ROMEMAI 2
2
Tingwang Gu Ladjan
1 #
Mt 7.1; Lk 6.37. Singnamai yo, nang maitu ladjan thiujiu ma? Ladjan thiumai khatna tudi kuak khai bira ha-e. Palamra nangniu maitu ladjan thiubo gasu naronna natudi ladjan thiu mide, palamra maitu ladjan thiubo nangniu nalunlung gasu haikumbose kam mibo-e. 2Haikumbo kam maidungtu Tingwang niu pagu majiboniu ladjan thiu-e chiubo aliuniu si-e. 3Chiudi singna yo, nangniu maidung riga ladjan thiu bambose naronna nariga ladjan thiujiu bambo-e! Tingwang gu ladjan gasu nangra marenlu bui-e chiu maning jiuma? 4Maksai Tingwang gu kawibo, khengsibo khatdi njangbo situ nangniu suinimak jiuma? Tingwang haira lungsasibo-e chiubo pachangjiu nang sibambo-e, palamra nangniu lungli wangra paniu matanjiu bambo-e. 5Chiudi nalung tanbo khatdi lukhai nimakbo lungchun siniu, Tingwang gu lungpom khatdi pagu majibo ladjan madupadbo Tingmikga naronna nagu chariubo situ pi nkiu khaijiu bambo-e. 6#T.Lui 62.12; Kad 24.12.Palamra Tingwang niu mai hinatu, pagu-gu tienkam saisuijiu chaphijeng pikhai rabo-e. 7Mai khangsianiu kawibo ngam kamjiu, kendibo, chakhuang thiubo, khatdi halan makbo ringtingtu phiujiu bamme; paliutu Tingwang niu tingtheng ringbo ringting pikhaibi rabo-e. 8Khangsianiu paliuleng ronna sijiu khatdi kamajibo situ lukhai makjiu kamaobo gase tadjiu bamme; sikumbo mai riga Tingwang niu palungpom nai lungnuat mise runkiu khai rabo-e. 9Kasa kammai hina khuga chariu khengbo khatdi thiuniubo, raiboga Jehudi mai khuga, sibo saiga Nkengmai khugadi wangrabo-e. 10Chiudi kawi kammai hina khuga Tingwang niu raiboga Jehudi mai khugadi, Nkengmai khugadi kendibo chakhuang thiubo khatdi agi-manaibo hai pikhai bine. 11#Taj 10.17.Palamra Tingwang niu mai hinatu machamjiu ladjan thiune, pakhuga chamiu-mareng thiubo ha-e.
12Nkengmai khuga Mose gu Tacheng-tajai habam niu-e, Tacheng-tajai gasu paliu habam niu-e khatdi nuan tenbam niu-e. Jehudi mai khuga Tacheng-tajai bamniu-e, sichiujiu paliuniu nuan kam mibose Tacheng-tajainiu ladjan thiu-e. 13Palamra Tacheng-tajai chiulu maidungse Tingwang masuangga majibo makge; chiudi Tacheng-tajai majaimai tuse kam maji khaibo-e. 14Nkengmaira paliu khuga Tacheng-tajai ha-e, chiudi paliugu tienkam gasu, kamaji ka-nkhui sibo siniu paliu khuga Tacheng-tajaigu chamtan bambo kumme. 15Paliugu lunlungniu lenbora Tacheng-tajaigu chamtanse paliu lungga raokhai mide. Pawan wan-ga paliu makum niudi, paliutu kammao khaibo khatdi pakak-kakga paliu lam chapkhaibo donniu paliu maningse niudi majibose lenkhai-e. 16Sichiujiu agu Kawicham saisuijiu, kanambo Tingmikga Tingwang niu Jesu Khrista pen gasu mai hinagu mahimbo lungchun hinase ladjan thiu rabo-e.
Jehudimai Nai Tacheng Tajai
17Nang dechiu bamlo? Naronna natu Jehudimai ku-e, sichiujiu nangra Tacheng-tajaiga mangiu khai-e chiujiu Tingwang lamga tasao thiu-e. 18Nangniu Tingwang luni silujiu, khatdi Tacheng-tajai gasu majibose katilujiu kadalude. 19-20Nangniu pamik tiatmaitu majang khaibo khatdi tamiuboga bambo maidung leng kabenbo thiura, kapang maitu katipao khatdi wasi kamak maitu katipao khatle chiubo pachangjiu sisai Tacheng-tajaiga nang wasimai khatle chiubo sira-e. 21Nangniu maidungtu katikhaibo kum, naronna natu katikhai lakma? Nangniu din-e, “Aga mane” chiujiu dinron-e, chiudi nangra aga rama? 22Nangniu din-e, “Makha mane” chiudi nangra makha rama? Charamengtu marengbo nangniu, charaky gasu aga rama? 23Tingwang gu Tacheng-tajai lamga nangniu wasao thiulujiu, Tacheng-tajai situ kampang lujiu Tingwang khuga mangambo phungwang rama? 24#Isa 52.5.Masanbo ariakniu dinbo kumbo-e, “Jehudi mai naliu jengniu, Nkengmai ruangga Tingwang zantu din masa bamme.”
25Naliuniu Tacheng-tajai piusai chagi rombo pageng bamme; chiudi naliuniu Tacheng-tajai piumak sai chagi rombo pageng ha-e, khatdi naliuniu chagi rombo hai rommakbo kumbo-e. 26Sijengniu chagi rommakbo Nkengmainiu Tacheng tajaigu chamtan hinatu piusai, Tingwang niu patu chagi rommai khat kumjiu lukhai lakma? 27Sichiujiu palunlung gasu chagi rommak mainiu Tacheng-tajaitu wangtang khaisai, raokhai mibo Tacheng-tajai khatdi chagi rombo thiakse nakhuga bamliudi, Tacheng-tajaiga maobo natu paniu ladjan thiu lakma? 28Palamra lenlam Jehudi mai thiubo hainiu Jehudi mai makge, sigasu lenlam ngaobo, chapumga chagi rombo hainiu chagi rombo makge. 29#Taj 30.6.Chiudi palung lamsu Jehudi mai thiubora Jehudi mai-e, haise raokhai mibo Tacheng-tajai gasu makge, chiudi Tingwang Hiupuina niu kamkhaibo tienkam si-e. Haikumbo mai siniu chamai khugasu makjiu Tingwang khugasu thuonbose daorabo-e.
Currently Selected:
ROMEMAI 2: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
