JOAN 13

Jisuke Bíkkelo Luyilsuna Kídíke Alem Arbínname

1Gíbong gíídí aníne. Jisu bí tani amosim mepakla delokke Abukelo gídíku longe píídak emla kénsuto. Tani amoso duuna agíke ami kídíem ayala, bí bulum agíke eerína ayangem lengkansuto.#13:1: Demangkom bí bulum yéyinlope ayato.

2Yume dotkéyem doduem, delo Simonke oo Judas Iskariot me uyue Jisume míírí míínyo dope meru líktubong. 3Abue takam atíem bíkke pauar gooralo meto delokke bí Shédí kelok aato delokke Shédí kelo gídakku emla Jisu bí kénsuto; 4depe iname bí dotké ekung delokke darepla, bíkke teyolo genam egem laabín sugeyéla, delokke bíkke ugíílo gamusako yétgeto. 5Depe irongem, bí ekulo asiem píkum pala bíkkelo luyilsuna kídí alem írbínla igeyéla bíkke yédgenam gamusalok dekedem molpítoku. 6Simon Pitorkíng bí aato. Pitor bí bím poto, “Ruutume no ngokke alem írbín dunía?”

7Jisu bí poyansuto, “Ngo ingkuem idudí nolu kénmang, idakkom méélamlo nolu kényéku.”

8Pitor bí “Demang, no edílokom ngokke alem arbín penamang,” emto.

Jisu bí poyansukai, “Ngo nolum írbín mamílo, nolu ngokkelo gímín gelamayé.”

9Delokrongem Simon Pitor bí poyansukai, “Ngok ale petom emmang ngokke alagem delokke atugem írbín toyika!”

10Jisu bí poyansuto, “írsu rongem tanie agí ale petom emmin mosudune; bíkke amíl tabude deedung. Delokke nolu deedung idokom nolu takamemang.” 11Kapeila séko bím míírí míínyo penade dem bí kénsuto, delokke dekepe ilamin mipilde deeyin mang emla potone.

12Buluke alem írbín rongem; bí egem gelangkula delokke agí dungkolo duutoku. “Ngokke noluke legape itonam agér sim nolu kéndonía?” emla bí bulum íngkíto. 13“Nolu ngom Saar delokke Ruutum emla gokdung, delokke de lujidung, kapeila derumin ngo. 14Supak ngo, noluke Ruutum delokke Saar bí noluke alem írbínto, nolukom akone akonke alem arbín mínsupe aido. 15Ngokke nolum ibinam kísape nolukom ipe aido emla kayii sukepe nolum lengkanto. 16Ngo nolum aruem podung, béérade sékote agí ruutumem botteyana kamang, delokke kotoki kídí dekom bím melíkna amidem botteyana kamang. 17Supak nolu sim atí kídísim kénkai, nolu sikesim imílo ayang igulem paayé.

18“Ngo nolum takamem pomang, ngokke ullennam kídíem ngo kénsudung. Idakkom si ngiitomem aromonape idung; ‘séko ngokke ettíngem dodune bí ngom mirupe aabomto.’ 19Si atí si píímang adape ngo nolum supak pobidung, demílomin si atí si pííyém Ngomino Bí emla nolu arope mííyéne. 20Ngo nolum aruem pobidung, séko ngokke melíknam taniem torík sududí ngomkom torík sudung; delokke séko ngom torík sududí ngom melík nemkom torík sudung.”

Jisuke Bím Míírí Míínyo Bompenamem Pokansuname

(Mt 26:20-25; Mk 14:17-21; Lk 22:21-23)

21Sikepe porongem, Jisuke aapí ainange genyinge ila bí pokanto, “Ngo nolum arope podung, noluke akonde ngom míírí míínyo lendak.”

22Bíkkelo luyilsuna kídíde kaamín sudola sékomedí bí pobom dune emla mínggo regosukai. 23Jisuke ayanam buluke luyilsuna akonde bím duupe sudola apim dobo sudungai. 24Simon Pitor bí “Bím tatkítola, sékomedí bí mandune” emla luyilsuna amidem poto.

25Jisuke keralo gubadola, Jisume “Ruutume, séko de amide?” emla bí íngkíto.

26Jisu bí pobito, “Ngo ettíng oleko ekulo ningnyom pala bím biyé, bímin de amide.” Delokrongem ettíng oledem ningnyom pala bí dem Simonke oo Judas Iskariot me bisuto. 27Judas bí ettídem doyéname Soitane bíkkíng angkai. “No ingkuem ipe míídudí menape ilangka,” emla Jisu bí bím poto, 28idokom apim dobosuna kídíde sim kapeila bím potodí dem tatkénna kamang. 29Judas bí murkong gadumem bomkolok, Doman aran legape ingkuem míítuadí dekedem redope demangkom opan kídíem atíko bidope, Jisu bí bím potuane emla ayokone mííto.

30Judas bí ettídem doropagem gílenkai. Delo de yume kaamue.

Aní Ngiitome

31Bí gíroyédem Jisu bí poto, “Supakmin Tanike Ue Shédíke angun ralnamem bíkkelok lengkandune 32Bíkkíng Shédíme yidge kumílo, Shédíkom agíke keralo bím yidgeyé, delokke menape bím yidgeyé#13:32: Ayokon kerangke agome “Shédí bí angun ralnamem bisutuamilo,” emnam si kamang. 33Ngokke ome-oo kídía, ngo nolukíng anyongo komino duupoyéne. Nolu ngom matayé, delokke ngokke Judai kídíem ponam kísape, supak nolumte podung; ngo ingkolo gídakdí, delo nolu aalamayé. 34Ngo nolum aní ngiitomko bidung. Nolu ayabosu langka. Ngokke nolum ayanam kísape nolute akone akonem ayang bosuruupe aido. 35Nolu ayang bosumílo ami takame nolu ngokkelo luyilsuna kídíe emla kényé.”

Pitorke Possu Penamem Jisuke Pobiname

(Mt 26:31-35; Mk 14:27-31; Lk 22:31-34)

36Simon Pitor bí “Ruutume, no ingkolo gíyéne?” emla Jisume tatkíto.

Jisu bí pobito, “Ngo ingkolo gídakdí supak nolu delo gímín gelamang, idakkom méélamlo gímín geyé.”

37Pitor bí íngkíto, “Ruutume, ngo supak kapeila nokkíng gímín gela mayéne? Ngo nokke legape ngokke turnamem bisupe.”

38Delokrongem Jisu bí poto, “No aropakpe nokke turnamem ngokke legape bisuyénía? Ngo nom aruem pobidung, peroge kokmang adape no ngom lengum kokai possuyé.”

Currently Selected:

JOAN 13: adiBSI

Highlight

Copy