Lizsij dih Gaihcij 17
17
Gozlij#17:0 ‘Gozlij’ couh dwg naeuz youq gij ok nyouh vunzsai mwnq gvej di naeng he okdaeuj. guh geiqhauh
1Yaqbwzlanz ndaej goujcib gouj bi mwhde, Yehhozvaz yienh hawj de raen, doiq de naeuz: “Gou dwg akak rengzrengz cauh gwnzmbwn caeuq lajdeih sojmiz hih gaiqgaiq cungj ndaej guh daengz dih Cangqdiq. Mwngz ijaeu dingq gou gaen gou, ij guh boux vunz cix soh cix lauxsaed he. 2Yiengq gou couh dingh gij he hawj mwngz, couh dwg hawj doengh daih gajlaeng mwngz fat lailai hwj hwngqhwngq seiqseiq bae.”
3Yaqbwzlanz dingq daengz dineix le, couh bomz roengz doem bae sax de. Cangqdiq caiq naeuz: 4“Gou dingh hawj mwngz hih couh dwg: Mwngz ndaej guh baenx haujlai haujlai aen minzcuz dih cojgoeng. 5Daj seizneix doxbae, gij coh mwngz mbouj caiq heuh Yaqbwzlanz laem lo; ij gaij coh heuh Yaqbwzlahhanj#17:5 ‘Yaqbwzlanz’ dwg vunz ‘soenhgingq dih daxboh’ dih iqswh; ‘Yaqbwzlahhanj’ dwg ‘fanh vunz dih daxboh’ dih iqswh. ndaej lo, aenvih gou gaenq laeb mwngz guh fanh minzcuz dih daxboh lo.” 6Cangqdiq youhcaiq naeuz: “Gou gaengjdingq ij hawj doengh daih gajlaeng mwngz fatdad lailai hwj, hwngqhwngq seiqseiq bienqbaenz haujlai haujlai aen minzcuz. Doengh daih gajlaeng mwngz caemh miz vunz dang vuengz. 7Gou caemh ij yiengq mwngz caeuq doengh daih gajlaeng mwngz baujcingq; gij baujcingq neix dwg cien nienz fanh daih cungj mbouj bienq he, couh dwg gou ij guh Cangqdiq mwngz caeuq Cangqdiq doengh daih gajlaeng mwngz. 8Mwnq dieg mwngz seizneix doz youq he, couh dwg baenx cenz Gyahnamz hih dieg, gou caemh ij nyok hawj mwngz caeuq nyok hawj doengh daih gajlaeng mwngz, hawj faenhsou ndaej yungjyenj aeu ma guh gyadangq; gou caemh dwg Cangqdiq gyoengqde.”
9Cangqdiq youhcaiq doiq Yaqbwzlahhanj naeuz: “Mwngz caeuq doengh daih gajlaeng mwngz ijaeu hengz gou dingh hawj faenhsou hih, 10couh dwg faenhsou sojmiz hih vunzsai cungj ij gozlij; gij neix couh dwg gou caeuq mwngz caeuq doengh daih gajlaeng mwngz dingh hih gveihdingq. 11Faenhsou cungj ij ngaiz gozlij; gij neix couh dwg geiqhauh gou yiengq faenhsou soj baujcingq dih baengzgawq. 12Seiqseiq daihdaih sojmiz hih vunzsai, mboujguenj dwg youq ndaw ranz seng hih cixnaeuz dwg aeu ngaenz daj rog cawx ma hih, fanjcingq ngamq seng okdaeuj ndaej daengz daixbet ngoenz hih, cungj ij ngaiz gozlij. 13Youq ndaw ranz seng he caeuq aeu ngaenz cawx ma he cungj ij ngaiz gozlij; yienghneix, couh youq gwnz ndang faenhsou miz geiqhauh, geiqhauh hawj faenhsou seiqseiz ndaejgeiq gou yiengq faenhsou soj baujcingq hih cien nienz fanh daih mbouj bienq hih gij baujcingq mwnq. 14Hoeng, gij vunzsai mbouj gozlij hih couh mbouj suenq aen minzcuz mwngz dih vunz. Mbouj danhcij naeuz yienghneix, vanzlij caiq ngaiz boenq deuz, mbouj hawj de dep, aenvih de mbouj soenhsouj gij gveihdingq gou.”
