Hechos 2

Ti ikui Ncha̱kuén Díos

1 # Lv. 23:15-21; Dt. 16:9-11. *Ti ña̱o kia Pentecostés mé kaín ti sin tinkáchónki chꞌin Jesús mé kónkotsé sin la nkoko̱a kꞌuejó sin, 2la xrína̱hña kuíhin sin ijnko nkehe tóvéntó kui̱xi̱n nka̱jní. Éxi xri̱nto̱ tji̱a̱n chjéhe xi̱kaha la kuenté ti nchia tjejóxehen sin la kóvéntó kja̱xin. 3Ndá xrína̱hña kꞌuíkon sin éxi xroiñeñe la xika̱ye̱he kꞌuejókjen nkojnko ikja sin. 4La kaín sin kꞌuáyéhe̱ sin Ncha̱kuén Díos, la kjuankíxin níxja sin íjnko ngiva éxi ti kjuajon kjuachaxin ti Ncha̱kuén Díos kixin tsonixja sin.

5A̱ndá ti ña̱o a, la kꞌuejó itsjé chojni judío jína kuitekaon sin Díos, tsíkji̱xi̱n sin nkuíxín chjasintajni. 6La ti ó kuíhin sin ti nkehe tóvéntó, la kóchjina itsjé sin. La noehña sin nkehe tsjenka̱yáxin sin kixin nkojnko sin la kuíhin sin nixja ti sin kꞌuájiko chꞌin Jesús nkojnko ngive̱e sin. 7Ndá imá chrákon sin la kjuanchankíhi kícho sin, ndáchro sin:

―¿Á jehya chojni tsíkji̱xi̱n Galilea kaín sin tjejónixja ní? 8Ndá, ¿nkekuènté kixin tjejónixja sin nkojnko ti ngiva kꞌuánkíxini? 9Mé ntiha la tjejó ti chojni tsíkji̱xi̱n Partos, Media, Elam, Mesopotamia, Judea, Capadocia, Ponto, Asia, 10Frigia, Panfilia, Egipto la ko nkuíxín Africa chjina Cirene. La ko kja̱xin chojni romano tjejó ntiha. Iso ti sin a mé chaxín tsíkokjíexín sin judío, la íso sin la tinkáchónki sin Díos éxi ti sin judío. 11La kja̱xin ti chojni tsíkji̱xi̱n Creta la ko Arabia. La kaíni tinhini nixja sin nkojnko ngive̱eni ti kjuaxroan kuènté Díos ―mé xi̱kaha ichro sin.

12Ndá imá chrákon sin kaín sin la kjuanchankíhi kícho sin:

―¿Xá nkehe tꞌaxrjexín tíhi? ―ichro sin.

13A̱ndá íso sin la kjuanoá sin ndáchro sin:

―Kjá tsékoan sin ―ichro sin.

Pedro nixje̱he̱ ti chojni kónkotsé ntiha

14Ndá chꞌin Pedro kjuákꞌexín to̱té chꞌan la ko ti tejnko sin apóstol, la chꞌin Pedro itsen nixja ndáchro chꞌan:

―Jahara chojni judío la ko kaínra tjejora Jerusalén, tihínra ti nkehe tso̱xrja̱nka. 15Ti sin tjejó ntihi la jehya tsékoan sin éxi ndáchrora, kixin na̱ntá las nueve nchítjen. 16Ti nkehe tꞌikonra la mé ti nkehe chrónka profeta Joel:

17 # Jl. 2:28-32. *Ndáchro Díos: Ti ña̱o tsjixixín

mé tsochrꞌan ti Ncha̱kuená tsꞌáyéhe̱ kaín chojni.

Ndá ti xja̱anra ndoa la ko xja̱anra ichjin mé tsonixja sin ti itan kuénta̱na.

La ti ndasoá mé tsꞌikon sin ti nkehe tsjákohá sin.

La ti sin táda la kotáchrién sin tsꞌikonxín sin ti nkehe tsjàkua janhan.

18Ti ña̱o a la tsochrꞌan ti Ncha̱kuená tsꞌáyéhe̱ kaín ti chojnindoa la ko ti chojnichjin chꞌena xra̱

kixin kaín sin tsochronka sin ti itan jína.

