JOHAN 15

Jesuq Ka Chiisan Spiqraü

1“Ngi ahata chiisan spiqraü chong. Kiimaq i We kata spiqro chhintsiiti we. 2Apaiq raq i tsung na, atsi ahühüti i kü i ko thun kriika, angei riibaiqtlo. Kiimaq, atsi asisiti i kü i ko thun kriika, aheawiq maq tiisii chhintsii wantlo. Raüta, atsi ango ka apapa she tiitsi ngo wan miitu, ashun thun kriika, aton riibaiqtlo. 3I We bomtsi namshiq ma chongkuq tiikang kriiraq, ümchaü namshiq khum ka, atiisiike wishe. 4Namshiq ka i dü na chamshat miili siwan lili ronglaq. Kiimaq ngi riimin namshiq ka, i dü na tiichamshat miili mitiisi kang. Akü ako riika, achong na chamshat riihü miika, apaiq asiilii miika tsingo lot mak. Akü ka spiqraü chong na chamshat maq siwan lili raü jiitiq, atsi ango ka midong man wanlot. Ikiikhiisii hali, namshiq kiimin i dü na chamshat maq siman riihan jiila, tsingo wanlot man mirhan.”

5“Ngi ahata spiqraü chong. Namshiq ka i kü i ko thun. Juwa i dü na chamshat maq sitlaq, kriiti raq atsi ango, pahea mitsi ngo. Ngi ahü miika, namshiq raq jamlai phan jaqsham min lot man. 6Juwa i dü na chamshat maq simak, kriiti ka, spiqraü chong wa akü ako ka adaq riibaiq tlaq, ikha, adaq mirbaiq. Raüta, ashin mirki. Kiimaq kriithun ka, adam na riichom phong raüta, wacha mong niishe michaq baiq. 7Shatmaq, namshiq ka i dü na chamshat maq siwan lili riihan jiila, kiimaq i bomtsi ka namtsan mong na cham wan raü la, namshiq raq i We jaq wa jamlai phan wa mijaü han, kriika namshiq ma mikuq. 8Namshiq ka apapa tsingo wan lili riihan jiitiq, i We khushü ka mijong wan. Krai mren, namshiq ka, awongsii i jaqshisetiim miishe mija wan han. 9I We raq ngi ka jamkho lungwii tlaq kiikhiisii hali, ngi riimin, namshiq ka kai lungwii tiikang. Krai mren, namshiq ka i wokhong na aheawiq maq, si ronglaq. 10Ngi ka i We wokhong na, apaiq aming lang lata sitiikang. Krai mren, apaiq mangchan wokhong na sitiikang. Ikiikhiisii hali, namshiq min ngi aming kra lang lanta, i mangchan wokhong na sihanla, namshiq ka i wokhong na misi han.”

11“Ngi raq namshiq ma ara bomtsi chongkuq tiipha arka, ngi ka jamkho chochi tiikang, kiikhiisii, namshiq tsan mong niimin, chochi raq aliim ale she mima wan laq nguta chong kuq tiikang. 12Riita ngi raq namshiq ma aming kuq tiikang bomtsi ka ara: Ngi raq namshiq jamkho lungwii tiikang, kiikhiisii, namshiq liipan niimin, riilung riiwii si ronglaq. 13Maiq weshi raq, akongtibi ma lungwii raüta, apaiq miisaq kuqtlaq, kriithaq na lungwii tsii ajong ka ahü she. 14Kiimaq ngi raq namshiq ma jamlai aming wa kuq tiikang kra namshiq raq lang wan lili riihan jiika, namshiq ka i khi i lu wetiim miishe mija wan han. 15Ngi raq namshiq ka, disetiim nguta ngu mang she. Ara jamkhano chongtiikang ngukla, dise riika, atijong we jaq tho ka lap mak. Ngi raq namshiq ka disetiim ngo rii na, kongtibi ngutiishe ngutiikang. Ara jamkhano chongtiikang ngukla, i We jaqtho ngi raq ümchuwa lap tiikang kriika, ngi raq namshiq ma wiita phanchan kuq kang. 16Namshiq raq i puk na nyap wan miitu, ngi ka ritwan man dea. Shatmaq, ngi raq namshiq ka tsea tsiiq wan kang. Lata, namshiq ka shong wan kang. Arka namshiq rilung jaqsham na, pattup thenkimak chang phan, atsi ango pahea mitsi ngo laq nguta, ngi raq namshiq ka shong wan kang. Krai mren, i mang na namshiq raq ajaü jaü kra, i We raq namshiq ma mikuq. 17Riita ija, ngi raq namshiq ma akhek aming ashi kuq tiikang arka ara: Namshiq liipan na riilung riiwii si ronglaq.

