Lizsij dih Gaihcij 18
18
Sam boux vunzseng
1Miz ngoenz he, mwh ceiq ndit ceiq hwngq hih mwhde, Yehhozvaz youq byozfaex hung Manqliq mwnq yienh hawj Yaqbwzlahhanj raen. Mwhde Yaqbwzlahhanj dwg naengh youq bakdou cangqbungz he. 2De sawqmwh ngiengx raeuj hwnjdaeuj, yawjraen miz sam boux vunzsai ndwn youq doiqmienh de, yiengq de couh nyungjnyat riq goqbae coh gyoengqde. Daengz dangqnaj gyoengqde le, couh bomz roengz doem bae sax gyoengqde, 3naeuz: “Bouxcawj gou hax, gou dwg bouxhoiq mwngz. Danghnaeuz mwngz yawj ndaej hwnj gou nex, couh cingj mwngz youq dineix; 4daengj gou, bouxhoiq mwngz, bae aeu di raemx ma hawj faenhsou swiqswiq ha,#18:4 Mwhde gij vunz daih hek dwg yienghneix guh; yienghneix cij dwg yawj bouxhek dij. youq laj go faex yietyietbaeg. 5Gou caiq dawz di gij gw he daeuj hawj faenhsou gw; hawj faenhsou gw le haemq miz singjsaenz byaij roen. Faenhsou giqyienz daeuj daengz gou, bouxhoiq mwngz neij lo, couh hawj gou daih faenhsou bax.”
Gyoengqde dingq le, couh han naeuz: “Ndaej hah, couh ciuq mwngz gangj hih yienghmwnq bax.”
6Yiengq Yaqbwzlahhanj couh vaiqdi nyungjnyat riq haeuj cangqbungz maj doiq Sajlah naeuz: “Mwngz vaiqdi aeu samcib gaen#18:6 Dineix ndaw yienzvaenz dwg naeuz ‘sam siqyaq.’ ceiq ndei dih mbamienh, gaenx ndei hwj guh bingj.” 7De naeuz gawq neix sat le, youhcaiq riq haeuj lanz cwz bae, genj aeu duz cwzlwg ceiq biz ceiq oiq he ma hawj bouxhoiq de gaj hwj loengh byaek. 8Loengh ndaej le, Yaqbwzlahhanj caemh dawz niuznaij hah, naijsoemj hah, caeuq noh cwzlwg hah daeuj hawj gyoengqde gw. Gyoengqde gw mwhde, bonjfaenh de ndwn youq laj go faex henz gyoengqde, daih gyoengqde.
9Gajlaeng, gyoengqde cam de naeuz: “Mehyah mwngz nej?”
De han naeuz: “Ox, de youq ndaw cangqbungz.”
10Yiengq ndaw sam boux mwnq miz boux he naeuz: “Daengz bimoq hih mwhneix, gou gaengjdingq caiq daeuj laeng mwngz dineix. Daengz mwhmwnq, mehyah mwngz gaengjdingq ndaej seng miz daeglwg he.”
Mwh boux mwnq gangj gawq vah neix hih mwhde, Sajlah couh ndwn youq baixlaeng boux mwnq hih bakdou cangqbungz, de caemh dingqri gawq vah neix. 11Gizsaed, Yaqbwzlahhanj caeuq Sajlah cungj laux ladlad liux lo; Sajlah ndwennaengz daeuj hih gij doxgaiq mwnq cungj caemh senqsi cix dingz lo. 12Yiengq de dingqri boux mwnq gangj gij vah neix le, couh caegcaeg riungoemx hwj gag naeuz: “Gou caeuq goeng gou cungj caet laux bat nyangq liux lo, hoeng cungj lij miz cungj saeh ndei neix hwj haz?”
13Gajlaeng, Yehhozvaz doiq Yaqbwzlahhanj naeuz: “Sajlah vihmaz ij caeg riungoemx naeuz: ‘Gou cungj laux ladlad liux lo; dangqcaen lij ndaej miz lwg haem haj?’ cungj vah neijx? 14Nanzdauh faenhsou mbouj rox, gou, Yehhozvaz, nwj miz naeuz miz gij saeh gou guh mbouj daengz he haj? Daengz bimoq hih mwhneix, gou bietdingh daeuj dineix; daengz mwhmwnq, Sajlah baenzbaenz cungj seng miz daeglwg he.”
15Sajlah dingqri doengh gawq vah neix le, cungj simvueng hwj mbouj nginh naeuz bonjfaenh de caeg riu; de naeuz: “Gou mij riu nej!”
Hoeng, Yehhozvaz naeuz: “Mij riu! Mwngz mingzmingz riu hwhlweng, lij naeuz mij riu.”
Yaqbwzlahhanj vih Sojdohmaj Singz gouz Cangqdiq.
16Gajlaeng sam boux mwnq couh ij bae Sojdohmaj Singz, Yaqbwzlahhanj caemh soengq gyoengqde bae duenh roen he. Bae daengz mwnq yawj roengzbae ndaej raen Sojdohmaj he le, 17Yehhozvaz ndaw hoz de gag naeuz: “Gou mbouj siengj muenz Yaqbwzlahhanj, mbouj siengj muenz de gou ijvanh guh hih saeh, 18aenvih gou ij hawj Yaqbwzlahhanj hih doengh daih gajlaeng de bienqbaenz aen minzcuz youh hung youh giengz he; gou caemh sawjhawj lajmbwn aen'aen minzcuz cungj dwg dajlaeng de ndaej miz fuk. 19Gou senj de, dwg ij hawj de songyauq gij lwglan doengh daih gajlaeng de, hawj gyoengqde dingq gij vah gou, guh vunz ndei vunz soh; yienghneix gou couh ndaej hengz gou caeuq Yaqbwzlahhanj soj dingh he lo.”
