Luka 8

Omusyo womuheri wembuto

1Enyuma kwaho hake mwalaba omo miyi nehiyi, eritulago nerileta engulu yowene yobwami bwoMungu. Nerikumi nababiri babya haguma naye, 2nibya abandi bakali abalamibawa kwe birimu bibi nesyondwala: ye Maria oyu kahulawa mo Magdalene, oyo walusibawa kwesyombinga sirinda, 3na Yoana, muka Kuza, mubiki webindu byeHerode, na Suzana, nabandi bangi ababya bakamuwatikya omo bindu byabo.

4Omugulu endeko nene nabandu bakalwa oko buri muyi bahindana ahabya, mwatwirabo omusyo ati: 5Omubibimwaya biba embuto yiwe; nomugulu abiba, esindi mosyawa omo nzira, mosyalyatangirirwa, nesyonyoyu syomo kyanya mosyatolasyo. 6Nesindi mosyawa okwibwe; nomugulu syalasa, mosyoma, kusangwa syabula amagetsi. 7Nesindi mosyawa omo mahwa; namahwa mwalasa haguma nasyo mwanigasyo. 8Nesindi mosyawa omo kitaka kyowene mosya lasa, neributa esyombuto erigana. Abere akabuga ebi, mwa birikira ati, Oyu wite amatwi weriowa, owe.

9Kandi abiga buwe mobamubulya ngo musyo oyo akahulaki, 10Naye mwabuga ati, Mwabirihabwa eriminya ebibisamire byobwami bwoMungu; nikwa busana nabandi biri mo misyo, erilangira sibalangire, neriowa sibaminye. 11Nikwa omusyo woyu: Embuto kye kinywa kyoMungu. 12Abo monzira ba babiriowa; neryo Satani ikasa nerilusya eKinywa omo mitima yabo, ibatatoka erikirirya nerilamibwa. 13Nabo okwibwe babo omugulu bakowa eKinywa, bakangirirakyo nobutseme; nikwa sibawite emirihi, bakikiriraya akatambi kake noko mugulu werilengwako bakatswa. 14Nesyawa omo mahwa, ba bakowa, nikwa babiyigendera ibanigwa omo maganiryo nebindu neriyitsemesya ryengebe eyi, nebiguma byabo ibitera. 15Neyo ko kitaka kyowene, babo abakowa eKinywa, bakahambakyo ndeke omo mutima owakwenene ogowene, ibabuta biguma neritindaluha.

Omusyo woluseke

16Sihari oyu kakaya oluseke akakuningiralo omwirega kutse erihiralo omwisi wengingo, nikwa akahiralo oko butara, abakingira ibatoka erilangira ekyakakala. 17Kusangwa sihari ekibisamire ekitindasyaminyikalibwa, kutse sihari kindu ekibu rirene ekitindasyaminywa nerihika omokyakakala. 18Mulebaye ngoko mukowa; kusangwa oyu wite asyahabwa ebindi, noyu tawite asyasagulwa ebyo akaganiraya ati awite.

Nyinya na bagala babo Yesu

19Neryo nyinya wuwe nabagala babo mobamunikako, nikwa mobatatoka busana nendeko. 20Neryo mwabwirwa bati, Koyo wawe nabagala benyu banahangene ahihya, bakasonda eriku lolako. 21Nikwa mwabuga nabo ati, Koyo wage na bagala betu banabo abakowa eKinywa kyoMungu nerikolakyo.

Yesu akabonderaya engetsi

22Neryo ekiro kiguma mwingira omo bwato haguma nabiga buwe, neryo mwabuga nabo ati, Tusokere eyisirya wengetsi. Neryo mobahongoka, 23Babere banemotarikya iye mwayato. Nekikomo mokyandagala omo ngetsi nabo mobasonda eriusula mwa magetse, ibakahwa. 24Neryo mobaya mubukya bati, Mukama, Mukama, tukahwa! Naye mwabuka mwakunga ekihunga nerikarama ryebisunda; nabyo mobyumbya, mohabya isyerere. 25Naye mwabuga nabo ati, Erikirirya ryenyu riri hahi kwehi? Nabo mobubaha, mobasweka, mobabwirana bati, Oyu ni mundundi oyu kategeka erihunga namagetsi, ibyamowa kwehi?

