ROM 15
15
Mihmi Hempyo Miipato, Atoh pa miisu tamapa
1Ngunu hutiina alḛr nyadonii hembyuñ kendoke ajju atañmi, ho ngunu kontii hempyo miipa siikiñ make; 2hopa kone abi atohka ariapii miya hempyo miipasa mohluka aya kiipa, mohlumi miilyañ dupa. 3Niimpalukoda Kristo mo atohmi hempyo miipa siimake; hojalo, hiila ketola do, “Nyapakoya nii huna niimi nyapakoya donii hiimi ngiiko ahkenento.” 4#Rom 4.23-24; 1 Kor 9.10; 2 Tim 3.16. Niimpalukoda bilo allo hoka keniiñ hii ngunu mika tonsḛr naniiñ pake ketiinii, hiilo ranttiniiñ ho piniipota loka haro lupa niilo ngunu ko hentiñ naniiñ doke nendupa. 5#Rom 12.16; 1 Kor 1.10; 2 Kor 13.11; Pil 2.2; 4.2. Hopa Pinii ka ranttiniiñ ho harolupa nii nunumi sanke nenkiñcho sitañpa ahiñpa kone anyañ mi samba siidopa, Kristo Jisu ka agiñho, 6ahiñpa nunu aguñ gongepa Pinii mi assañ dupa ho Attoh Jisu Kristo ka Aba mi.
Midomiyu Atañpa Ayapuyu
7Kone anyañ mi larii siito, hiikohopa, niihtañpa Kristo nunumi lariitii, Pinii mika assañ giina naniiñpa. 8Niimpalukoda ngo nunumi lukoso Kristo miirapa lyitii mitupipa konii atañpa Pinii ka lotii mi kakiñ dupa, biloka aba-apa mika hemme biniiñ mi jije ke hiila kakiñ naniiñpa, 9ho Midomiyu atañmi Pinii mi assañ kiine dupa mohka aroh kiipa. Hiila ketola do,
“Hopa ngo niimi assañ talyi Midomiyu ka punkoho,
ho niika armyañ pa biisie sichi”;
10ho hiira si ludo,
“Hempyoto, O Midomiyu atañ, mohka miyuatañ agiñho”;
11ho hiira,
“Attoh mi assañto, hikha Midomiyu atañ,
ho hikha miyuatañ mohmi assañto”;
12 #
Mt 12.21. ho Aijaya lubyañ la ludo,
“Jesse ka liima hii tuliñ kendoke,
mo huna Midomiyu atañmi sangii kendonii;
mohko Midomiyu atañka hentiñ naniiñ dokiñdo.”
13Hentiñ ka Pinii nunu miilañ rumi poteje bikiñ cho hikha hempyo ho chimie henje ho, niimpalukoda Darii Yajiyallo ka harchichike lo nunuko hentiñ naniiñ poteje doke nendupa.
Pol ka Sitañ Haro Paka Kedo Paka Lyiniiñ
14Ngo ngiipa koda nunumi hembyañ biisu du, ngiika anubarmii atañ, niimpa nunuko poteje ayahii dosudo, hikha chila hii poteje do, ho kone anyañ mi tonsḛr siila do. 15Hojalo drih tonge ho ngo hempḛr haro biidola nunupa keto ke nunuka hempa hengi naniiñpa, ngiimika Pinii ka aroh-aya biniiñlo 16#Miin 9.15. Jisu Kristo ka miira pa lyila Midomiyu atañ ko nyibu ka miigomi Pinii ka aya puyu mi ludupa, niimpalukoda Midomiyu atañka biniiñ mi larii ladopa, Darii Yajiyallo lo darii miibiidola. 17Kristo Jisu ko, hokoda, ngiiko hentii siina nanii do ngiika Pinii ka miigo miiniiñlo. 18#Rom 1.5; Miin 15.12; 21.19. Niimpalukoda ngiika henko lutema hangdrih hojalo niihna Kristo ngiimi bitii nii ludopa Midomiyu atañmi lulii giila dopa, miiniiñ luniiñ lo, 19#Miin 19.11; 2 Kor 12.12. kagiñnanii la kahotamo nyika harchichikelo, Darii Yajiyallo ka harchichike lo, hiikohopa Jerusalem hokii luri biila hikha Illyrikum lohepa ngo hikha Kristo ka ayapuyu mi lutii, 20#2 Kor 10.15-16. sitañ pa ngo ayapuyu luko niimi ngiika miigo pa khiibii tokula, nohna Kristo ka armyañ mi myamma ranii, hiilamakoda ngo kone ya miyu ka miikorho pencha bikiñdo, 21hojalo hiila ketola do,
“Mohlu kapa kendo nii mina mohmi ronge hetrḛ luko manii,
ho mohlu tala kendo nii mina ronge hetrḛ tapa manii.”
