JOHAN 16

1“Ngi raq namshiq ma ara tsii chongkuq tiipha arka, namshiq kamtsantsii thaq baiq man chang miitu chongkuq tiikang. 2Tsangshiq raq namshiq ka sinagok wa ashleq mirbaiq. Kiimaq akhing ka akha misaü wan, maiq ashi ra raq, namshiq ka tsatbaiq raüla, apaiq raq kriika Shiikeawe jaqsham tiikang nguta mitiima. 3Tsangshiq raq, Awe nai ngi ka juwa kra sap mak kha maq, namshiq ma ara chong tiikang chamchao thun ara mitiisaü wan. 4Riita, ija, ümchaü ngi raq namshiq ma, ara tlu na tsii chongkuq tiipha arka, ümtiikiiwa tsangshiq raq namshiq ka tiichamchao wan akhing she saüwa jiiq, kra akhing na, namshiq raq arka apaiq raq man na nashiq ma honlam bom chongkuq taq irshe dea kuwanto ngutiishe mitak han.”

Asii Wenyi Jaqsham

“Man na, aphaji niika, ngi ri namshiq rai adam na sishat. Kriikha maq, ngi raq namshiq ma arthun honlam wan bomtsi arka chongkuq mang miili thü kang. 5Shatmaq, ümchaü sanha ngi ka, ngi tiikaiti we phana wawan nong akhing she saü wato. Shatmaq, namshiq phong wa weshi ra raq dongdii min, ngi ma ümbana wawan wa nguta bom ka waiman shaqli. 6Riita, ümchaü ngi raq namshiq ma ara bomtsi ara chongkuq phata, namshiq ka tsanbi tataq she shiri tlan. 7Shatmaq, ngi raq ara bomtsi chongtiikang arka tengteng: Ngi arwa wawan tiikang arka, namshiq ma ahea tingkhu wawan tiikang. Ara jamkhano chongtiikang ngukla, ngi ka wawan mang ngu raü jiika, Khrumketi we ka namshiq phana saüki mak miraq. Shatmaq, ngi wawan ha jiika, ngi raq apaiq ka namshiq phaniishe mitiikiha. 8Kiimaq, apaiq she saüki raüla, apaiq raq mangjong maiqse ka ngarai maiqsetiim dea, kiimaq tsangshiq raq kechu rilung lamphan ka sap mak dea, kiimaq tsangshiq raq Shiikeawe tri kappe kiimin sap mak dea, ashut dea sitlo ngutiishe, tsangshiq tiishut wan hakhi she mikuq. 9Tsangshiq raq ngi ma kamwan mak sitlaq, kra kata tsangshiq ngarai bu. 10Tsangshiq raq kechu rilung nai tingting jaqsham ka sapmak, ajiq tiimatlo. Ara jamkhano chongtiikang ngukla, ngi ka i We phaniishe wawan nong tiikang. Kiimaq, namshiq raq ngi ka chhi man she mirhan. 11Kiimaq, tsangshiq raq Shiikeawe raq tingting kappe sham tlaq kra sap mak, ajiq tak wan tlo. Ara jamkhano chongtiikang ngukla, Shiikeawe raq ara mangjong hiq rümti we kha ka ümchaü aphowi she. Raüta, apaiq ka atiishut baiq wishe. Shatmaq, tsangshiq riika kra bomtsi kiimin sapphaq mak miili sitlo.

12“Ngi raq namshiq ma pahea dea bom chongke chang asi shaqli. Shatmaq, ümchaü ka namshiq ma liichum tsin hea tak lot man mirhan. 13Shatmaq, ümtiikiishe wa, Asii Wenyi ka saüki jiiq, kra akhing niishetiq apaiq raq, namshiq ma Shiikeawe tingting rilung bomtsi thun kra mitiichhi kuq wan. Apaiq riishetiq namshiq ma teng man tlaq bomtsi thun liichum kra arang chong maq thu raütiishe mitru chongkuq wan. Apaiq riika, apaiq tsiitsii maq chong kuq mak. Apaiq raq jamlai wa ani maq tai tlaq, kriili namshiq ma michong kuq. Kiimaq, rawiichii akhing na jamlai phan saüho chang wa sitlaq, kriithun bomchong kra namshiq ma michongkuq. 14Apaiq riika, i khushü jonglu ümtinkhan wa sitlaq kra, namshiq ma mitiichhi kuq. Ara jamkhano chong tiikang ngukla, ngi raq jamlai wa chong tiikang, kriili apaiq raq lamho raüta, namshiq ma michong kuq. 15I We raq ümchu wa rüm tlaq, kriika ngi rii. Krai mren, ngi raq Asii Wenyi ma jamlai wa kuq tiikang, kra apaiq raq lamho raüta, namshiq ma michong kuqki.

Aho Ajü Nai Acho Achi

16Jesuq raq, “Jaqlo liipan niili she, namshiq raq i sham ka chhi man she mirhan. Kiimaq, heashise sijai maq hali, namshiq raq i sham ka michhi nong han,” nguta ajaqshisetiim ma bom ka chongkuqto.

17Tsangshiq raq ara taiwi raütiishe, “Riita, apaiq raq nashiq ma, ‘Jaqlo liipan niili she, namshiq raq i sham ka chhi man she mirhan. Kiimaq heashise sijai maq hali, namshiq raq i sham ka michhi nong han,’ nguta chong tlaq arka, jamlai ngo nang wiinya? Kiimaq apaiq raq hali, ‘Arka ngi i We phana wawan tiikang kriikha maq miraq,’ nguta chong tlaq ahata. 18Riita, ara, ‘Jaqlo liipan niili she,’ nguta chongtlaq arka, jamlai ngo nang wiinya? Apaiq raq jamlai ngo nangwa chongtla riila, nashiq riiri saplot mai!” nguta ajaqshisetiim wiijamti liipan na bom ka riiwaito.

