San Lucas 1

Lucas dikji̱n juajna jiꞌi

1Tsjé chujni binao na̱ rukji̱n na̱ thi kuꞌen Jesucristo ko thi jeꞌe bincheꞌe ngataꞌa nunthe jiꞌi. 2Jañaa inchin binthakuan ná ni bikon kain thi bincheꞌe Jesús are nandaa kuexinxin xree ko jeꞌe na̱ kjuengijna na̱ jeꞌe ixin ndache na̱ chujni thi jian juajna. 3Mexinxin jaꞌan kai banchiangi jian ixin kain thi bincheꞌe Jesús are nandaa kuexinxin xree, ko jaꞌan xraxaꞌon ixin jian jii ke jaꞌan rukji̱n na kain jiꞌi inchin kuꞌen, ixin jaꞌa Teófilo nchao rutsjeꞌe xroon jiꞌi. 4Ko jamee jaꞌa jian tsunuꞌa thi ndua kukuaꞌan.

Naa ángel bindachro ixin tsunkjiꞌi Juan thi sinchegithe chujni

5Are Herodes beꞌe rey ngain nunthe Judea, are mee beꞌe naa xi daana biꞌin Zacarías. (Jeꞌe beꞌe ngain chujnii xi daana, ni biꞌin Abías.) Ko chriꞌi Zacarías biꞌin nchra Elisabet, ko kayui na̱ bachrjeninxin na̱ ngain chujnii Aarón, thi kjui saꞌo xi daana. 6Ko kayui na̱ anto jian na̱ ngathexin kon Ndo Dio ko anto bagithikaon na̱ kain thi kuetuꞌan ndo, ko jañaa xruꞌin chujni banichja jianꞌa ixin jeꞌe na̱. 7Aro jeꞌe na̱ xruꞌin chjan binthechunda na̱ ixin Elisabet chroꞌa banchekunkjiꞌi chjan, ko kayui na̱ ujunchjan binthe na̱.

8Naa nchaꞌon Zacarías ko ni banchekaꞌo xra, biꞌin Abías ko ni teꞌi ubikininxin runcheꞌe na̱ xra ngaxiꞌin ninguꞌe Ndo Dio. 9Aro icha saꞌo jeꞌe na̱ bakinchieꞌe na̱ kensen runcheꞌe xra, ko Zacarías bithutaon ixin jeꞌe sixiꞌin ngaxiꞌin ninguꞌe Ndo Dio ixin tsjaaga tsjuka. 10Ko are nguii jitjaaga Zacarías tsjuka ngaxiꞌin niꞌngo, kain chujni tatenichjee na̱ Ndo Dio nduja. 11Ko are xratajixiꞌin Zacarías ngaxiꞌin niꞌngo bikon naa angeel Ndo Dio tajingathjen ngandeꞌe giꞌi thi jichexin tsjuka no rajianxiin Zacarías. 12Are jeꞌe bikon ángel mee, jeꞌe benueꞌa keꞌe runcheꞌe ixin anto xraon. 13Aro ángel mee ndachro ngain Zacarías:

—Zacarías xraonꞌa, ixin Ndo Dio kuiꞌin thi jaꞌa binchetseꞌen ñao, mexinxin chriꞌa Elisabet sinchekunkjiꞌi naa chjan, ko jaꞌa sinchegiꞌin xan Juan. 14Ko jaꞌa anto ruchaꞌa ko anto chrjuin tsunuꞌa, ko tsjé chujni ruchee na̱ ixin tsunkjiꞌi chjan mee. 15Ko xaꞌan mee usechunda xan juachaxiin Ndo Dio. Chjan mee siꞌa xan vino ko thi kuanxin chujni, ko ruchunda xan anto tsjé juachaxiin Espíritu Santo are xra seꞌo xan ngaxiꞌon tseꞌe janee xan. 16Ko ixin thi jeꞌe xan sincheꞌe xan, tsjé chujni ngain nunthe Israel rukjan na̱ sinchesayeꞌe na̱ Ndo Dio, thi chunda kain juachaxin. 17Jeꞌe xan jiꞌi, xan tsii saꞌo ke Cristo, ko ruchunda xan xrajeꞌo espíritu ko xrajeꞌo juachaxin ke bechunda profeta Elías, ixin jeꞌe xan tsjague xan ni ndudaꞌa kexreen sinao na̱ xeꞌen na̱, ko thi chujni dithikaonꞌa Ndo Dio tsangi na̱ sithikaon na̱ ndo. Ko jamee chujni nchao sayée na̱ Cristo are jeꞌe tsii.

