Mariko 7
7
Yesu akasinga abaFarisayo
1Nikwa omugulu abaFarisayo nabandi basaki abalwa eYeru salema bahindana ahari, 2mobalangira abandi oko biga buwe barya omo byala bitowene eribindula ambu ebitanabire. 3(Kusangwa abaFarisayo nabaYuda bosi, isiberya batebanabya ebyala byabo, ibakakwama emitsye yabakulu; 4nomugulu bakahika omwiguriro, isiberya batebayikosa; neyindi mitsye mingi ine eyo bakakwama, ngerierya esyondehi nebisya nesyo nyungu syemiringa.) 5AbaFarisayo nabasaki mobamubulya bati, Busana naki abiga bawe sibelendera ngemitsye ya bakulu, nikwa bakarya omo byala bitowene kwehi? 6Naye mwabuga nabo ati, Isaya mwaminyerera ndeke busana nenyu abatebya, ngoko kisakire kiti,
Abandu aba bakanyisikaya neminywa yabo,
Nikwa omutima wabo ari hali kwingye;
7Bakanyikukamira buyira,
Ibakakangirirya eritegeka ryabandu ngerikangirirya kundu.
8Mukasiga eritegeka ryoMungu, imukahambirirana nemitsye yabandu.
9Neryo mwabuga nabo ati, Muwite enzira ndeke yerigana ekihano kyoMungu, busana neribika emitsye yenyu! 10Ku sangwa Musa mwabuga ati, Sikaya tata wawe na koyo wawe; kandi, ati, Oyu wasyatsuma ise kutse nyinya, akwe kundu; 11nikwa inywe muti, Omundu amabwira ise kutse nyinya ati, Endundi nangakuha ni Korbane (eribindula ambu, ebyama habwa oko Mungu)— 12imukaleka iniataswakola kindu busana na ise wuwe kutse nyinya wuwe, 13mutya imukayira eKinywa kyoMungu mo buyira busana nerikangirirya abandi emitsye yenyu. Neyindi myatsi mingi ngeyi mukakolayo.
14Neryo mwabirikira abandu akandi, ati, Munyihulikirire imwe bosi, mowe: 15sihari kindu kikingira omwisi syomundu ekikalwa eyihya kikayira omundu mo mubi; nikwa ebindu ebikalwa omwisi syomundu byo bikayira omundu mo mubi. (16Omundu amabya namatwi weriowa, owe.) 17Neryo omugulu amabiingira omo nyumba, abisiga abandu, abiga buwe mobamubulya busana nomusyo oyo. 18Naye mwasubiryabo ati, Kwe nenyu, simuwite amenge kwehi? Simwasi kwebyosi bikingira omwisi syomundu bikalwa eyihya sibyetoka erimuyira mo mubi kwehi? 19kusangwa sibiriya omo mutima nikwa omo nda yiwe, bikalaba. (Eribuga atya ni buga ati, ebyalya byosi byowene.) 20Neryo mwabuga ati, Ebikalwa omwisi womundu byo bikayira mundu mo mubi. 21Kusangwa omo mutima wo mundu omwisi mukalwa amaringikania mabi, erisingira, eriiba, eriita, eriteta,
22erirumwa, erikola ebibi, eriteba, engumbu nyibi, ameso mabi, eritsuma, eriyanza, obukiru. 23Emyatsi eyo yosi ikalwa omwisi, bikayira mundu mo mubi.
Erilama ryomzo ali womukali wa Sirofoinike
24Nerilwa eyo mwahangana mwaya oko mitano yeTiro neSidona. Mwingira omo nyumba, isianzire hakabya oyu kaminya; nikwa mwatatoka eribisama. 25Nikwa neryo-neryo omukali oyu wite mwali mulere iniari ko kirimu kibi, mowa engulu yiwe mwasa mwaga oko bisandu biwe. 26Omukali oyu abya muGiriki, wekitunga kya Sirofoinike. Mwamugonga gonga ati aguse ekirimu kibi kyeyihya kilwe ku mwali. 27Naye mwabuga naye ati, Abana batsuke eriuguta, kusangwa siritolere eriimya ebyalya byabana erigusabyo esyombwa. 28Nikwa mwamusubirya ati, Ega Mukama; tse nesyombwa nasyo esiri omwisi wobutala sikanarya ebitahangukira byabana. 29Neryo mwabuga naye ati, Busana neribuga eri uyigendere; ekirimu kibi kyamabilwa ku mwali wawe. 30Naye mwasuba omo nyumba yiwe, mweya mwana inianagotsere omo ngingo, nekirimu kibi ikyabirigenda.
Omutsiha emumu
31Neryo mwasubula mwalwa omo kihugo kyeTiro, mwalaba eSidoni mwahika oko ngetsi yeGalilaya, mwalaba omukati-kati ke Dekapoli, 32Neryo mobamuletera omundu mutsiha kandi ini mumu; mobamugonga-gonga bati amuhire kwebyala biwe. 33Neryo mwamulusya ahari abandu mwamutwala ahayihenge kire, mwahira eminwe yiwe omo matwi wuwe, mwatwa ama tandi mwatula oko lulimi luwe; 34mwalalama mwalebya elubula, mwahumurikana, mwabuga naye ati, Efafata, ni buga riti, Ribukala. 35Na matwi wuwe mwalibukala, nolulimi luwe molwabohokala, mwabuga ndeke. 36Neryo mwategekabo ati sibabwire omundu; nabo mobalaba kwaho eritulago. 37Mo basweka kutsibu okwilaba, bati, Abirikola emyatsi yosi yondeke; akaleka abatsiha ibowa nesyomumu isyabuga.
Currently Selected:
Mariko 7: NTN62
Highlight
Share
Copy
Want to have your highlights saved across all your devices? Sign up or sign in
Le Nouveau Testament et les Psaumes en Ndandi © British and Foreign Bible Society, 1962.
