Markɛ̀n 9

1Zhezü vru kɛ dɔ́ yɔ le: “Annànwɔrɛ mɛ̀n mɛ dɔ́ nyɛ̀n: anwrɔn hɔ̀n léyi dú ɛnu lɔ nɔn, ɛnjanbɔ̀ ke sɩ̀ wù ke dú kɛ yɔ sɩ̀ kàn Anhobɩ Nɛ̀ncüì-dúyri, Ɔwɔ yri ẅɛ̀n lɔ mán n'ɛkɔrɛ̀srɔn lɔ kɛ và nɔn.”

Zhezü crɔn n'edomɛ̀n n'ɛsɛ̀nkɛn-bɔ̀ zìwú

(Nyɛ́n nyan Matie 17:1-13; mán Lükɛ̀n 9:28-36 wrú lɔ mɛ̀n)

2Ɛbi ɛwole vacì, Zhezü bɩ́ Piɛrɛ̀n, Zhakɛ̀n mán Zhan hɔ́n ɛnkpò vri tɔ̀n wú; nanvrɛn lɔ yɔ anwrɔn anzɔ̀ lɔ kɩ yɔ dù. Zhezü crɔn n'edomɛ̀n y'ezìwú; 3n'ɛceci lɔ kɛ gbrɛ́n, srɔ ɛwosu, ye sɩ̀ cɔ́ eci wosu zriɛmɛ́n kɛ̀ krɔn nɛ̀n ɛnhibù lɔ wú. 4Zɛtɛn Zhezü sɛ̀nkɛn-bɔ̀ anhɔ̀n lɔ kán Eli mán Mohizì cɔ́ Zhezü mɛhi yɔ dɔ́ ankà. 5Zɛtɛn Piɛrɛ̀n kɛ dɔ́ Zhezü le: “Ankà-yé-wrɔn, zrɔ tán ɔmu le bɔ̀ dú ɛnu lɔ. Bɔ́ le ku ɛcasa-wɔn anhɔ̀n; vɛ tɛ́n ɔtɔ̀n, Mohizì tɛ́n ɔtɔ̀n mán Eli tɛ́n ɔtɔ̀n.” 6Piɛrɛ̀n ke sɩ́ nyri ankà léyi nɛ lɛ dɔ̀ nɔn, ɔmuhi yɔ anwrɔn anhɔ̀n lɔ, yɔ dú ɛnjansù vriemɛ̀n. 7Ɛnwì-gbú tɔ̀n srɔ kɩ murɛ́n yɔ ɛwú; kɩ esùva tɔ̀n dú ɛnwì-gbú lɔ mɛ̀n kɛ dɔ̀ le: “Ɔwrɔn ndɔ lɔ, dú m'ɛcüɛn-ẅì, nyɛ́n die nɛ̀n nukùɛ!” 8Ɛnvra zri lɔ, Zhezü sɛ̀nkɛn-bɔ̀ lɔ kɛ crɛnyan y'edomɛ̀n, tɛ́n yɔ sɩ́ vru kán ɔwrɔn zriɛmɛ́n; Zhezü zri kɩ dú yɔ ɛtɛ̀sɛ̀n. 9Ɛnkpò wú dù kakɛ mɛ̀n lɔ, Zhezü sɩ́ tán yɔ le: “Nyɛ́n bɩ́ dɔ́ ɔwrɔn zriɛmɛ́n eci léyi nyɛ́n kàn nɔn, hàn kɩ kɛ̀ krɔn ɛnvra léyi ɔwrɔnẅì Ẅì, ke le dú owúemɛ̀n kɛ̀ frɔ́.” 10Yɔ ẅɛn Zhezü mùan-ankà-dɔ̀ lɔ yɔ hɛ́n, tɛ́n yɔ yrɛ y'edomɛ̀n le: “Ecitan dú ‘dù owú-bɔ̀ mɛ̀n rɔ̀ vá ɛkɔrɛ-bɔ̀ mɛ̀n hàn’?”