19Ndá janhan tsjáko̱xia̱n ijnko nkehe náxrjón ti nka̱jní.

A̱ndá ti chjasintajni tsjáko̱xia̱n kjuaxroan,

la tsꞌixin ijni̱, xrohi la ko ihnchi.

20Ti ña̱o la tsꞌixin tie

a̱ndá ti nitjó la tsꞌóna ijni̱.

Mé xi̱kaha tso̱hen ndá itsi Ìnchéni.

Tíhi mé ijnko ña̱o ijié la ko náxrjón.

21A̱ndá kaín ti nkexro tsitekaon ihni̱é Ìnchéni mé tsaá sin.

22’Jahara chojni israelita tihínra ti nkehe tso̱xrja̱nka. Chꞌin Jesús tsíkji̱xi̱n Nazaret mé Díos kjua̱ko̱xi̱n kixin tsíchrꞌán chꞌan kixin kjuasin chꞌan itsjé kjuaxroan ijié kꞌuíkonra la ko kjua̱ko̱xi̱n chꞌan kixin chaxín chónta chꞌan kjuachaxin kuènté Díos. Jahara la ó jína nohara tíhi. 23#Mt. 27:35; Mr. 15:24; Lc. 23:33; Jn. 19:18.*Kjónté xi̱kaha kꞌuíkonra la itse̱ra ti chꞌin Jesús éxi tsíkjenka̱yáxin Díos ósé. La jahara kjui̱nchekꞌayéhéra chꞌan ti sin jínahña la kjua̱kꞌe̱nka̱ni sin chꞌan ijnko ntacruz la kꞌóñá sin chꞌan. 24#Mt. 28:5, 6; Mr. 16:6; Lc. 24:5.*Kjánchó Díos la kjuínchexechón chꞌan ínaá, la kjuakjìin chꞌan ti kjuatjoté kuènté kjuachꞌén#2:24 kjuachꞌén muerte kixin ti kjuachꞌén la xitjahya tsꞌe̱tue̱hen ti Ìnchéni Jesús. 25#Sal. 16:8-11.*Éxi tsíchronka ti rey David ósé, ndáchro:

Jaha Ìnchéni, nkochríxín tjétaoán nti̱a.

Jaha mé itjen ti tjaná chjina kixin chróchrakonhña.

26Méxra̱ imá chéhe̱ a̱sená la irꞌua̱ tsje̱xia̱n ti nkehe náxrjón.

La nona kixin kohya nkehe jínahña tso̱na kjónté itsꞌén.

27Kixin jaha la tsi̱toéhya ti a̱sená chríkjan ti sin tsíkꞌen

la ko tsjájonhña kjuachaxin kixin tso̱xra ti nto̱na#2:27 nto̱na mi cuerpo kixin janhan tꞌa̱há ixra̱.

28Jaha mé kjuàkua ti nti̱a tsjajon kjuachón,

la jaha mé tsjánjua ti kjuachéhe̱ kixin tꞌayakohén ti janhan.

Mé xi̱kaha tsíkjin ti rey David.

29’Kíchóni ti̱to̱héra tsondáxrja̱n kixin David, ti nkexro kꞌuaxrjeníxini, mé ikꞌuén chꞌan la ko xravá chꞌan, la na̱xa̱ itjen ti xravá chꞌan. 30#Sal. 132:11; 2Sam. 7:12, 13.*David mé ijnko nkexro kꞌuéchronka itén Díos la ó nohe chꞌan kixin chaxín chrónka Díos kixin ijnko nkexro tsꞌaxrjeníxin ti jehe chꞌan mé tsꞌóna rey la tsꞌe̱to̱an éxi jehe chꞌan. 31Mé xi̱kaha David la ósé ó nohe nkehe tso̱hen la chrónka kixin tsoxechón Cristo la ko ti a̱sén Cristo la tsíto̱ehya ti siín ti sin tsíkꞌen la ko tso̱ka̱xrahña ti cuerpo kuènté chꞌan. 32Méxra̱ Díos kjuínchexechón ti Ìnchéni Jesús la kaíni chrónkani kixin chaxín tíha. 33Ndá Díos mé sákjui̱ko ti chꞌin Jesús la itjen chꞌan ti itja chjina kuènté Díos. La Díos, ti Itꞌé Jesús, chrónka chꞌan kixin tsochrꞌán chꞌan ti Ncha̱kuén chꞌan, ndá ijie ó ikui la ó kꞌuíkonra la ko kuihínra kaín ti nkehe kóhen. 34#Sal. 110:1.*Kixin David na̱xa̱ sákjui̱hya nkaya nka̱jní, la ndáchro:

