Génesis 23
23
Beꞌen ko xrabaa Sara
1Sara bechon naa renkia ko kan ko yaato nano, 2ko benxin Sara ngain rajna Quiriat-arba, ko rajna jiꞌi kai diꞌin Hebrón ngain nunthe Canaán. Ko anto tsjanga Abraham ko bechiin. 3Kuthimejan Abraham bachrjexin thi betsingaxiꞌin Sara, ko bikjao ni hitita, ko ndachro:
4—Jaꞌan riꞌi ngayaꞌa ra maski jeꞌa rajnana, aro nthatsaꞌan ñao ra nchekjina ni ra naa jngi ixin tsjabaa chriꞌna.
5Ko ni hitita ndachro na̱:
6—Nthatsaꞌan ñao suixin, dekina ni ra; suixin naa thi kuinchieꞌe Ndo Dio jii ngayeꞌna ná. Dekjabaa chriꞌa ngain chinthi icha jian techunda ná, ko xruꞌin ná xro rundachrjan ná ixin dekjabaꞌa chriꞌa.
7Ko Abraham bingathjen ko bisetaꞌa nunthe ngathexin kon ni hitita, 8ko ndachro ngain na̱:
—Ja̱ ndua rinao ra ixin nthiꞌi tsjabaa chriꞌna, nthatsaꞌan ñao ra nichjaxin ni ra ngain Efrón, xeꞌen Zohar, 9ixin sinchekjiꞌna thi jichrjadoꞌo thjao jii ngain jngi diꞌin Macpela, thi jii ngadeꞌe jngiꞌi Efrón, ko ndache ra ixin tsjenga ꞌna thi jikininxin renthe thi jichrjadoꞌo thjao, ko jañaa jaꞌan tsetuꞌan thi tsjabaa chriꞌna.
10Ko Efrón jiꞌi tajii ngayee ni hitita ixin nthiꞌa beꞌe kai. Ko ngathe kon kain ni hitita te nthiꞌa ko ni bagatho, Efrón ndachro ngain Abraham:
11—Naꞌi, dendachroꞌa suixin yaa, nthatsaꞌan ñao, jaꞌan dechjaꞌa nunthe yaa ko thi jichrjadoꞌo thjao, ni rajnana tatethiꞌin ixin jaꞌan rinthathuꞌan nunthe jiꞌi. Ko yaa dekjabaa chriꞌa.
12Aro Abraham kjan bisee inaa ngathe kon ni rajna 13ko ndachro ngain Efrón ngathexin kon kain na̱:
—Nthatsaꞌan ñao, dekina ko degayeꞌe tumi ixin nuntheꞌa, kuthejan tsjabaa chriꞌna nthiꞌa.
14Kuthejan ndachro Efrón ngain Abraham:
15—Dekiꞌin suixin, nunthe dithe nunthe noo renkia chia plata, aro ¿keꞌe tsjé yaa ixin jaꞌan ná? Dekji ko dekjabaa chriꞌa.
16Ko Abraham kjuenga ꞌna thi tumi ndachro Efrón ngathexin kon kain ni hitita, ko bajon thi noo renkia chia plata.
17Ko nuntheꞌe Efrón, thi jii Macpela nu thi dachrjexin nchaꞌon ngain nunthe Mamre. Ko jngi jiꞌi jaꞌin beꞌe; bechunda thjao jichrjadoꞌo ko tsjé nthaa bendajin jngi. 18Kain jiꞌi Abraham kuetuꞌan. Ko jiꞌi kuꞌen ngathexin kon ni hitita ko ni bagatho ngandeꞌe rajna mee.
19Kuthimejan Abraham kjuabaa Sara ngain thi jichrjadoꞌo thjao ngain jngi Macpela, thi jii nu thi dachrjexin nchaꞌon ngain nuntheꞌe Mamre, thi kai diꞌin Hebrón, ngain nunthe Canaán. 20Ko nunthe ko thi jichrjadoꞌo thjao thi baketuꞌan ni hitita ndabatho ngaa raa Abraham, ko nunthe jiꞌi binchekji ni hitita ixin xrabaa chujni.
Currently Selected:
Génesis 23: plsNT
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