15Cangqdiq vanzlij caiq doiq Yaqbwzlahhanj naeuz: “Mwngz mbouj ndaej caiq heuh mehyah mwngz heuh Sajlaiz laem lo; gou ij gaij coh hawj de heuh Sajlah lo.#17:15 ‘Sajlaiz,’ ‘Sajlah’ cungj dwg ‘gunghcij’ dih iqswh. 16Gou caemh ij soengq fuk hawj de, hawj de seng daeglwg he hawj mwngz; doengh daih gajlaeng de caemh fat lai hwj bienqbaenz haujlai haujlai aen minzcuz. Doengh daih gajlaeng de caemh miz vunz dang vuengz.”
17Dingq daengz neij le, Yaqbwzlahhanj couh bomz roengz doem bae sax de, caemh caegcaeg riu, ndaw sim de gag naemj: “Bak bi hih vunz laux cungj lij ndaej miz lwg haj? Sajlah gaenq ndaej goujcib bi lo, vanzlij ndaej seng lwg haj?” 18Yaqbwzlahhanj mbouj sinq, couh doiq Cangqdiq naeuz: “Gou naemj, vanzlij dwg mwngz lai soengq fuk hawj Hijsizmajliq suenq lo.”
19Hoeng, Cangqdiq dauq han naeuz: “Mbouj hah! Mehyah mwngz gaengjdingq ndaej seng daeglwg he hawj mwngz; mwngz caemh ij an coh hawj de heuh Hijsaj.#17:19 ‘Hijsaj’ dwg ‘de riu’ dih iqswh. Gou caeuq mwngz soj dingh hih, caemh caeuq Hijsaj caeuq doengh daih gajlaeng de yungjyenj dingh roengzbae mbouj bienq. 20Gangj naeuz Hijsizmajliq, gou caemh dapwngq mwngz, dapwngq mwngz soengq fuk hawj de, hawj de miz cibngeih daeglwg. Cibngeih daeglwg neix caemh dwg ndaej dang vuengz, doengh daih gajlaeng de caemh ndaej fatdad lailai hwj bienqbaenz aen guek hunghung he. 21Hoeng gou naeuz mwngz ni hax, daengz bimoq hih mwhneix, Sajlah gaengjdingq seng Hijsaj hawj mwngz. Gou caeuq mwngz soj dingh hih caemh dwg caeuq Hijsaj dingh hih.” 22Cangqdiq gangj doenghgij vah neix sat le, couh bae lo.
23Couh youq ngoenz mwnq, Yaqbwzlahhanj couh ciuq Cangqdiq raengq hih yienghmwnq bae guh; de hawj daeglwg de Hijsizmajliq caeuq ndaw gyahcuz de sojmiz hih vunzsai, mboujguenj dwg youq ndaw ranz de seng haj cixnaeuz aeu ngaenz cawx ma hih, cungj ij gozlij. 24Mwh Yaqbwzlahhanj gozlij mwhde, de ndaej goujcib gouj bi. 25-27Mwh Hijsizmajliq gozlij mwhde, de ndaej cibsam bi. Couh yienghneix, ndaw ranz Yaqbwzlahhanj sojmiz hih vunzsai, mboujguenj dwg youq ndaw ranz de seng haj cixnaeuz aeu ngaenz cawx ma he hih, [26b]cungj caemh caeuq de doxcaemh ngoenz he gozlij.
Currently Selected:
Lizsij dih Gaihcij 17: YBNT
Highlight
Share
Copy
Want to have your highlights saved across all your devices? Sign up or sign in
© New Bridge Publishing Company Limited
