Matayo 26

Embita yeritsimba Yesu

1Yesu abere abibuga ebinywa ebi, mwabwira abiga buwe ati, 2Munasi enyuma webiro bibiri eRikiruka rikahika, noMugala womundu asyahoterwa eribambwa. 3Neryo abahereri bakulu nabakulu babandu mobahindana omo muhana womuhereri mukulu, oyo wahulawa mo Kayafa, 4mobaya embita yeritsimba Yesu bubi-sobiso nerimwita. 5Nikwa moba buga bati, Butsira omo kiro kinene kyerirya, sihatwike isesi omukati-kati kabandu.

Yesu muturirwa kwa maguta

6Nikwa omugulu Yesu abya eBetania omo nyumba ya Simoni muhaga, 7omukali mwamuhikako iniawite okwitambya ryamaguta gobuguri bunene, mutago oko mutwe wuwe, anikere akarya. 8Nikwa omugulu abiga balangira, mobahitana, bati, Amahera bosa busana naki kwehi? 9Kusangwa amaguta aya angaguribwe esyofaranka nyingi isyahabwa abera. 10Nikwa Yesu, mwiminya ebyo, mwabuga nabo ati, Busana naki mu kendereraya omukali kwehi? Kusangwa abirinyikolera ekindu kibuya. 11Kusangwa muri nabera ebiro byosi, nikwa simuri nage ebiro byosi. 12Eriuta amaguta aya oko mubiri wage abirikolakyo erinyisuga busana nerita. 13Kwenene, ngabuga nenyu, aho engulu yowene eyi yasyatulwa omo kihugo kyosi, ekyo abirikola kyasyabugwa busana nerimwibuka.

Yuda Iskariota

14Neryo muguma werikumi na babiri, oyu kahulawa mo Yuda Iskariota, mwaya oko bahereri bakulu 15mwabuga ati, Mwasyambaki namabahaye kwehi? Nabo mobamulengera ebihande byebitsipa amakumi asatu. 16Eritsuka oko endambi eyo mwasondya omwanya werimuhotera.

Erikiruka

17Nikwa oko kiro kyeritsuka kyoBundu bute moKihamya abiga mobahika oko Yesu, bati, Wanzire itwakokotya busana nawe aheririra ryerikiruka ho hahi kwehi? 18Naye mwabuga ati, Mugende omo muyi oko walebe, mumubwire muti, OMukangirirya ati, Endambi yiwe iri hakuhi; omo nyumba yawe mwakandirira erikiruka haguma na biga biwe. 19Abiga mobakola ngoko Yesu ategekabo, mobakokotya erikiruka. 20Erigologolo ryabere ryabihika, mwikala okwirya haguma nabiga erikumi na babiri; 21nabo babere bakarya, mwabuga ati, Kwenene ngabuga nenyu, muguma gokwinywe akandinyi hotera. 22Nabo mobabya nobulige kutsibu, mobatsuka eri mubulya muguma muguma, bati, Mukama ni Ingye kwehi? 23Naye mwasubirya ati, Oyo wabirikolerya ebyala biwe omo kisya haguma nage, akandinyihotera. 24OMugala womundu akagenda ngoko kisakire busana naye, nikwa obulige oko mundu oyo kahotera oMugala womundu! Ryabya ryowene busana naye kumbe siabutawa. 25Yuda, oyo wamuhotera, mwabuga ati. Ni ingye Mukama kwehi? Naye mwabuga, ati, Wamabibuga. 26Nikwa omugulu babere bakarya, Yesu mwimya obundu, mwatsumulabo, mwatwabo, mwahabo abiga, ati, Mwimaye, murye; oyu ni mubiri wage. 27Kandi mwimya olutehi, abiha ewasingya mwahalobo, ati, Mupulaye kulo inywe bosi; 28kusangwa oyu ni musasi wage werilagana rihya, owakutawa busana na bangi busana nerilusya ebibi. 29Nga babwira sindiendisyapulya kandi oko biguma byebinyu erihika oko kiro ekyo nasyapulyabyo bihyabihya haguma nenyu omo bwami bwaTata wage.

30Babere babiimba olwimbo, mobaya oko kitwa kye Mizeituni.

31Neryo Yesu mwabuga nabo ati, Inywe bosi mukandinyi tswako oko kiro eki; kusangwa kisakire kiti, Nasyaswirya omulisya, nesyombuli esyomo kihyo syasyapanzwa. 32Nikwa nasyabya nabilubukibwa, nasyabatsuka eriya eGalilaya. 33Petero mwabuga naye ati, Nomo abosi basyatswa busana nawe, ingye sindiendikutswako. 34Yesu mwabuga naye ati, Kwenene ngabuga nawe, omo kiro eki kyamunabwire, engoko lume iteyabika, ukandinyigana engendo isatu. 35Petero mwa mubwira ati, Nomo kyanganyiletera erihola haguma nawe, sindiendikugana. Nabiga bosi mobabuga batya.