11Zɛtɛn Zhezü sɛ̀nkɛn-bɔ̀ ke yrɛ nɛ̀n le: “Ecitan kruhú kɛ ɛnyànmàn-gbànvri-ankà-yé-bɔ̀ kɛ dɔ̀ le, ke ji le Eli kɛ và yakɛ há?” 12Zhezü mrɛ́n yɔ ɔmùan le: “Annànwɔrɛ mɛ̀n ke ji le Eli kɛ̀ và yakɛ, ô kɛ̀ wá ɛci hɔ̀n lɔ fɛn esùva. Tɛ́n cɛci kruhú kɛ Owrú Prɔnprɔn kɛ dɔ̀ le ɔwrɔnẅì Ẅì kɛ lɛ kán ɛgbàn bobrebe kɩ yɛ lɛ ẅɛn n'egbrìɛ? 13Tɛ́n mɛ dɔ́ nyɛ̀n le Eli và, kɩ anwrɔn hán nɛ̀n eci léyi yɔ cüɛ̀n nɔn, hán ɔmu le Owrú Prɔnprɔn merɛ́n n'ɛwú nɔn.”

Zhezü kɔrɛ ɛnẅì tɔ̀n léyi ɛnhɛ́n gbàngbàn ke di ejüe nɔn

(Nyɛ́n nyan Matie 17:14-21; mán Lükɛ̀n 9:37-43a wrú lɔ mɛ̀n)

14Ɛnvra léyi yɔ cɔ́ ɛsɛ̀nkɛn-bɔ̀ ndɔ hɔ̀n lɔ ɛtɛ̀sɛ̀n nɔn, yɔ kán fɛcüè vri tɔ̀n gbrɛnkɛn yɔ ɔmùan kɩ ɛnyànmàn-gbànvri-ankà-yé-bɔ̀ mɛhi yɔ wrɔ́n ecüì. 15Ɛnvra léyi anwrɔn kán Zhezü nɔn, nkpusu yɔ, kɩ yɔ srɛ́ yɔ hɔ́n bi nɛ̀n nyan. 16Zhezü ke yrɛ n'ɛsɛ̀nkɛn-bɔ̀ le: “Ecüìwrɔn-ankà tán de yɔ mɛhi nyɛ dɔ̀ nɛ́n?” 17Ɔwrɔn tɔ̀n dú fɛcüè lɔ mɛ̀n mrɛ́n nɛ̀n ɔmùan le: “Ankà-yé-wrɔn, mɛ̀n bɩ́ m'ɛnẅì mɛ và mɛ̀n sɩ́ mɛ́n, ɔmuhi ɛnhɛ́n gbàngbàn tɔ̀n ke di nɛ̀n ejüe, ke sɩ́ tán nɛ̀n ankà-dɔ́-yri. 18Ɛyri lɔ fɛn léyi ɛnhɛ́n gbàngbàn lɔ kɛ ẅɛn ɛnẅì lɔ nɔn, ne die yi ɛnhibɩ́ɛ, kɩ ɛnẅì lɔ andàfù kɛ sɔ́n ɔmùan, nɛ rá ɛnyî, kɩ nɛ trɛ́n kánkán. Mɛ̀n dɔ́ v'ɛsɛ̀nkɛn-bɔ̀ kɛ̀ wrɔ́ ɛnhɛ́n ndɔ lɔ, tɛ́n ye sɩ̀ cɔ̀ n'ɛhán-yri.” 19Zhezü kɛ dɔ́ yɔ le: “Ô Nyɛ́n, ankàẅì-bùtan woro bɔ̀! Ɛnvra ɛ̀bɛ de ke ji le mɛ̀n vru mɛ̀n cɔ́ nyɛ̀n mɛhi bɔ̀ yɛ́ nɛ́n? Ɛnvra ɛ̀bɛ de ke ji le mɛ̀n vru mɛ̀n wá nyɛ̀n nɛ́n? Nyɛ́n bɩ́ ɛnẅì lɔ nyɛ́n và sɩ́ mɛ̀n.” 20Kɩ yɔ bɩ́ ɛnẅì lɔ yɔ vá sɩ́ Zhezü. Ɛnvra léyi ɛnhɛ́n lɔ kán Zhezü nɔn, nɛ́n jɔ̀kɔ́ ɛnẅì lɔ ecüìemɛ̀n; ɛnẅì lɔ bore ɛnhibɩ́ kɛ vlà kɩ andàfù kɛ sɔ́n nɛ̀n ɔmùan. 21Zhezü ke yrɛ nɛ́n zi le: “Ɛnvra ɛ̀bɛ de eci lɔ kɛ hán ɛnẅì lɔ nɛ́n?” Kɩ ɛnẅì-nɛ́n-zi mrɛ́n ɔmùan le: “N'ɛcɛmɛ̀n hán hɛ́n. 22Kɩ ɛnvra zrizri ɛnhɛ́n lɔ kɛ kɔ́n nɛ̀n di ɛnhyà mɛ̀n mán ɛnshiemɛ̀n, ô nɛ̀n hán yi kè wù. Tɛ́n è nyri bɔ̀ ɛnhyɔ̀bɔ̀, ɛ̀ wá bɔ̀ ɛkɔrɛ̀, ke dú kɛ ɛ lɛ hán tɛ̀!” 23Zhezü mrɛ́n ɔmùan: “Ɛ lɛ hán tɛ̀, ɔmu lɔ de ɛ dɔ̀ nɔn. Tɛ́n ke dú kɛ ɛ̀ ẅɛn ankàẅì-bùtan hô, ɛ̀ cɔ̀ è nyrì le eci lɔ kɛ lɛ hán.” 24Ɛnvra zri lɔ ɛnẅì-nɛ́n-zi sɩ́ ɔmùan ɛwú le: “Me bútan, ɛ̀ wá mɛ̀n ɛkɔrɛ̀, ɔmuhi m'ankàẅì-bùtan lɔ ke sɩ̀ ẅɛ̀n ecüì nɔn!”

