Lucas 5

Jesupa chikꞌora peepida

(Mateo 4.18-22; Marcos 1.16-20)

1Ewari aba Jesús Genesaret Lago ide bainɨ̃ bakꞌãri, eperãarã chokꞌara pꞌĩsua seedachida irumãi, Tachi Akꞌõre Ũraa ũri kꞌiniapa. 2Mãga nɨde Jesupa barco omé unuji to ide. Chipariirãpa ãchi tꞌɨrɨ sɨɨmaa pꞌanajida ipu ide. 3Jesús Simón Pedro barcode bataupꞌeda, iidiji tokꞌesaapai ateemerã. Mãpai ma barcode su–akꞌɨ beeji jarateeitꞌee. 4Jaratee aupakꞌãri, Simonmaa mãgaji:

—Nãpɨadee wãdáma mãikꞌaapa jãma pãchi tꞌɨrɨ tꞌaadapáde aji.

5Simonpa pꞌanauji:

—Tachi Jarateepari, tꞌɨrɨ tꞌaamaa ewarijidada aji, maarepida peeda–ee. Mamĩda pɨa jara bairã, tꞌɨrɨ tꞌaanaitꞌeeda aji.

6Mãgá tꞌaadapꞌeda, jira atadakꞌãri, chikꞌora nɨ̃baji tꞌɨrɨ jãde. Perá jẽdachi. 7Mãga unurutata juapa tꞌɨ̃jida apema barco pidaarãmaa kꞌaripa chedamerã. Chejida mãikꞌaapa ma chikꞌora pee aupadakꞌãri, barco omee weda perá pirubaaidachida. 8Mãga unukꞌãri, Simón Pedro Jesús kꞌĩrapite bedabaidachi mãikꞌaapa mãgaji:

—Tachi Waibɨa, mɨ ikꞌaawaapa ãyaa beepáde aji, mɨ pꞌekꞌau ooyaa bairã. Pia–e bɨ pɨ mɨ kꞌaitꞌa bamerã.

9Simón awaraa arii pꞌanadapꞌedaarã ome akꞌɨtrua para beeji mãgá chikꞌo cho–kꞌara peedapꞌedaa perã. 10Aukꞌa pꞌanajida Simón kꞌõpꞌãyoorã, Zebedeo warrarã Santiago Juan ome. Mãpai Jesupa mãgaji Simonmaa:

—Waaweenaapáde aji. Idideepa pɨa eperãarã jɨrɨitꞌee Tachi Akꞌõre–itꞌee, to–ɨapataarãpa chikꞌo jɨrɨpatakꞌa.

11Mãpai barco ipu ide bɨnadapꞌeda, jõmaweda ãchi netꞌaa atabëijida ãchi akꞌõreerã ome mãikꞌaapa wãjida Jesús ome.

Jesupa leprapa kꞌayaa bada jɨpada

(Mateo 8.1-4; Marcos 1.40-45)

12Ewari aba Jesús pꞌuurude nide eperã leprapa kꞌayaa bɨpa ununaji. Jesumaa chepꞌeda, bedabaidachi tau bɨɨrɨ eujãde tꞌõbairumaa mãikꞌaapa chupɨria iidiji:

—Tachi Waibɨa, pɨa kꞌinia bɨ pɨrã, mɨ kꞌayaa wẽpapipáde aji, Akꞌõre kꞌĩrapite pia beemerã.

13Jesupa juapa tꞌõbaiji mãikꞌaapa mãgaji:

—Kꞌinia bɨda aji. Jɨpa beepáde aji.#5.13 Griego pedeede: Wẽpajipɨ.

Aramata chi lepra kꞌayaa wẽpaji. 14Mãpai Jesupa mãgaji:

—Jaranáaji apidaamaa. Jĩpꞌa pꞌaaremaa akꞌɨpináji. Moisepa pꞌãdade jara bɨkꞌa ipana omé atéeji teeitꞌee Tachi Akꞌõremaa. Mãgá jõmaarãpa pɨ jɨpa beeda kꞌawadayada aji.#5.14 Levítico 14.1-7.

15Jesupa mãga jarapachi mĩda, audupɨara pedeepachida irua oodade. Ma awara eperãarã chokꞌaraara cheepurujida iru pedee ũridaitꞌee mãikꞌaapa ãchi kꞌayaa jɨpapidaitꞌee. 16Ma kꞌaurepa Jesús wãpachi eperãarã pꞌanadakꞌaamaa ɨtꞌaa tꞌɨ̃de.