Ìnchéni Díos mé ndáche ti Ìnchéni:

“Tjakꞌe ti tjaná chjina,

35tsjixinjña tsjásian kaín ti sin nínkakohan chrínkí to̱tá.”

36’Méxra̱ tihínra kaínra chojni israelita kixin ti chꞌin Jesús, ti nkexro kjuakꞌénka̱nira ntacruz, la Díos mé kjuíchꞌéna chꞌan Ìnchára, la tíha ti Cristo ―mé xi̱kaha chrónka chꞌin Pedro.

37Ndá ti ó kuíhin sin kaín tíha, la imá kꞌuává a̱sén sin. La kjuanchankíhi sin ti chꞌin Pedro la ko ti íso sin kꞌuájiko chꞌin Jesús ndáchro sin:

―Kíchóni, ¿xá nkehe chrókjuíchꞌeni?

38Ndá chꞌin Pedro ndáchro:

―Ti̱to̱héra ti iji̱ára la titekáonra Díos la tikitiaxínra ti ihni̱é Ìnchéni Jesucristo ndá tsoxika ti iji̱ára, ndá Díos tsjajon ti Ncha̱kuén chꞌan tsꞌayéhéra 39jahara, xja̱anra la ko kaín ti chojni tjejó ikjín la ko kaín ti nkexro tsꞌéye̱he̱ chꞌan mé tsochjéhe chꞌan ti Ncha̱kuén chꞌan éxi tsíndáchro chꞌan.

40Mé xi̱kaha ndáchro chꞌin Pedro la na̱xa̱ ndáchro chꞌan:

―Ti̱to̱héra ti nkehe jínahña tjénka̱yáxinra la tꞌaxrjékjanxínra ti chojni siín chjasintajni, la ndá tsaára.

41Ndá kaín ti sin kuitekaon la kuikite sin, la ti ña̱o a mé kóchjina iní mil chojni la kꞌuíton sin ti sin xráxín siín. 42Ndá kaín sin nkoko̱a kꞌuejó sin la kjuínchexiteyá sin ti nkehe kjuako ti sin kjueyá chꞌin Jesús, la kjuínki̱tsa sin kjuajon sin nkehe sinie ti íso sin, la chjéhe sin Díos kjuasáya la ko kónkotsé sin kjónie sin ti nio̱tja̱ xraxinkakonxín sin ti ikꞌuén Ìnchéni.

Ti sin xránkíxixín kuinkáchónki Ìnchéni

43A̱ndá kaín ti íso chojni mé chrákon sin kixin ti kjuaxroan kjuasin ti sin tsíkjeyá chꞌin Jesús. 44#Hch. 4:32-35.*La kaín ti sin tinkáchónki Ìnchéni la nkoko̱a kꞌuejó sin la ko kóxika̱ye̱he sin ti nkehe chónta sin. 45Kjuínchekji sin kaín ti nkehe chónta sin la chjéhe sin ti chichaon nkojnko ti sin chóntahya. 46La nkojnko ña̱o kónkotsé sin ni̱nko la nkojnko ndo̱e sin kjonieko kícho sin. La ko kjónie sin nio̱tja̱ kixin xraxinkakonxín sin ti ikꞌuén Ìnchéni, la kjuaxróxin kꞌuejó sin la ko kjuínki̱tsa kícho sin. 47Chjéhe sin kjuasáya Díos, la kaín chojni chóntehe kjuasàya ti jehe sin. La nkojnko ña̱o kjueyá Ìnchéni Jesucristo íso chojni la a̱ntsí nkákꞌánkí ti sin tónkotsé tjinkaon tsaá.

Currently Selected:

Hechos 2: poeNTplus

Highlight

Copy