25Zhezü kán fɛcüè kɛ srɛ́ vá yɔ ɛtɛ̀sɛ̀n; zɛtɛn nɛ dɔ́ ɛnhɛ́n gbàngbàn lɔ ankà ɔmùan shishiemɛ̀n kɩ nɛ dɔ́ yi le: “Ɛnhɛ́n vɛ́n léyi, e sɩ́ ji yɛ dɔ́ ankà, ô yɛ yá ankà nɔn, mɛ wá tán mɛ́n: è dú ɛnẅì lɔ edomɛ̀n ɛ̀ srɔ ɛntrɛ, ô e bɩ́ vru bru nɛ̀n edomɛ̀n mrìmrì hàn!” 26Ɛnhɛ́n lɔ di nkù, jɔ́kɔ́ ɛnẅì lɔ ecüìemɛ̀n, kɩ srɔ ɛntrɛ. Ɛncɔnwrɔn-ẅì lɔ dɛ́ cá owú-wrɔn hán tán kɩ anwrɔn hɔ̀n léyi nyɔn nɔn, bobrebe kɛ dɔ̀ le: “Nɛ́n wùɛ.” 27Tɛ́n Zhezü ẅɛn ɛnẅì lɔ ɛkɔrɛ̀ hán nɛ̀n nɛ̀n tɔhú, kɩ nɛ̀n nyɔn ɛwúɛ. 28Ɛnvra léyi Zhezü bru ɛbemɛ̀n nɔn hɩ nɛ́n mán n'ɛsɛ̀nkɛn-bɔ̀ mɛhi yɔ yɛ́ nɔn, yɔ yrɛ nɛ̀n le: “Cɛci kruhú kɛ bɔ́ tɛ́n bɔ̀ sɩ̀ cɔ̀ ɛnhɛ́n ndɔ lɔ n'ɛwrɔ́-yriɛ?” 29Zhezü mrɛ́n ɔmùan le: “Ɔwɔ-sɛ̀n zri kɩ dú eci léyi kɛ lɛ wrɔ́ ɛnhɛ́n gbàngbàn ndɔ lɔ nɔn.”

Zhezü vru kɛ dɔ́ n'owú mán n'owúemɛ̀n-dù-frɔ́ ankà

(Nyɛ́n nyan Matie 17:22-23; mán Lükɛ̀n 9:43b-45 wrú lɔ mɛ̀n)

30Zhezü mán n'ɛsɛ̀nkɛn-bɔ̀ cɔhɔ́ ɛyri léyi yɔ dù nɔn, kɩ yɔ ci Galile pkɔsɔ wú. Zhezü ke sɩ́ ji anwrɔn ke nyri ɛyri léyi nɛ́n dù nɔn, 31ɔmuhi ne yé n'ɛsɛ̀nkɛn-bɔ̀ ankà, kɩ nɛ dɔ́ yɔ le: “Yɛ lɛ ẅɛn ɔwrɔnẅì Ẅì, yɛ wá anwrɔnẅì antamɛ̀n kɩ ke le di nɛ̀n owúemɛ̀n; kɩ n'ɛbi-anhɔnmɛ̀n bì lɔ ne le dú owúemɛ̀n nɛ̀n frɔ́.” 32Tɛ́n Zhezü sɛ̀nkɛn-bɔ̀ ke sɩ́ nyri ankà ndɔ lɔ n'ɛmɛ̀n; ɛnjansù kɛ ẅɛn yɔ; kɩ yɔ sɩ́ ji yɔ yrɛ nɛ̀n ankà.