Jesupa chiwa bada jɨpada

(Mateo 9.1-8; Marcos 2.1-12)

17Ewari aba Jesupa jarateemaa bɨ misa, iru kꞌaitꞌa su–akꞌɨ pꞌanajida fariseorã mãikꞌaapa Moisepa pꞌãda jarateepataarã. Che pꞌanajida jõmaweda Galilea eujãdepema pꞌuurudeepa, ichiaba Judea eujãdeepa mãikꞌaapa Jerusalén pꞌuurudeepa. Tachi Akꞌõre baji Jesús ome, kꞌayaa beerã jɨpamerã. 18Mãga nɨde pachejida eperãarã eperã chiwa bɨ ome. Jira aneejida ichi pꞌarude. Tꞌĩu ata kꞌinia pꞌanajida teedaa, Jesús kꞌĩrapite bɨdaitꞌee. 19Mamĩda unudakꞌaa paji sãmãikꞌaapa tꞌĩudai, eperãarã chokꞌara see nɨ̃bada perã. Maperã ɨtꞌɨ́ ateejida terraza ɨ̃rɨ mãikꞌaapa uria ewa atajida. Mãpai ma chiwa bɨ ichi pꞌarude ɨrabai atajida jõmaarã taide Jesús kꞌĩrapite. 20Jesupa kꞌawaakꞌãri ãchia wãara ichide ijãa pꞌanɨ, ma chiwa bɨmaa mãgaji:

—Kꞌõpꞌãyo, pɨa pꞌekꞌau kꞌachia oopata jõmaweda wẽpajipɨ.

21Mãga ũridakꞌãri, Moisepa pꞌãda jarateepataarãpa mãikꞌaapa fariseorãpa kꞌĩsia pꞌaneejida: “Jã eperã nãga pedeeikꞌaraa bɨ. Tachi Akꞌõrepapaita pꞌekꞌau kꞌachia wẽpapipari. Jã eperã Tachi Akꞌõre ãpɨte ikꞌachia pedeemaa bɨ jarakꞌãri ichiata mãgee ne–inaa oopari.”

22Mamĩda Jesupa kꞌawaji ãchia kꞌĩsia pꞌanɨ. Mapa iidiji:

—¿Sãapꞌeda parãpa kꞌĩsia kꞌachia kꞌĩsia pꞌanɨma? aji. 23Mɨa irumaa jarai: “Pɨa pꞌekꞌau kꞌachia oopata wẽpajipɨ” maa–e pɨrã jarai: “Pꞌirabáiji mãikꞌaapa wã́ji”. Mamĩda irua maarepida oo–e pai Tachi Akꞌõrepa oopi–e pɨrã. 24Mɨa akꞌɨpiitꞌee na pꞌekꞌau eujãde mɨ, chi Eperã Akꞌõre Truadepema#5.24 Chi Eperã Akꞌõre Truadepema jara kꞌinia bɨ Tachi Akꞌõre mimiapari na pꞌekꞌau eujãdee cheda. Jesucristopa ichi nãga tꞌɨ̃jaraji akꞌɨpiitꞌee ichi Mesías. kꞌapꞌɨa pari, Tachi Akꞌõre Waibɨapa wẽpapipari eperãarãpa pꞌekꞌau kꞌachia oopata.

Mãpai mãgaji ma eperã chiwa bɨmaa:

—Mɨa jara bɨ: ¡Pꞌirabáiji! Pɨchi pꞌaru atáji mãikꞌaapa wã́ji pɨchi temaa.

25Aramata chiwa bada pꞌirabaidachi jõmaarã taide mãikꞌaapa ichi pꞌaru jẽra bada atapꞌeda, Akꞌõre ome o–ĩa wãji ichi temaa. 26Mãga unudakꞌãri, jõmaweda akꞌɨtrua para beeji mãikꞌaapa o–ĩapa jarapachida Tachi Akꞌõre jõmaarã kꞌãyaara waibɨara bɨ. Mãgá pꞌera pɨkꞌa jõnɨpa mãgajida:

—Idi ne–inaa pia unujidada ajida, Tachi Akꞌõre juapa ooda.

Jesupa Leví jɨrɨtꞌerada ichi ome nipapariimerã

(Mateo 9.9-13; Marcos 2.13-17)

27Tꞌẽepai, Jesús mamãikꞌaapa uchiapꞌeda, ununaji eperã tꞌɨ̃jarapatapꞌedaa Leví.#5.27 Leví ichiaba tꞌɨ̃jarapachida Mateo. Mãgɨ́ Cesar–itꞌee impuesto pꞌepari paji. Su–akꞌɨ baji ma impuesto pꞌepataarã su–akꞌɨ pꞌanapatamãi. Jesupa irumaa mãgaji:

—Mɨ ome nipaparíiji.