Yesu akahiga esyombinga

26Neryo mobahika omo kihugo kyabaGerase, ekiri eyisiria weGalilaya. 27Neryo abere akalwa mubo ahika oko kitaka omundu mwahindana naye akalwa oko muyi iniari kwesyo mbinga; kusangwa oko mugulu muli isiariambala olukimba, isiaribya omo nyumba nikwa omukati-kati kesisinda. 28Abere alola uku Yesu, mwabirikira mwawa ahisi embere siwe, mwa buga nomulenge munene ati, Ukanyiyira uti, Yesu, Mugala woMungu wEndata Kutsibu kwehi? Ngakugo, sunyagalaye. 29Kusangwa iniamabitegeka ekirimu kibi ekyo ati kilwe omo mundu oyo. (Kusangwa engendo nyingi kika muhamba; iniakategibawa, neribohwa omo mahulula nemisege, nikwa mwatwa emisege eyo mwatsurumibwa nembinga eyo omo mbwarara.) 30Neryo Yesu mwamubulya ati, Erina ryawe uwendi kwehi? Naye mwabuga ati, Emilondo; kusangwa esyombinga nyingi isyamabimuhikako. 31Mosyamugonga gonga siti siategekesyo eriya omo kyuna. 32Nikwa ekihyo kinene kyesyongurube kyabya ikikarira oko kitwa; nasyo mobyamugo-ngagonga eriingira musyo. Naye mwahasyo eha muri erigenda. 33Neryo esyombinga mosyalwa oko mundu oyo mosingira omo syongurube, nekihyo mokyatibita aha senzegerere erihika omo ngetsi mosyasenda. 34Abalisya babere balangira ekyamabya, mobatibita, mobatulago eka nomo kihugo. 35Neryo abandu mobayalebya ekyamabya, mobahika aho Yesu abya, mobeya omundu oyo walwa kwesyombinga inianikere oko bisandu bya Yesu, inianambite iniabiriswabya namenge wuwe; mobubaha. 36Nabalola kukyo mobabwirabo ngoko oyu lwe kwesyombinga arialamibawa. 37Neryo abandu bosi abe kihugo kyebaGerase ekitimbireho mobamubulya bati, alwe kubo; kusangwa mobakwa obuba bungi; neryo mwingira omo bwato mwasubula. 38Nomundu oyu walwa kwesyombinga mwamugonga-gonga ati abye naye; nikwa mwalagana naye ati, 39Suba eka ewawe, utulego ebinene ebyo Mungu abirikukolera. Neryo mwagenda, eritulago omo muyi gosi ebinene ebyo Yesu abirimukolera.

Mwali wa Yairo nomukali wendwala yomusasi

40Nikwa omugulu Yesu asubula, endeko moyamukokya, kusangwa abosi babya ibakamulindirira. 41Kandi lebaya mohasa omundu oyu kahulawa mo Yairo, oyo wabya omurongani wenyumba yerihindana; neriwa oko bisandu bya Yesu mwamugonga-gonga ati, aye omo nyumba yiwe, 42kusangwa abya awite mwali iyanabutire iyowene, erikula riwe inirya mituta ngikumi nibiri, abya iniakalekula. Nikwa omugulu agenda, abandu mobamuhatatania.

43Nomukali oyo wabya akwire erisenda ryomusasi emituta ikumi nibiri oyo wabiribuyira ebindu biwe byosi oko basaki, mwatatoka erilamibwa nomundu, 44mwasa enyuma kwiye, mwatula oko ndambi yolukimbe luwe; neryo-neryo erisenda riwe ryomusasi moryumbya. 45Yesu mwabuga ati, Nindi wamanyitulako kwehi? Omugulu abosi bayigana, Petero mwa buga ati, Mukama, esyondeko sikakutimbako nerikuhatatania! 46Nikwa Yesu mwabuga ati, Omundu amanyitulako; kusangwa namaminya kwa kagala kamabinyilwako. 47Omukali abere alangira kwatabisamire, mwasa akatitimana, mwawa ahisi embere siwe mwatulago embere syabandu bosi ekirialeka iniamutulako, kandi ngoko ainalamibwa neryo-neryo. 48Neryo mwabuga naye, Mwali, erikirirya ryawe ryamabikulamya; ugende obuholo.

49Nomugulu abya akabuga, mohasa omundu akalwa omo nyumba yomurongani wenyumba yerihindana ati, Mwali wawe aholire; suluhaye Mukangirirya kandi. 50Nikwa Yesu mowa ekyo mwamusubirya ati, Sigubahe; wikiriraye risa akandilama. 51Abere ahika oko nyumba, mwataliga mundu akingira haguma naye, nina Petero na Yoane na Yakobo, nise womwana na nyinya. 52Nabosi babya bakarira nerimususumanira; nikwa mwabuga ati, simurire; kusangwa siaholire nikwa agotsere. 53Nabo mobamusekererya, ibanasi kwaholire. 54Nikwa mwa muwata oko byala mwabirikira, ati, Mwana, hangana. 55Nekirimu kiwe mokyasubula, neryo-neryo mwahangana; neryo mwategekabo ati bamuhe ebyerirya. 56Neryo abamubuta mobasweka; nikwa mwategekabo ati sibabwire omundu ebya makolwa.

Currently Selected:

Luka 8: NTN62

Highlight

Copy