Antɔn dú ecüìcüì vrán nɛ́n nyran hɔ̀n hàn?

(Nyɛ́n nyan Matie 18:1-5; mán Lükɛ̀n 9:46-48 wrú lɔ mɛ̀n)

33Zhezü mán n'ɛsɛ̀nkɛn-bɔ̀ mɛhi cɔ́ Kapɛrnahümɛ̀n anmàn. Ɛnvra léyi nɛ̀n bru anwɔn mɛ̀n nɔn, ne yrɛ n'ɛsɛ̀nkɛn-bɔ̀ le: “Eci tán kɛ hán nyɛ̀n ecüìwrɔn ɛnlevri lɔa?” 34Tɛ́n yɔ kɛ́n ɔmùan hɛ́n, ɔmuhi ɛnlevri lɔ, ecüìwrɔn dú yɔ angranmɛ̀n, ô yɔ nyri ɔwrɔn léyi dú ecüìcüì vrán nɛ́n nyran hɔ̀n y'ɛmɛ̀n lɔ nɔn. 35Zɛtɛn Zhezü vriyɛ́; nɛ̀n bi n'ɛsɛ̀nkɛn-bɔ̀ ɛvà anhyrɛ̀ lɔ kɩ nɛ dɔ́ yɔ le: “Ke dú kɛ ɔwrɔn ke ji kè dú kpàkpà-wrɔn, ke ji le nɛ̀n dú ɛmɛẅitrɔ-wrɔn, ô nɛ̀n dú anwrɔn lɔ fɛn ci-bɩtan-wrɔn.” 36Zɛtɛn Zhezü bɩ́ ɛnẅì cɛ tɔ̀n hɛ́n y'ezìwúɛ; nɛ̀n wá yi angbàmɛ̀n kɩ nɛ dɔ́ yɔ le: 37“Ɔwrɔn léyi ke bɩ́ ɛnẅì cɛ ɔmu lɔ m'ɛkruhú nɔn, mɛ́n múmù de ne bɩ́ mɛ̀n nɔn; kɩ ɔwrɔn léyi ke bɩ́ mɛ̀n nɔn, nɛ́n sɩ́ bɩ́ mɛ́n dùku kɩ, tɛ́n ne bɩ́ mɛ̀n mán ɔwrɔn léyi wá mɛ̀n ɔkɔ̀hɔ̀n nɔn.”

Ɔwrɔn léyi ke sɩ̀ dù bɔ́ egbri-wrɔn nɔn, nɛ̀n dú bɔ́ ɛcüɛn-wrɔn

(Nyɛ́n nyan Lükɛ̀n 9:49-50 wrú lɔ mɛ̀n)

38Zhan kɛ dɔ́ Zhezü le: “Ankà-yé-wrɔn, bɔ̀ kán ɔwrɔn tɔ̀n kɛ wrɔ́ anhɛ́n gbàngbàn hɔ̀n v'ebɩ́mɛ̀n; kɩ bɔ́ ji bɔ̀ sɩ́ nɛ̀n eci lɔ n'ɛhán mɛ̀n, ɔmuhi nɛ̀n sɩ̀ dù bɔ́ ɛmɛ̀n-wrɔn nɔn.” 39Tɛ́n Zhezü mrɛ́n ɔmùan le: “Nyɛ́n bɩ́ sɩ́ nɛ̀n eci lɔ n'ɛhán mɛ̀n, ɔmuhi ɔwrɔn zriɛmɛ́n ke sɩ̀ hán anvɛmɛ̀n-frɛ́n-ci m'ebɩ́mɛ̀n kɩ ke vru kɛ̀ dɔ́ m'ankà gbàngbàn ɛmɛẅi. 40Ɔmuhi ɔwrɔn léyi ke sɩ̀ dù bɔ́ egbri-wrɔn nɔn, nɛ̀n dú bɔ́ ɛcüɛn-wrɔn. 41Kɩ ɔwrɔn léyi Krisì bɩ́mɛ̀n, kɛ lɛ tán nyɛ̀n ɛnshi grashɛ̀n zri nyɛ́n mì nɔn, annànwɔrɛ mɛ̀n mɛ dɔ́ nyɛ̀n le: Nɛ lɛ cɔ́ anjakpà lɔ.”