28Mãpai Leví pꞌirabaipꞌeda, ichi netꞌaa pꞌe atabëiji mãikꞌaapa wãji Jesús ome.

29Ma tꞌẽepai, Levipa fiesta ooji ichi tede Jesu–itꞌee. Impuesto pꞌepataarã Roma pidaarã rey–itꞌee tꞌɨ̃ pëiji awaraa kꞌõpꞌãyoorã ome. Ma fiesta oo pꞌanɨde Jesús chi kꞌõpꞌãyoorã ome su–akꞌɨ pꞌanajida mesade, nekꞌomaa apemaarã ome. 30Mamĩda fariseorãpa mãikꞌaapa Moisepa pꞌãda jarateepataarãpa kꞌĩsia pꞌanadapꞌedaa perã ãchi chonaarãpa oopatapꞌedaade, aupedeemaa pꞌaneejida Jesús kꞌõpꞌãyoorã ome. Iidijida:

—¿Sãapꞌeda nekꞌomaa pꞌanɨma mãikꞌaapa ne–inaa tomaa pꞌanɨma jãgee impuesto pꞌepataarã ome mãikꞌaapa awaraa pꞌekꞌau kꞌachia oopataarã ome? Parãpa jãga oodaikꞌaraa bɨda ajida.

31Jesupa pꞌanauji:

—Médico pëidakꞌaa kꞌapꞌɨa pia beerãmaa. Jĩpꞌa pëipata kꞌayaa beerãmaa. 32Tachi Akꞌõrepa mɨ pëi–e paji tꞌãri pia beerã jɨrɨde. Ma kꞌãyaara pꞌekꞌau kꞌachia oopataarã jɨrɨdeta pëiji, pꞌekꞌau kꞌachia oo amaadamerã mãikꞌaapa irude ijãapataadamerã.

Sãapai ɨtꞌaa tꞌɨ̃daipia bɨ nekꞌoda–ee

(Mateo 9.14-15; Marcos 2.18-22)

33Jesumaa mãgajida:

—Juan Bautista#5.33 Griego pedeede Bautista jara kꞌinia bɨ chi eperãarã poro choopari. kꞌõpꞌãyoorã mãikꞌaapa fariseorã audú ɨtꞌaa tꞌɨ̃pata nekꞌoda–ee. ¿Sãapꞌeda pɨ kꞌõpꞌãyoorã ichita nekꞌopata mãikꞌaapa ne–inaa topatama? ajida.

34Jesupa pꞌanauji:

—Miakꞌãipata fiestade tꞌɨ̃ pëidapꞌedaarã pachedakꞌãri, ma fiesta o–ĩa oopata chi miakꞌãiitꞌee bɨ ome. Mama pꞌanɨde ¿parãpa nekꞌopida–e paikꞌã aji, ãramaa? 35Ewari cherude chi miakꞌãiitꞌee bɨ wẽ–e pakꞌãri ãra ome, fiesta ooda–e paitꞌee tꞌãri pꞌuapa. Ma ewatepɨ nekꞌoda–e paitꞌee.#5.35 Jesupa mãga jaraji ewari cherude ichi wẽ–e paitꞌee pada perã chi kꞌõpꞌãyoorã ome.

Moisepa pꞌãda mãikꞌaapa Jesucristopa jarateeda aukꞌa akꞌɨdaikꞌaraa bɨ

36Ichiaba Jesupa nãga nepɨrɨji jarateeitꞌee ichi ũraa pꞌoiradaikꞌaraa bɨ Moisepa pꞌãda ome:

—Eperã apidaapa pꞌaru chiwididepema pite aba tꞌɨɨikꞌaraa bɨda aji, pꞌaru sorede parchaaitꞌee. Mãga ooru pɨrã, chi pꞌaru chiwidi ãridariitꞌee mãikꞌaapa ma pite aukꞌa bee–e paitꞌee chi pꞌaru sore ome. 37Ichiaba vino ewaa juda tꞌɨdakꞌaa ne–e sorede. Mãga oodakꞌaa ma vino baakꞌakꞌãri, ma ne–e sore jĩadarii perã mãikꞌaapa chi vino atuadarii perã. 38Maperã vino ewaa juda tꞌɨdaipia bɨ ne–e chiwidide. 39Eperãpa vino chona bɨ tokꞌãri, to kꞌinia–e chi ewaa juda jarapata perã: “Chi chonata warraara bɨda” apata. Mãga pɨkꞌa parãpa chonaarãwedapema ũraa kꞌiniara iru pꞌanɨda aji, mɨa ũraa jaratee bɨ kꞌãyaara.

Currently Selected:

Lucas 5: sjaB

Highlight

Copy