Mangjong Maiqse Raq Namshiq Ngengtlo

18“Mangjong maiqse raq namshiq ka ngeng seng wan kiiphan la, namshiq mingeng wan shaq na, tsangshiq raq ngi kongkhu ngengphato nguta bomtsi kra sap rong laq. 19Namshiq ka phiijawa rii sitlan ngu raü ka, tsangshiq raq namshiq ka tsangshiq kongtisii nguta milungwii. Shatmaq, namshiq ka mangjong hiq wa, ngi rii she nguta, ngi raq tsea tsiiq wan kang. Namshiq ka mangjong hiq rii riimak she. Arkha miitiina, ümchaü mangjong maiqse raq namshiq ngeng tlaq. 20‘Dise ngutlaq kriika atijong we thaq na ajong ka riimak,’ nguta bom tiihap hong chong tlaq bomtsi ka ngi raq namshiq ma chong kuq pha she ihata. Tsangshiq raq ngi santla tiichamchao wantaq jiika, namshiq kiimin mitiichamchao wan dongdii. Tsangshiq raq i bomchong ka tai raüta lang wantaq jiika, namshiq bomchong kiimin mitai wan, raüta milang wan. 21Shatmaq, namshiq ka i sengi ngo kha maq, tsangshiq raq namshiq ka mihaihii wan. Ara jamkhano chongtiikang ngukla, tsangshiq raq ngi tiikaiti we ka juwa sap mak. 22Ngi ka ara mangjong hiq na saüki mang dea ngu raü jiika, kiimaq trahokuq kimang dea ngu raü jiika, tsangshiq tiishut chang lam ka ahü mirwa. Shatmaq, ümchaü sanha, ngi ka saüki lata, tsangshiq ma trahokuq wan kang she. Kriikha maq, tsangshiq ngarai bu howan tlaq kra miitu, tsangshiq raq maiqmii khum tiikhe kiqkhii chang lamlu ka ahü she. 23Jurwa ngi shulii tlaq, kriiti riika, i We kiimin shulii tlo. 24Ngi raq tsangshiq makki na, maiq ahinti jurmin sham wanlot mak chang phan jaqsham shamkuq kang thun kriika, shamkuq wan mang dea ngu raü jiiriiwe kla, ija, tsangshiq shut chang ngarai min ahü mirwa. Shatmaq, ümchaü sanha, tsangshiq raq kra thun jaqsham ka wiita chhi wanto she. Raüta, tsangshiq raq i We nainai wiita she ngeng tlo. 25Riita, ara chongtiikai tsangshiq raq ngi ngeng tlaq arka, ümsiimiiwa tsangshiq Thungtri lakdap na chongthü je she dongdii riito. Kra, bomtsi tiithai mai thütaq kra tiiku wan miitu she tsangshiq raq ngi ka ngeng tlo. Tsangshiq Thungtri lakdap na, ‘Tsangshiq raq ngi ka kha ahü na ngengsiqto,’ nguta waiqto.”

26“Riita, Khrumti we ngutlaq ka misaüho she. Apaiq ka Asii Wenyi. Apaiq ka Awe pha wa kitlo. Apaiq raq Shiikeawe ka maiqse rai mang mitriisap kuq wan. Kiimaq, Shiikeawe tsantsii ka maiqse ma tiichhikuq wantlo. Ngi raq apaiq ka Awe phawa, namshiq phana mitiiki kang. Kiimaq apaiq ka ngi hakhi ma jaraüta, ngi tingkhu wa bom ka, namshiq ma michong phan kuq wan. 27Kiimaq, namshiq riimin la, ngi hakhi ma jawan lanta, ngi tingkhu wa bom ka maiqse ma michong kuq han. Ara jamkhano chongtiikang ngukla, namshiq ka ngi raq trahoke wan jaqsham phaho kang ranaiq miiphü she, ngi rai kongshi maq jaqsham wan dam lan kata.”

Currently Selected:

JOHAN 15: TANGSBSI

Highlight

Copy