Yohaana 13

Yesu okunaabisa abeegi be ebigyere

1 # Yoh 15:13. Obugyenyi bw'Okuhingurwaho butakahikire, Yesu akamanya ku obunaku bwe buhikire okuruga omu nsi egi kugaruka ahari Ishe. Ku yaakunzire abe ab'omu nsi, yaagumizamu naabakunda okuhitsya aha muheru. 2#Luk 22:3. Ku baabaire nibarya eby'okurya bya nyekiro, Sitaane yaaherize kwosya omutima gwa Yuda Iskaryota, mwene Simooni, kumureebya; 3#Yoh 17:2. na Yesu yaamanyire ngu Ishe amurekuriire byona, kandi ngu akaruga ahari Ruhanga, kandi naagaruka ahari Ruhanga, 4#Luk 12:37; Mat 20:28. yaaruga aha by'okurya, yaajuura eby'okujwara bye, yaakwata ekitambaara, yaakyezirika omunda. 5Yaashuka amaizi aha kinaabiro, yaatandika kunaabisa abeegi be ebigyere n'okubiragarisa ekitambaara eki yaabaire ayezirikiise. 6#1 Pet 5:3. Atyo yaahika ahari Simooni Petero. Petero yaamubuuza ati: Mukama wangye, hoona Iwe kunnabisa ebigyere! 7Yesu yaagarukamu naamugira ati: Eki ndikukora torikukimanya; kwonka oryakimanya bwanyima. 8Petero yaamugira ati: Reka! Torommabosa bogyere ebiro byona. Yesu yaamugarukamu ati: Ku ndaabe ntakunaabiise, nituba tutakikwatanisa. 9Simooni Petero yaamugira ati: Mukama wangye, kyabaire kityo, otannaabisa ebigyere byonka, kureka n'emikono n'omu mutwe. 10Yesu yaamugira ati: Owaayogire, tashemereire kindi kureka okunaaba aha bigyere byonka; ahabw'okuba aba naayera weena; kandi imwe nimwera, kwonka ti mwena. 11#Yoh 6:64, 70, 71. Ahakuba akaba naamanya oraamureebye; nikyo yaagiriire ati: Mwena timurikwera.

12Ku yaaherize kubanaabisa ebigyere, yaajwara ebijwaro bye, yaagaruka omu mwanya gwe, yaababuuza ati: Nimumanya eki naabakorera? 13#Mat 23:8, 10. Muunyeta Omwegyesa kandi Mukama waanyu; kandi eki murikugamba nikyo, ahabw'okuba nikwo ndi. 14#Luk 22:27; 1 Tim 5:10. Mbwenu ku ndaabe naabanaabisa ebigyere, haza ndi Mukama waanyu kandi Omwegyesa waanyu, naimwe kibashemereire kunaabisana ebigyere; 15#1 Pet 2:21. ahakuba naabaha eky'okureeberaho, ngu naimwe mukore nk'oku naabakorera. 16Buzimazima nimbagambira nti: Omuhuuku takira mukama we; kandi n'entumwa tekira ogitumire. 17#Mat 7:24; Yak 1:25. Ku muraabe nimumanya ebyo, muhiiriirwe mwaba nimubikora.

Yesu okugamba orikwenda kumureebya

18 # Zab 41:9. Tindikubagambaho mwena; nimmanya abu naatooraine; kwonka Ekyahandiikirwe kihikiirire ngu, Owaarya aha by'okurya byangye, niwe ambangiire omugyere. 19Nimbagambira eki hati, kitakabaireho, ngu ku kiriba kyabaireho, mwikirize ngu ndi Ogwo. 20Buzimazima nimbagambira nti: Oyakiira omuntu weena ou ntuma, biri niinye ayakiire; kandi onyakiira, biri ayakiire Ogwo owantumire.

21 # Mat 26:21-25; Mak 14:18-21; Luk 22:21-23. Yesu ku yaaherize kugamba atyo, yaashoberwa omu mutima, yaahamya ati: Buzimazima nimbagambira nti: Omwe ahariimwe naija kundeebya. 22Abeegi baareebana, nibabanganisa aha u yaagambaho. 23Kandi omwe aha beegi be ou Yesu yaabaire akunda, akaba amwegamiire omu kifuba, bari aha by'okurya. 24Simooni Petero yaamwitira eriisho, yaamugira ati: Tugambire ou yaagambaho. 25Ogwo, nk'oku yaabaire ayegamiire Yesu omu kifuba, yaamubuuza ati: Mukama wangye, n'oha? 26Yesu yaagarukamu ati: Ou ndaakoreze ekitongye, nkakimuha, niwe ogwo. Ku yaakorize ekitongye, yaakiha Yuda mwene Simooni Iskaryota. 27Ku yaaherize kuheebwa ekitongye, Sitaane yaamutaahamu. Nikyo Yesu yaamugiriire ati: Eki orikwenda kukora, kirahutsye. 28Omuri abo abaabaire bashutami aha by'okurya, tihariho n'omwe owaamanyire eki yaamugambiriire ekyo. 29#Yoh 12:6. Ahabw'okuba Yuda niwe yaabaire arinda enshaho y'empiiha, abamwe baateekateeka ngu Yesu yaamuragiira kugura ebirikwetengwa aha bugyenyi, nari shi kugira eki yaaha abooro. 30Yuda, ku yaaherize kwakiira ekitongye, ahonaaho yaashohora; kandi bukaba bwaizire.

31Ku yaaherize kushohora, Yesu yaagira ati: Hati mbwenu Omwana w'omuntu yaahimbisibwa, na Ruhanga yaahimbisizibwa omuriwe; 32#Yoh 17:1-5. kandi Ruhanga ku araabe yaahimbisizibwa omu Mwana we, naija kuhimbisa Omwana we omuriwe, amuhimbise ahonaaho. 33Baana bato 'mwe, nkiri naimwe omwanya mukye; muryansherura; kandi nk'oku naagambiire Abayudaaya, naimwe nikwo ndikubagambira nti: Ei ndikuza, timurikubaasa kwijayo. 34#1 Yoh 2:8, 10. Nimbaha ekiragiro kisya nti: Mukundane; nk'oku naabakunzire, naimwe mube nikwo mwakundana. 35Ku muriguma nimukundana, nibwo abantu boona baribamanya ku muri abeegi bangye.

Yesu okugamba ahari Petero oku araamwehakane

36 # Mat 26:33-35; Mak 14:29-31; Luk 22:31-34. Simooni Petero yaamubuuza ati: Mukama wangye, nooza hi? Yesu yaagarukamu ati: Ei ndikuza, torikubaasa kunkuratayo hati; kwonka oryankurata bwanyima. 37Petero yaamugambira ati: Mukama wangye, n'enki ekirikunzibira kukukuratayo hati? Niinyija kuhayo amagara gangye ahabwawe. 38Yesu yaamugarukamu ati: Noija kuhayo amagara gaawe ahabwangye? Buzimazima ninkugambira nti: Enkoko terikwija kugamba, otakanyehakaine kashatu.

Currently Selected:

Yohaana 13: RR64

Highlight

Copy