San Lucas 3
3
Juan nchenuꞌe chujni ixin tsii Cristo
(Mt. 3:1-12; Mr. 1:1-8; Jn. 1:19-28)
1Are xethja the naꞌo nano Tiberio César baketuꞌan nguii Roma, Poncio Pilato baketuꞌan ngain Judea, ko Herodes baketuꞌan ngain Galilea, ko xan choo Herodes, thi biꞌin Felipe, baketuꞌan ngain rajna Iturea ko kai rajna Traconite ko Lisanias baketuꞌan ngain nunthe Abilinia. 2Ko are mee Anás ko Caifás ni mee xi daana icha renthe binthe. Ngain nano mee ngagaꞌa jna thi xruꞌin chujni te, biji juajnee Ndo Dio ngain Juan, xeꞌen Zacarías. 3Ko Juan kjui nguii ngandeꞌe nda Jordán ixin bindache chujni ixin rugunda sigithe na̱ ko tsinthuꞌe na̱ kain thi jianꞌa ncheꞌe na̱ ko jañaa Ndo Dio sinchetjañeꞌe ndo na̱. 4Kain jiꞌi kuꞌen inchin dikji̱n Isaías, thi bagayee juajnee Ndo Dio ko ndachro:
Naa thee chujni jituyao ngagaꞌa jna ko rundachro:
“Nchechjian ra nthiꞌá ixin Nchaa ná;
danthjeꞌe ra naa nthiꞌá nao.
5Kain chjaaga tsunataunxin chjaga,
ko kain jna ko jnanchjan tsunataunxin;
kain nthiꞌá naoꞌa, tsunao nthiá,
ko kain nthiꞌá jeꞌa nataunxin, tsunataunxin nthiá.
6Kuthimejan kainxin chujni sikon na̱ thi ruaꞌan Ndo Dio ixin tsjengijna na̱.”
7Ko chujni bakunchieꞌen ngain Juan ixin runchegithe na̱, aro jeꞌe bandachro ngain na̱:
—¡Jaꞌa ra xeꞌen kunchee! ¿Kensen binthanuꞌa ra ixin nchao tsingeꞌe ra thi tangi jitunchiaon? 8Saꞌo ncheꞌe ra jian ixin jamee sikon icha chujni ixin ndua incheꞌa ra thi jianꞌa bancheꞌe ra, ko ndachroꞌa ra: “Jaꞌan ná chujnii Abraham ná, mexinxin Ndo Dio tsjengijna ná”, aro jaꞌan ndathjo ra ixin Ndo Dio chunda kain juachaxin, ko xro jiꞌi nchao sinchechjian ndo chujnii Abraham. 9Ujichuꞌen jaacha ixin tsunchrijin nthaa, ko kain nthaa danjonꞌa jian thuchjuin ruchrijin ntha ko ruche ntha ngain xruꞌi.
10Kuthejan kain chujni mee banchiangi na̱ ngain Juan ko ndachro na̱:
—Mexinxin, ¿keꞌe rugunda sinthaꞌa ná remee?
11Juan ndachro ngain na̱:
—Xro chunda ra yoo luntho dinthengaꞌa ra, dajon ra naa luntho ngain thi chundaꞌa luntho. Ko xro chunda ra thi jinthe ra, jinthekoꞌo ra thi chujni chundaꞌa.
12Kai nthi̱ꞌa̱ binthekunchieꞌen kanxion xi thjejo tumii César ixin rugithe xa, ko banchiangi xa ngain Juan ko ndachro xa:
—Suixin ke tjaago, ¿keꞌe rugunda sinthaꞌa ná?
13Ko Juan ndachro ngain xa:
—Dantsjeꞌa ra chujni tsjé tumi, jeꞌo danchia ra tumi thetuꞌan César.
14Kai kanxion xi soldado banchiangiꞌi xa Juan ko ndachro xa:
—Ko jaꞌan ná, ¿keꞌe rugunda sinthaꞌa ná?
Juan ndachro ngain xa:
—Nchexraonꞌa ra chujni ko dantsjeꞌa ra tumii na̱ ko tjangiꞌa ra na̱ thi jeꞌe na̱ ncheꞌa na̱; ko chaꞌa ra kunixin jeꞌo tumi dacha ra.
15Kain chujni mee anto binao na̱ rukunuꞌe na̱ ixin kensen Juan ixin baxraxaon na̱ ixin Juan mee thi Cristo.
16Aro Juan ndache kain na̱:
—Jaꞌan ndua nthagithexin ra kunixin jinda, aro tuin tsii inaa thi icha jié juachaxin chunda ke jaꞌan, ko jaꞌan jikininxinꞌa na tsunxindangaa kathee. Ko jeꞌe sinthagithe ra kunixin Espíritu Santo ko xruꞌi. 17Ko jeꞌe ujiyaa thi tsjenduaxin trigo, ixin sachrjeꞌe trigo kaxineno ko sasikao kain trigo ngain nchianduꞌa, aro kain kaxineno tsjaaga ngain thi xruꞌi xruꞌin nchaꞌon sanga.