Pol ka Rom ho Ahdu Paka Hemmyonii
22 #
Rom 1.13. Siika sipake ngo kiirañ nunuko ahla mapa atiñ kotonii. 23#Miin 19.21; Rom 1.10-11; 15.32. Hojalo siisi, ngiiko hang miigo siika ganda so nyikuma, ho hempḛr anyañ diirii diiku nunuko ahdu paka henkunii, 24#Rom 15.28. Ngo hendo nunumi kapa todo hiila ngo Ispen ho bodupa impo biikoda, ho ngiika myodi bokoso nunulo hembyuñ kodupa, ronge ngo ichuchepa nunuka imbo niimi hempyo biito. 25#Miin 19.21; 24.17; 15.31. Siisi, hojalopa, ngo Jerusalem ho ilyi ke piniimiyu atañmi hembyuñ dupa. 26#2 Kor 8.1-5; 9.2; 1 Tes 1.7-8. Niimpalukoda Masedonia la Akaia nyi hempyo biidola bibyuñ tii arro atañmi piniimiyu atañka punko Jerusalem hoka dunii atañpa; 27#1 Kor 9.11. mohlu hempyo biine siimi miidupa, ho jije lusu dokoda mohlu siimi mohlupa miikiñdo loda, niimpalukoda Midomiyu atañ matiirḛ mohlumika Yajiyallo hoka lyaniiñ mi lache hapa ahdo, mohlu hopa drihpachi ka lyaniiñ mitrḛ mohlumi bikiñdo. 28#Rom 15.24. Hopa niida ngo siimi miipe talyi, ho siimi mohlumi biku lala niihna bikuñ bipa tiinii, ngo nunumi impo biila Spain ho inchi; 29#Miin 19.21. ho ngo chindo niida ngo nunuko ahchi ngo poteje Kristo ka lyaniiñ mi bagiila ahchi.
30Ngo nunumi yarlyi ke, anubarmii atañ, ngunuka Attoh Jisu Kristo la Yajiyallo ka heniiñ lo, tonge pa ngiika agiñho hembyuñ mompe nunuka Pinii mika kuniiñ ho ngiika piigopa, 31#2 Tes 3.2; Rom 15.25-26; 2 Kor 8.4; 9.1. niimpalukoda ngiimi Judia daka henje manii atañ kokii tiipya dopa, ho ngiika Jerusalem daka piniimiyu atañ paka miiniiñmi larii lake nendopa, 32#Rom 1.10; Miin 19.21. niimpalukoda Pinii ka henko jaho ngiimi nunuko hempyo biidola ahchi dopa ho nunuka agiñho dabii dola niti ridopa. 33#2 Kor 13.11; Pil 4.9. Chimie ka Pinii nunu hikha miilañ ruko dokiñ cho. Amen.
Currently Selected:
ROM 15: APATBSI
Highlight
Share
Compare
Copy
Want to have your highlights saved across all your devices? Sign up or sign in
Apatani New Testament - NITI GONTU
Copyright © The Bible Society of India, 2014.
Used by permission. All rights reserved worldwide.