Getesemane

36Neryo Yesu mwagenda nabo ahakahulawa mo Getese mane, mwabwira abiga biwe ati, Mwikale hano, omugulu ngaya harya ngayasaba. 37Mwatwala Petero na bagala ba Zebedayo babiri, mwatsuka eribya nobulige nerihahukya omu tima kutsibu. 38Neryo mwabuga nabo ati, Omutima wage amabya nobulige kutsibu, bukanyita; musigale hano, mutegaye haguma nage imunalolire. 39Mwasegera embere hake mwagwa oko busu buwe mwasaba ati, Tata, kyamatokekana, olutehi olu unyilabayeloko; nikwa butsira ngoko nyanzire, nikwa ngoko wanzire. 40Mwasuba ahari abiga mweyabo ibane to; mwabuga na Petero ati, Kwehi simwetatoka eriteya haguma nage imuna lolire endambi nenguma kwehi? 41Mutegaye imunalolire kandi musabe imutingira okwilengwako; ekirimu kyanzire, nikwa omubiri ni molo. 42Kandi, engendo ya kabiri mwaya saba ati, Tata wage, olu lwamatindatokekana erinyilabako ngatindapulyalo, erisonda ryawe rikolawe. 43Kandi mwasa mweyabo ibane to, kusangwa ameso wabo iniaritoherere. 44Mwasigabo kandi atya, mwaya saba engendo ya kasatu, mwasuba omo binywa ebyo. 45Neryo mwahika oko biga mwabuga nabo ati, Mukine to mukinaluhuka kwehi? Lebaya, endambi yamahika, oMugala womundu amahoterwa omo byala bya bakola nabi. 46Muhangane, tubye tukagenda; mulebaye oyu kanyihotera amahika.

Eritsimba Yesu

47Omugulu akinabuga, Yuda, muguma ogo kwikumi na babiri, mwasa haguma na kilondokilondo kinene haguma nemiyari namahumo, bakalwa oko bahereri bakulu nabakulu babandu. 48Nikwa muhoteri iniamabihabo ekiminyikalo, ati, Oyo ngandiryatsirira, iniye; imwamutsimba. 49Neryo-neryo mwahika uku Yesu mwabuga ati, Wabukire Mukama! Mwa muryatsirira. 50Yesu mwabuga naye ati, Uryasiraki kwehi? Neryo mobahika mobahira ebyala uku Yesu mobamutsimba. 51Neryo lebaya, muguma oko babya na Yesu mwakakya ebyala biwe mwakula omuyari, mwabanda omukobe womuhereri mukulu, mwatwa okutu kuwe. 52Neryo Yeru mwabuga naye ati, Subaya omuyari omo lubo lwago; kusangwa abosi abaka wata oko muyari basyahera omo muyari. 53Mukaganiraya muti sinangatoka erilakira Tata wage, inianyitumira abamalaika kwilaba amaelfu erikumi na babiri kwehi? 54Nikwa lino amasako angabererera ati, byamabya ikobitolere eribya bitya kwehi? 55Oko ndambi eyo Yesu mwabuga nesyondeko ati, Mwabiriasa ngabakahamba omunyeyi, munawite ko miyari namahumo erinyihamba kwehi? Ekiro nekiro monikala omo hekalu ngakangirirya, momutanyihamba. 56Nikwa ebi byosi byabiribya amasako wabaminyereri atoke eribererera. Neryo abiga bosi mobamutswako mobatibita.

Yesu emuliro waKayafa

57Neryo abatsimba Yesu mobamutwala ku Kayafa omu hereri mukulu, aho basaki na bakulu babya bahindene. 58Nikwa Petero mwamukwama inianakengehere, mwahika omo muhana womuhereri mukulu, neryo mwingira mwikala haguma nabateya erilola oko nduli yomwatsi. 59Nikwa abahereri bakulu nabo mwibugiro mobasonda eritula ebyamabihi uku Yesu ibatoka erimwita, 60nikwa mobabulabyo, nomo hanasa abatuli bamabihi bangi. Nenyumanyuma mohasa babiri 61bati, omundu oyu mwabuga ati, Nangatoka eriherya hekalu yoMungu, neriswahimbayo oko biro bisatu. 62Omu hereri mukulu mwahangana mwabuga ati, Suwite ekyo wanga subya kwehi? Ebi ni byahi aba bakakuhandikirira kwehi? 63Nikwa Yesu mwabya bukutu, Omuminyereri mukulu mwamubwira ati, Ngakusema busana noMungu oyu riho, utubwire wamabya une Kristo, Mugala woMungu. 64Yesu mwabuga naye ati, Wabiribuga. Nikwa ngababwira nyiti, Enyuma webi mwasyalangira oMugala womundu inikere oko byala byamali byaMaka neriasa oko bitu byelubula. 65Neryo omuhereri mukulu mwasatangya esyongimba siwe, ati, Abiritsuma. Busana naki tukine nobwaga bwabalangiri kwehi? Langira, mwamabiowa eritsuma riwe. 66Mwamaganirya mutiki kwehi? Mobasubirya bati, Atolere oluholo. 67Neryo mobatwira ebi tande omo busu buwe, mobamuswirya esyongunyo; nabandi mobamuswirya ebikundi, 68bati, Utuminyerere, uwe Kristo! Nindi wamakuswirya kwehi?

Erigana rya Petero

69Nikwa Petero inianikere eyihya omo muhana. Omukondo mwamuhikako ati, Nawe ulwe haguma na Yesu muGalilaya. 70Nikwa mwaganakyo embere syabo bosi, ati, Sinyasi ebyo ukabuga nga ni byahi. 71Neryo abere aya eyihya oko ndambi yenyumba, ogundi mwanamuto mwamulolako, mwabwira ababya bimeneho ati, Omundu oyu abya na Yesu wa Nazareti. 72Kandi mwagana nerilahirya ati, Sinyasi omundu oyo. 73Enyuma wakatambi kake ababya bimeneho mobahika moba bwira Petero bati, Kwenene nawe uri muguma wakubo, kusangwa emibugire ikakuminyikalaya. 74Neryo mwatsuka eriyisema nerilahirya ati, Sinyasi omundu oyo. Neryo-neryo engoko lume moyabika. 75Neryo Petero mwibuka eKinywa Yesu abuga ati, Engoko lume iteyabika, ukandinyigana ngendo isatu. Kandi mwahulukira eyihya mwarira nobulige.

Currently Selected:

Matayo 26: NTN62

Highlight

Copy