18Kain jiꞌi ko ikanxion thi bakjaago Juan, bandachexin chujni thi jian juajna. 19Kuthejan, Juan binchesatheꞌe Herodes, xi thetuꞌan, ixin bekaꞌo Herodías thi kjui chriꞌi Felipe, xan choo Herodes, ko kai ixin ikanxion thi jianꞌa bancheꞌe Herodes. 20Ko Herodes bithikaonꞌa, ko bincheꞌe inaa jianꞌa ixin kuiaxiꞌin Juan ngain nduꞌa xiiso.
Bigithe Jesús
(Mt. 3:13-17; Mr. 1:9-11)
21Ko naa nchaꞌon are Juan banchegithe anto tsjé chujni, ko Jesús kjui ixin binchegithe kai. Ko are Jesús juexin bigithe, jeꞌe nichjee Ndo Dio ko ngajni xiree, 22ko Espíritu Santo xinkajin xraa naa kunthuanajni ngataꞌa Jesús, kuthejan kuiꞌin ni naa tha juixin ngajni ko ndachro:
—Jaꞌa thi Xanꞌna, xan anto thjuaa ko anto chaꞌna ixin jaꞌa.
Kain ndo dachri xrachrjeꞌen Jesús
(Mt. 1:1-17)
23Jesús bechunda inchin kan ko the nano are jeꞌe kuexiꞌin kjuaago ngain chujni ixin Ndo Dio.
Ko kain chujni xraxaon na̱ ixin jeꞌe kjui xeꞌen José,
ko José kjui xeꞌen Elí,
24ko Elí kjui xeꞌen Matat,
ko Matat kjui xeꞌen Leví,
ko Leví kjui xeꞌen Melqui,
ko Melqui kjui xeꞌen Jana,
ko Jana kjui xeꞌen José.
25Ko José kjui xeꞌen Matatías,
ko Matatías kjui xeꞌen Amós,
ko Amós kjui xeꞌen Nahum,
ko Nahum kjui xeꞌen Esli,
ko Esli kjui xeꞌen Nagai,
26ko Nagai kjui xeꞌen Maat,
ko Maat kjui xeꞌen Matatías,
ko Matatías kjui xeꞌen Semei,
ko Semei kjui xeꞌen José,
ko José kjui xeꞌen Judá.
27Ko Judá kjui xeꞌen Joana,
ko Joana kjui xeꞌen Resa,
ko Resa kjui xeꞌen Zorobabel,
ko Zorobabel kjui xeꞌen Salatiel,
ko Salatiel kjui xeꞌen Neri.
28Ko Neri kjui xeꞌen Melqui,
ko Melqui kjui xeꞌen Adi,
ko Adi kjui xeꞌen Cosam,
ko Cosam kjui xeꞌen Elmodam,
ko Elmodam kjui xeꞌen Er.
29Ko Er kjui xeꞌen Josué,
ko Josué kjui xeꞌen Eliezer,
ko Eliezer kjui xeꞌen Jorim,
ko Jorim kjui xeꞌen Matat.
30Ko Matat kjui xeꞌen Leví,
ko Leví kjui xeꞌen Simeón,
ko Simeón kjui xeꞌen Judá,
ko Judá kjui xeꞌen José,
ko José kjui xeꞌen Jonán,
ko Jonán kjui xeꞌen Eliaquim.
31Ko Eliaquim kjui xeꞌen Melea,
ko Melea kjui xeꞌen Mainán,
ko Mainán kjui xeꞌen Matata,
ko Matata kjui xeꞌen Natán.
32Ko Natán kjui xeꞌen David,
ko David kjui xeꞌen Isaí,
ko Isaí kjui xeꞌen Obed,
ko Obed kjui xeꞌen Booz,
ko Booz kjui xeꞌen Salmón,
ko Salmón kjui xeꞌen Naasón.
33Ko Naasón kjui xeꞌen Aminadab,
ko Aminadab kjui xeꞌen Aram,
ko Aram kjui xeꞌen Esrom,
ko Esrom kjui xeꞌen Fares,
ko Fares kjui xeꞌen Judá.
34Ko Judá kjui xeꞌen Jacob,
ko Jacob kjui xeꞌen Isaac,
ko Isaac kjui xeꞌen Abraham,
ko Abraham kjui xeꞌen Taré,
ko Taré kjui xeꞌen Nacor.
35Ko Nacor kjui xeꞌen Serug,
ko Serug kjui xeꞌen Ragau,
ko Ragau kjui xeꞌen Peleg,
ko Peleg kjui xeꞌen Heber,
ko Heber kjui xeꞌen Sala.
36Ko Sala kjui xeꞌen Cainán,
ko Cainán kjui xeꞌen Arfaxad,
ko Arfaxad kjui xeꞌen Sem,
ko Sem kjui xeꞌen Noé,
ko Noé kjui xeꞌen Lamec.
37Ko Lamec kjui xeꞌen Matusalén,
ko Matusalén kjui xeꞌen Enoc,
ko Enoc kjui xeꞌen Jared,
ko Jared kjui xeꞌen Mahalaleel,
ko Mahalaleel kjui xeꞌen Cainán.
38Ko Cainán kjui xeꞌen Enós,
ko Enós kjui xeꞌen Set,
ko Set kjui xeꞌen Adán,
ko Adán kjui xeꞌen Ndo Dio.
Currently Selected:
San Lucas 3: plsNT
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