Ɛgbàn vri-sì

(Nyɛ́n nyan Matie 18:6-9; mán Lükɛ̀n 17:1-2 wrú lɔ mɛ̀n)

42“Ɛẅì hɔ̀n léyi ke bú m'ankà kɛ tán ankàẅì nɔn, ke dú kɛ ɔwrɔn kɛ hán ɛnzri kpokpo ke bru ɛgbàn mɛ̀n hô, zrɔ tán le ɔwrɔn ndɔ lɔ ye mú nɛ̀n obù vri tɔ̀n ɔbɔ̀n ô yɛ kɔ́n nɛ̀n di ecüe. 43Ke dú kɛ v'ɛkɔrɛ̀ kɛ hán mɛ́n e bru ɛgbàn mɛ̀n hô, ɛ̀ vɔ́n nɛ̀n; zrɔ tán le è bɩ́ ɛkɔrɛ̀ zri è bru anhobɩ́, kɩ ɛ̀ ẅɛn ankɔrɛ̀ anhyrɛ̀ ô ɛ̀ hɔ́n ɛgbàn hán yri, ɛyri léyi ɛnhyà ke sɩ́ zɛ́n hán nɔn. [44Nanvrɛn lɔ, ‘anẅɛn hɔ̀n léyi kɛ rá anẅia nɔn ke sɩ́ wúɛ kɩ nanvrɛn hyà lɔ ke sɩ́ zɛ́n hán mrìmrì.’] 45Ke dú kɛ v'ɛnan kɛ hán mɛ́n e bru ɛgbàn mɛ̀n hô, ɛ vɔ́n nɛ̀n; zrɔ tán le è bɩ́ ɛnan zri è bru ɛwúvà léyi ke sɩ́ trɔa nɔn mɛ̀n, kɩ ɛ̀ ẅɛn annan anhyrɛ̀ ô yɛ kɔ́n mɛ́n di ɛnhyà mɛ̀n. [46Nanvrɛn lɔ, ‘anẅɛn hɔ̀n léyi kɛ rá anẅia nɔn ke sɩ́ wúɛ kɩ ɛnhyà mán ke sɩ́ zɛ́n hán mrìmrì.’] 47Kɩ ke dú kɛ v'ɛvɛ̀ de kɛ hán mɛ́n e bru ɛgbàn mɛ̀n hô, è fú nɛ̀n; zrɔ tán le è bɩ́ ɛvɛ̀ zri è bru Anhobɩ́ Nɛ̀ncüì-dúyri, kɩ anvɛ̀ anhyrɛ̀ kè dú mɛ́n ô ɛ̀ hɔ́n ɛnhyà mɛ̀n. 48Nanvrɛn lɔ, ‘anẅɛn hɔ̀n léyi kɛ rá anẅia nɔn, ke sɩ́ wúɛ kɩ ɛnhyà mán ke sɩ́ zɛ́n hán mrìmrì.’ 49Ɔmuhi ye le fi anwrɔn lɔ fɛn ɛnhyà mɛ̀n ke le dù kɛ lɛ hán ɛnjüɛ̀ hɔ́.”

50“Ɛnjüɛ̀ dú eci ankrànkràn; tɛ́n ke dú kɛ ɛnjüɛ̀ zrɔ lɔ kɛ vacì hô, anhɔntan de nyɛ lɛ hán ô nɛ̀n srɔ ɛnjüɛ̀ ẅì nɛ́n? Ke ji le nyɛ́n dù kɛ hán ɛnjüɛ̀ hɔ́, ô nyɛ́n mán nyɛ́n muan-ẅì hɔ̀n mɛhi nyɛ́n dú anwɔwɔ mɛ̀n.”

Currently Selected:

Markɛ̀n 9: ƐAA03

Highlight

Copy