18Zacarías banchiangiꞌi ángel mee ko ndachro:

—¿Kexreen sithikaunxin jaꞌan jiꞌi? Ixin jaꞌan anto dachrii na ko chriꞌna anto nachrichjan nchra.

19Ángel mee ndachro:

—Jaꞌan Gabriel na, ko rinthaꞌa kain thi thetuꞌan Ndo Dio. Ko jeꞌe thi kuetunna ixin bindathjo thi jian juajna jiꞌi. 20Aro jai, ixin jaꞌa bithikaonꞌa thi jaꞌan ndathjo, jaꞌa tsuthapo, ko chroꞌa runichja sithjaja nchaꞌon tsunkjiꞌi xaꞌan.

21Ko nguii mee, kain chujni nthi̱ꞌa̱ techuꞌen na̱ sachrje Zacarías, ko binthechuꞌen na̱ see ko xraon na̱ ixin Zacarías anto kunchrjeꞌen ngaxiꞌin niꞌngo. 22Ko are jeꞌe bachrje, ichroꞌa nichja ngain na̱. Kuthimejan xraxaon na̱ ixin chrujan kjuague Ndo Dio ngaxiꞌin niꞌngo. Ko Zacarías jeꞌo bakjaguxin kunixin raa thi binao rundachro ixin ndakuthapo.

23Are Zacarías juexin bincheꞌe xra kain nchaꞌon ngain niꞌngo icha jié, sakjui nchianduꞌa. 24Kuthimejan chriꞌi Zacarías ubeyaa nchra chjan, ko ibachrjexinꞌa nchra nchianduꞌa nchra naꞌo kunithjao, ko xraxaon nchra: 25“Ndo Dio bajon juachaxin ixin jaꞌan riyaa chjan, ko jai chujni itsjanoꞌa na na̱.”

Naa ángel bindachro ixin tsunkjiꞌi Jesús

26Batho inkjaon kunithjao, Ndo Dio ruaꞌan ndo ángel Gabriel ngain nunthe Galilea ngain naa rajna diꞌin Nazaret 27ixin bitsjeꞌe naa xan nchrii biꞌin María, xan nchrii mee xruꞌin xii kathe xan, aro urukutheꞌe xan ngain naa xii biꞌin José, xi bachrjeninxin chujnii rey David. 28Ángel mee bixiꞌin thi nchia jixiꞌin xan nchrii mee, ko ndachro ngain xan:

—¡Jaꞌan bichjaꞌa juajna ixin Ndo Dio anto rinao ndo jaꞌa! Ndo Dio jii ngajin ko icha binthanchaon ndo jaꞌa ke kainxin nchrii.

29Ko María xratao tabeꞌe ko xraxaon ixin keꞌe ruchro thi juajna chjee ángel. 30Kuthejan ángel mee ndachro:

—María, xraonꞌa, ixin Ndo Dio binthanchaon ndo jaꞌa. 31Jai jaꞌa sariyaꞌa naa chjan ko are usinchekunkjiꞌi xan, jaꞌa sinchegiꞌin xan JESÚS. 32Chjan mee anto renthe seꞌe xan, ko sinchegiꞌin na̱ xan Xeꞌen Ndo Dio, ndo thjen ngajni. Ko jeꞌe ndo ruchjee xan juachaxin seꞌe xan rey inchin ndo dachriꞌi xan xrachrjen biꞌin David are saꞌo. 33Jamee jeꞌe xan tsetuꞌan xan ngain nunthe Israel kainxin nchaꞌon, ko thi jeꞌe xan tsetuꞌan xan xruꞌin nchaꞌon tsjexin.

34Kuthejan María banchiangi ngain ángel mee ko ndachro:

—¿Kexreen tsuꞌen jiꞌi, ixin jaꞌan xruꞌin xii rikiꞌan?

35Ángel ndachro ngain María:

—Espíritu Santo tsii ngajin jaꞌa ko juachaxiin Ndo Dio, ndo thjen ngajni sisiandajin inchin naa thjui. Mexinxin thi chjan jaꞌa sinchekunkjiꞌi, jian xan ngathexin kon Ndo Dio ko siꞌin xan Xeꞌen Ndo Dio. 36Ko kai nchri primaa, Elisabet, sinchekunkjiꞌi nchra naa chjan maski unachrichjan nchra. Mexinxin thi nchrii ndachro chujni ixin chroꞌa sinchekunkjiꞌi chjan, jai jeꞌe nchra uchunda nchra inkjaon kunithjao jiyaa nchra xeꞌen nchra 37ixin xruꞌin tangi jii ixin Ndo Dio.

