wu, a̱yi vuza vu unushi ɗa ka̱u, amma a cinukpaka yi ta̱ n u ɗa ra̱ka̱, adama a na u ciga mu ta̱ ka̱u. Amma vuza na baci a cinukpakai kenu, wi ta̱ o kuyotsongu ucigi kenu.”
48Ɗaɗa Yesu u danai vuka va, “A cinukpaka wu ta̱ n unushi u nu.”
49Omoci a na a buwai ɗa a̱ ka̱na̱i mololo uteku u le, “Yayi tamkpamu ali a kucinukpa n unushi u uma?”
50Yesu u danai vuka va, “Uneki u ka̱ɗu u nu wi isa wu ta̱. Wala m ma̱ta̱na̱.”
Currently Selected:
Luka 7: asgNT
Highlight
Share
Copy
Want to have your highlights saved across all your devices? Sign up or sign in
© 2012 Wycliffe Bible Translators, Inc. All rights reserved