19Jesuq raq, tsangshiq riika apaiq ma bom tiitsang wainong tiima tlo nguta asap. Kra ningkhan she, apaiq raq tsangshiq ma bom ka akha hali tlam chongkuq nongto. “Riita, ngi raq, ‘Jaqlo liipan niili she namshiq raq i sham ka chhi man she mirhan. Kiimaq hali heashise sijai maq hali, namshiq raq i sham ka michhi nong han,’ nguta chong kang bomtsi kra tiitsang wai ngutiisha namtsam liipan na bom ka riiwai tlan? 20Ngi raq namshiq ma chongtiikang arka tengteng: Namshiq ka maaho maanyi she mirhan. Shatmaq, mangjong maiqse ka chojong chise miraq. Namshiq ka tsanbi taqtaq mirhan. Shatmaq, namshiq tsanbi hosi ka chojong chise na mitiiwiiq wan. 21Ase chii nam nam, wiihan nyung kriika, nowüchhi chamchao akhing she saü wantlo nguta chapakhiq sitlo. Shatmaq, nowüchhi lot jai she ka, apaiq chamchao kiimin alaq she riibaiq tlo. No ashi raq, mangjong hiq na rawii she chhito nguta, kai chochitlo. 22Ara chongtiikang akha, namshiq miimin akhing she saü wato. Namshiq ma ümchaü ka tsanbi hosi akhing saüwato. Shatmaq, ngi ka namshiq rai mirhum nong kang. Kiimaq, namshiq ka khoqriiq shishiiq miili she misi wan han. Kra namshiq tsan mong wa chochi tsii kriika, jurmin khot-ho lot mak she miraq.

23“Ümtiikiiwa kra akhing she saü wan jiiq, namshiq raq i jaq wa jamlai min jaü wan man she mirhan. Ara chongtiikang arka tengteng: Awe jaq wa namshiq raq, i mang na jamlai phan wa mijaü han, kriika mikuq. 24Ümchaü niitaq, namshiq raq i mang na jamlai phan min jaü man shaqli. Jaürong laq, namshiq raq milap han. Krai mren, namshiq chochi kiimin, alüm alei she mima wan.

Jesuq Raq Mangjong Hiq Ka Mitang Wan

25“Ngi raq namshiq ma, shiiton bom maq arthun ara chongkuq kang she. Shatmaq, akhing she misaü wan, ngi raq bom chongke ka shiiton bom miika chong mang she. Shatmaq, ngi raq namshiq ma, Awe manphan ka liitatat hea she michong kuq kang. 26Kra ranaiq she saü wan raüliika, namshiq raq i mang na, apaiq jaq wa mijaü han. Kiimaq, ngi raq namshiq miitu apaiq jaq wa, tiithongshi hali jaüke nong ngo min rarai mak she miraq. 27Ara jamkhano chongtiikang ngukla, Awe apaiq raq namshiq ka kai lungwii tlo. Apaiq raq namshiq lungwii tlaq arka, namshiq raq ngi lungwii tlan kha maq lungwii tlo. Kiimaq, ngi ka Shiikeawe pha wa akiha dea nguta kam tlan kra kha maq, apaiq raq namshiq ka lungwii tlo. 28Ngi ka i We pha wa akiha. Kiimaq, ara mangjong hiq na kikang. Kiimaq, ümchaü ka, ngi raq ara mangjong hiq ara baiqthü lata, i We phana wawan nong she.”

29Kiijiishe, ajaqshisetiim raq apaiq bom ka treto, “Riita, ümchaü ümniiraq liitatat miishe bom ka chongkuq tlaü. Shiiton bom miika riimak she. 30Ümchaü ka, naishiq riimin sap wan kai she. Ümniiriika maiqse tsan mong na tiima tsantsii ümchuwa sitlaq, kriika wiita akhon haü siisaq. Maiqse raq ümniima awai aso wan ngo min rarai mak. Phanrap ka ümniiraq asap haü siisaq. Ara chhi wan laitiishe naishiq raq ümniika Shiikeawe pha wa aki haü dea ngutiishe kamwan tiikai.”

31Kiijiishe, Jesuq raq tsangshiq bom ka treto, “O riita, namshiq riika ümchaütiq sha ngi ma kam tlan ngu kai? 32Ngi chongpha, akhing ashi she misaü wan, sha kra akhing ka ümchaü saü wato she. Namtsam thun ka wiita, pongpin riipin she mitiipin baiq. Kra, lanta, maiqmii jam niishe mipin wan han. Lanta, ngi ka ngi laqlaqse lishe mimiim baiq thü han. Shatmaq, riikhaqli miika, ngi ka ngi laqlaqse li ka riimak. I We ka ngi rai asi. 33Ngi raq namshiq ma ara bomtsi chongkuq tiipha arka, namshiq ka ngi rai pumshi hanshi maq silanta, hansang maq misi laq nguta ngo maq chongkuq tiikang. Mangjong maiqse raq namshiq ka mitiichamchao wan. Shatmaq, srea nola ma ja ronglaq! Ngi raq mangjong hiq ka tang kang she!”

Currently Selected:

JOHAN 16: TANGSBSI

Highlight

Copy