38Kuthejan María ndachro:

—Jaꞌan dithikaꞌon kainxin thi thetuꞌan Ndo Dio; ko mexinxin Ndo Dio nchao sincheꞌe ndo ngajin inchin jaꞌa ndachjejin na.

Ko juexin nichja ángel mee, sakjui.

María kjui bitsjeꞌe Elisabet

39Ko tsjeꞌa nchaꞌon batho, María tuin kjui bitsjeꞌe Elisabet, thi beꞌe ngain naa rajna ngagaꞌa jnee nunthe Judea. 40Ko are María biji nthi̱ꞌa̱, bixiꞌin nchianduꞌa Zacarías ko chjee juajna Elisabet.

41Ko Elisabet are kuiꞌin juajnee María, chjan beyaa Elisabet kuingi xan ngaxiꞌin tseꞌe, ko are mee Espíritu Santo juii kunixin anto tsjé juachaxin ngain Elisabet. 42Kuthejan Elisabet seen ndachro ngain María:

—Ndo Dio binthanchaon jaꞌa icha ke kainxin nchrii, ko kai binchenchaon xaꞌan riyaꞌa. 43¿Kensen na jaꞌan ixin jaꞌa bitsje na, jaꞌa janee Nchana? 44Ixin are jaꞌan kuian juajnaa, xanꞌna riyaa kuingi xan ngaxiꞌin tseꞌe na ixin chee xan. 45Anto chrjuin ixin jaꞌa bithikaon ixin sikuꞌen thi ndathjo Ndo Dio.

46Kuthejan ndachro María:

Ansenna nchesayeꞌe Ndo Dio.

47Ko ansenna chee ngain Ndo Dio, thi binthakjan na inaa chujni narua.

48Ixin Ndo Dio bikon na ndo jaꞌan, thi nchri ncheꞌe xree ndo,

ko jai utsexiꞌin chujni rundachro na̱ ixin jaꞌan binchenchaon na Ndo Dio.

49Ixin Ndo Dio, thi chunda kain juachaxin, jian ncheꞌe ngajin;

¡Suixin diꞌin thi anto jian!

50Ko jeꞌe ndo kainxin nchaꞌon tsiakunueꞌe ndo kain chujni nchesayeꞌe ndo.

51Jeꞌe ndo kjuaago ndo kain thi jié ncheꞌe ndo

ko bengi ndo thi chujni anto taꞌin ñao.

52Ko jeꞌe bantsjeꞌe juachaxiin kain ni thetuꞌan,

ko binchegayee ndo juachaxin ni tunueꞌa renthe.

53Thi chujni nua, jeꞌe chjee na̱ tsjé,

ko thi chujni chunda, jeꞌe kuinthuꞌe na̱ texruaxon raa na̱.

54Jeꞌe kjuengijna ni Israel, ni nchexree jeꞌe,

ixin jeꞌe tjañeꞌa chujnii ko kain nchaꞌon thiakunueꞌe na̱,

55ko jeꞌe sincheꞌe thi undachro ngain ni ndo dachriꞌa ná xrachrjen diꞌin Abraham ko ngain xeꞌen ndo, ko jañaa tsiakunueꞌe ndo kainxin nchaꞌon.

56Ko María bithuꞌe ngain Elisabet inchin nii kunithjao, kuthimejan sakjan nchianduꞌa.

Kunkjiꞌi Juan, thi sinchegithe chujni

57Ko are ubithja nchaꞌon, Elisabet binchekunkjiꞌi naa xan xichjan. 58Ko are ni chiaon tekauxin ko ni chujnii kunuꞌe na̱ ixin Ndo Dio kuiakunueꞌe Elisabet, bichjee na̱ juajna ko anto chee na̱. 59Ko are xethja thi jni nchaꞌon bichjee na̱ xan xichjan thi xruꞌe diꞌin circuncisión, ko binao na̱ rugiꞌin xan Zacarías inchin diꞌin ndudee xan. 60Aro janee xan ndachro jan:

—Naꞌi. Xanꞌna siꞌin xan Juan.

61Ko jeꞌe na̱ ndachro na̱ ngain Elisabet:

—¿Unda?, ja̱ xruꞌin ni ndui diꞌin jañaa.

