ປະຖົມມະການ 25
25
ເຊື້ອສາຍຂອງອັບຣາຮາມຈາກຍິງຜູ້ອື່ນ
(1 ຂຄ 1:32-33)
1ອັບຣາຮາມໄດ້ແຕ່ງງານກັບຍິງອີກຜູ້ໜຶ່ງຊື່ວ່າ ເກຕູຣາ. 2ນາງເກີດລູກຊາຍຫລາຍຄົນໃຫ້ເພິ່ນດັ່ງນີ້: ຊິມຣານ, ໂຢກຊານ, ເມດານ, ມີດີອານ, ອີຊະບາກ ແລະຊູອາ. 3ໂຢກຊານເປັນພໍ່ຂອງເຊບາ ແລະເດດານ; ເຊື້ອສາຍຂອງເດດານ ມີດັ່ງນີ້: ອັດຊູຣີມ, ເລຕູຊີມ ແລະເລອຸມມີມ. 4ລູກຊາຍຂອງມີດີອານ ມີດັ່ງນີ້: ເອຟາ, ເອເຟ, ຮານົກ, ອາບີດາ ແລະເອນດາອາ. ພວກເຂົາທັງໝົດເປັນລູກຫລານຂອງນາງເກຕູຣາ.
5ອັບຣາຮາມມອບມໍຣະດົກທຸກຢ່າງໃຫ້ອີຊາກ; 6ກ່ອນຕາຍໄປ ເພິ່ນໄດ້ແບ່ງຊັບສິ່ງຂອງບາງສ່ວນໃຫ້ລູກຊາຍທຸກໆຄົນ ທີ່ໄດ້ຈາກເມຍຜູ້ອື່ນໆ. ແລ້ວກໍໃຫ້ພວກເຂົາໜີຈາກອີຊາກລູກຊາຍຂອງຕົນ ໄປຢູ່ດິນແດນທາງທິດຕາເວັນອອກ.
ອັບຣາຮາມຕາຍແລະຖືກຝັງໄວ້
7ອັບຣາຮາມມີອາຍຸທັງໝົດ 175 ປີ. 8ຈາກນັ້ນ ອັບຣາຮາມກໍໄດ້ສິ້ນລົມຫາຍໃຈ ແລະໄດ້ຕາຍໄປໃນຂະນະທີ່ມີອາຍຸສູງ ເປັນຜູ້ເຖົ້າທີ່ມີອາຍຸໝັ້ນຍືນ ແລະໄດ້ຖືກຮວບຮວມໄວ້ກັບຄົນທັງຫລາຍຂອງຕົນ. 9ອີຊາກແລະອິດຊະມາເອນລູກຊາຍຂອງເພິ່ນໄດ້ຝັງສົບເພິ່ນໄວ້ ທີ່ຖໍ້າມັກເປລາໃນນາທາງທິດຕາເວັນອອກຂອງເມືອງມຳເຣ ຊຶ່ງເປັນຂອງເອຟະໂຣນ ລູກຊາຍຂອງໂຊຮາຊາວຮິດຕີ. 10ນາບ່ອນນີ້ອັບຣາຮາມໄດ້ຊື້ຈາກຊາວຮິດຕີ ອັບຣາຮາມກັບເມຍຂອງເພິ່ນທັງສອງກໍຖືກຝັງໄວ້ໃນທີ່ນັ້ນ. 11ຫລັງຈາກອັບຣາຮາມໄດ້ຕາຍໄປແລ້ວ ພຣະເຈົ້າໄດ້ອວຍພອນອີຊາກລູກຊາຍຂອງເພິ່ນ ຜູ້ທີ່ອາໄສຢູ່ໃກ້ “ນໍ້າສ້າງຂອງພຣະເຈົ້າຜູ້ເຫັນຂ້ອຍ.”