20Yehhozvaz de gag gangj daengz dineix le, couh doiq Yaqbwzlahhanj naeuz: “Gou dingqri miz haujlai haujlai vunz gauqsoq naeuz gij vunz Sojdohmaj caeuq gij vunz Ngozmohlah doegdoeg siebsieb hih vah lo, gij coih gyoengqde gig yiemzcungq. 21Seizneix gou couh ij roengz bae yawjyawj, yawjyawj gyoengqde dwg mbouj dwg luj gij vunz gauq naeuz hih yienghmwnq. Hauhnaeuz mbouj dwg, gou swhmboujyienz gag rox.”
22Yehhozvaz yienghneix gangj le, linghvaih hih song boux mwnq couh yiengq Sojdohmaj byaij bae lo, hoeng, Yehhozvaz vanzlij dwg ndwn youq dangqnaj Yaqbwzlahhanj. 23Yiengq, Yaqbwzlahhanj couh byaij bae dep de cam naeuz: “Bouxcawj gou hax! Mwngz cingqcaen mboujguenj vunz ndei haj cixnaeuz vunz rwix cungj ij cawz gyoengqde bae haz? 24Yiengq, hauhnaeuz ndaw singz mwnq miz hajcib boux vunz ndei nex, mwngz cungj ij cawz aen singz mwnq sojmiz hih vunz bae haz? Mwngz mbouj vih ndaw singz mwnq miz hajcib boux vunz ndei hwj nyiuz ndaw singz mwnq sojmiz hih vunz, mbouj cawz aen singz mwnq haj? 25Gouz mwngz gaejyungh dawz vunz ndei caeuq vunz rwix cungj itheij gaj veiq! Vunz ndei caeuq vunz rwix cungj gaj nex, couh dwg naeuz ndei yak cungj mbouj faen lo; mwngz gaengjdingq mbouj veiq yienghneix guh hih, mbouj dwg haz? Aenvih mwngz dwg boux saemjbuenq baenx cenz lajmbwn he, guh hih saeh caemh dwg goengbingz he, mij dwg maz?”
26Gajlaeng, Yehhozvaz han naeuz: “Hauhnaeuz gou youq ndaw aen Sojdohmaj Singz raen miz hajcib boux vunz ndei nex, gou couh vih gyoengqde hwj nyiuz ndaw singz mwnq sojmiz hih vunz mbouj gaj.”
27Yiengq Yaqbwzlahhanj caiq naeuz: “Bouxcawj gou hax! Gou gannaeuz dwg boux yawj mbouj hwnj ra he hih vunz lah, hoeng, gou vanzlij mbeihung hwj caiq cam mwngz. 28Hauhnaeuz ndaw singz mwnq ngamq miz seiqcib haj boux vunz ndei lah, yiengq mwngz caemh ij vih noix bae haj boux vunz ndei hwj cawz ndaw singz mwnq sojmiz hih vunz laj?”
Yehhozvaz dingq le, han de naeuz: “Hauhnaeuz gou youq ndaw singz mwnq ndaej raen miz seiqcib haj boux vunz ndei nex, gou couh mbouj cawz ndaw singz mwnq sojmiz hih vunz.”
29Yiengq, Yaqbwzlahhanj youhcaiq cam naeuz: “Bouxcawj gou hax! Hauhnaeuz ndaw singz mwnq cij miz seiqcib boux lah nej, baenzlawz yiengh?”
De caiq han naeuz: “Vih seiqcib boux mwnq, gou caemh mbouj cawz ndaw singz mwnq sojmiz hih vunz lo.”
30Yaqbwzlahhanj dingq le, couh doiq Yehhozvaz naeuz: “Bouxcawj gou hax, gou vanzlij caiq cam mwngz, gouz mwngz gaejyungh fatheiq gou; gou vanzlij ij caiq cam mwngz, hauhnaeuz caenhgag miz samcib boux lah nej?”
Yehhozvaz youhcaiq han naeuz: “Hauhnaeuz miz samcib vunz nex, gou caemh mbouj cawz aen singz mwnq sojmiz hih vunz.”
31Yaqbwzlahhanj youhcaiq naeuz: “Bouxcawj gou hax! Gouz mwngz gaejyungh aeuqheiq gou baenxlai mbeihung caiq cam mwngz, hauhnaeuz cijngamq miz ngeihcib vunz nej?”
De vanzlij caiq han naeuz: “Cijngamq miz ngeihcib vunz gou caemh mbouj cawz aen singz mwnq sojmiz hih vunz.”
32Yaqbwzlahhanj vanzlij caiq naeuz: “Bouxcawj gou hax! Gou caiq gouz mwngz gaejyungh fatheiq gou, nyiuz gou youhcaiq cam mwngz mbat laem, hauhnaeuz caenhgag miz cib boux vunz ndei lah nej?”
Yehhozvaz youhcaiq han de naeuz: “Yiengq gou couh vih cib boux vunz ndei mwnq hwj mbouj cawz aen singz mwnq sojmiz hih vunz.”
33Yehhozvaz gangj doenghgij vah neix sat le, couh bae lo. Yaqbwzlahhanj caemh gag maj ranz de lo.
Currently Selected:
Lizsij dih Gaihcij 18: YBNT
Highlight
Share
Copy
Want to have your highlights saved across all your devices? Sign up or sign in
© New Bridge Publishing Company Limited