62Kuthejan banchiangi na̱ kunixin raa na̱ ngain ndudee xan xichjan ixin kexreen siꞌin xan. 63Ko Zacarías banchia rioꞌo nthaa ko kji̱ntaꞌa ntha jaꞌin: “Jeꞌe xan siꞌin xan Juan.” Ko ni binthe nthi̱ꞌa̱ xratao tabinthe na̱ ixin jañaa siꞌin xan. 64Ko Zacarías nichjabeꞌo inaa ko kuexiꞌin binchesayeꞌe Ndo Dio. 65Ko ni chiaon te nchianduꞌa xratao tabinthe na̱, ko kuekin na̱ thi kuꞌen jiꞌi ngain kain chujni te ngain kain jnee nunthe Judea. 66Kain chujni bakiꞌin jiꞌi, baxraxaon na̱ ixin unda jañaa kuꞌen ko baganchiangiꞌi choo na̱ ko bandachro na̱:

—¿Keꞌe sigeꞌe chjan yaa?, ixin ndua Ndo Dio binchenchaon xan.

Zacarías binchesayeꞌe Ndo Dio

67Kuthimejan Zacarías, ndudee xan xichjan mee, kunixin juachaxiin Espíritu Santo kuexiꞌin nichja thi juajna binchegayee Ndo Dio ko ndachro:

68Kainxin chujni jikininxin sinchesayeꞌe Nchaa ná, Ndo Dioe nunthe Israel,

ixin jeꞌe juii ngajin ná, xro chujnii jeꞌe ko kjuengijna ná.

69Jeꞌe chjaa ná naa chujni chunda tsjé juachaxin ko nchao sinthakjan ná inaa chujni narua ko xruꞌin nchaꞌon tsjexin,

ko jeꞌe bachrjeninxin ni nchexree Ndo Dio diꞌin David.

70Ixin jañaa ndachro Ndo Dio ngain ni bagayee juajnee ndo are usee;

71ixin Ndo Dio tsjengijna ná ngain chujni ningakuan ná ko ngain chujni rinaoꞌa ná,

72ko kai ndachro ixin tsiakunuꞌe ndo ni ndo dachriꞌa ná xrachrjen,

ko jeꞌe ndo xruꞌin nchaꞌon rutjañeꞌe ndo thi kjuathexin ndo ko sincheꞌe ndo ixin jaꞌan ná.

73Ko Ndo Dio ubajin ndo ixin jaan sincheꞌe ndo thi undachro ndo ngain ndo dachriꞌa ná xrachrjen, ndo Abraham:

74ko ixin jeꞌe tsanchrjandaꞌa ná ngain thi chujni ningakuan ná,

ko jañaa ruxraonꞌa ná sinthoꞌo ná xree ndo,

75ko rukjan ná chujni jian ngathexin kon Ndo Dio kainxin nchaꞌon sunthechon ná.

76Ko jaꞌa, xan xichjanꞌna, siꞌin chujni dayee juajnee Ndo Dio, ndo thjen ngajni,

ixin jaꞌa thi sitauꞌen nthiꞌá Cristo ko jaꞌa rundache chujni tsinthuꞌe na̱ kain thi jianꞌa tencheꞌe na̱, jamee jaꞌa sinchechjian naa nthiꞌá nao ixin Cristo.

77Ko jaꞌa sinchenuꞌe chujni Israel ixin thi jianꞌa tencheꞌe na̱, nchao sitjañeꞌe na̱,

ko jañaa Ndo Dio nchao sinchekjan na̱ inaa chujni narua ko xruꞌin nchaꞌon tsjexin.

78Ixin Ndo Diua ná anto thjuaa ná ndo ko thiakunuaa ná ndo,

ko jeꞌe ndo ruaꞌan ndo thi ndangasaan ná thixin ngajni,

79ko sinchengaseꞌen chujni te ngain thi naxin xeꞌe ko tsajandaꞌa seꞌen chujni utekininxin seꞌen,

ko tsjagua ná kexreen sakjiꞌo ná jian kain chujni.

80Ko xan xichjan bangi xan ko kain nchaꞌon icha kusuji xan ngain Espíritu Santo. Ko kainxin nchaꞌon jeꞌe xan beꞌe xan ngagaꞌa jna thi xruꞌin chujni jii. Bithjaja nchaꞌon xraago xan ko kuexiꞌin xan binchekueꞌen xan chujni Israel.

Currently Selected:

San Lucas 1: plsNT

Highlight

Copy