ເຊື້ອສາຍຂອງອິດຊະມາເອນ
(1 ຂຄ 1:28-31)
12ອິດຊະມາເອນຜູ້ທີ່ນາງຮາກາ ສາວໃຊ້ຊາວເອຢິບຂອງນາງຊາຣາ ເກີດໃຫ້ອັບຣາຮາມນັ້ນ 13ມີລູກຊາຍຕາມລະດັບການເກີດ ດັ່ງນີ້: ເນບາໂຢດ, ເກດາ, ອັດເບເອນ, ມິບສາມ, 14ມີຊະມາ, ດູມາ, ມາສາ, 15ຮາດັດ, ເຕມາ, ເຢຕູເຣ, ນາຟິດ ແລະເກເດມາ. 16ພວກເຂົາເປັນບັນພະບຸລຸດຂອງສິບສອງເຜົ່າ ແລະຊື່ຂອງພວກເຂົາກາຍເປັນຊື່ຂອງບ້ານກັບທີ່ພັກອາໄສຕ່າງໆ. 17ອິດຊະມາເອນໄດ້ຕາຍໄປເມື່ອອາຍຸໄດ້ 137 ປີ. 18ເຊື້ອສາຍຂອງອິດຊະມາເອນອາໄສຢູ່ໃນດິນແດນ ລະຫວ່າງເມືອງຮາວີລາແລະຊູເຣ ທີ່ຢູ່ທາງທິດຕາເວັນອອກຂອງປະເທດເອຢິບ ຕາມທາງໄປສູ່ປະເທດອັດຊີເຣຍ. ພວກເຂົາອາໄສຢູ່ຕ່າງຫາກຈາກເຊື້ອສາຍຂອງອັບຣາຮາມ.
ເອຊາວແລະຢາໂຄບເກີດ
19ຕໍ່ໄປນີ້ແມ່ນເລື່ອງຂອງອີຊາກ ລູກຊາຍຂອງອັບຣາຮາມ. 20ອີຊາກມີອາຍຸໄດ້ 40 ປີ ເມື່ອແຕ່ງງານກັບເຣເບກາລູກສາວຂອງເບທູເອນ (ຊາວປາດານ-ອາຣາມຈາກເມໂຊໂປຕາເມຍ) ແລະເປັນນ້ອງສາວຂອງລາບານ. 21ຍ້ອນນາງເຣເບກາບໍ່ມີລູກ ອີຊາກຈຶ່ງພາວັນນາອະທິຖານຕໍ່ພຣະເຈົ້າຢາເວເພື່ອນາງ. ພຣະເຈົ້າຢາເວຕອບຄຳພາວັນນາອະທິຖານຂອງລາວ ແລະນາງເຣເບກາຈຶ່ງຕັ້ງທ້ອງ. 22ເມື່ອນາງຖືພາຢູ່ນັ້ນ ລູກຝາແຝດກໍບຽດກັນຢູ່ໃນທ້ອງ. ນາງເລີຍເວົ້າວ່າ “ຖ້າເປັນເຊັ່ນນີ້ ເປັນຫຍັງຂ້ອຍຈຶ່ງຢາກມີລູກ?” ດັ່ງນັ້ນ ນາງຈຶ່ງພາວັນນາອະທິຖານຖາມພຣະເຈົ້າຢາເວກ່ຽວກັບເລື່ອງນີ້.
23ພຣະເຈົ້າຢາເວຕອບນາງວ່າ,
“ມີສອງຊົນຊາດທີ່ຢູ່ພາຍໃນເຈົ້າ;
ເປັນສອງຊົນເຜົ່າທີ່ຈະເກີດມາຕໍ່ສູ້ກັນ.
ສ່ວນຜູ້ໜຶ່ງນັ້ນຈະແຂງແຮງລື່ນກວ່າ;
ຜູ້ອ້າຍຈະຮັບໃຊ້ຜູ້ເປັນນ້ອງຂອງຕົນ.”
24ເມື່ອເຖິງກຳນົດຄອດ ນາງໄດ້ເກີດລູກຊາຍເປັນຝາແຝດ. 25ຜູ້ທີ່ອອກມາກ່ອນແດງແລະມີຂົນເຕັມຕົວ ເໝືອນເສື້ອທີ່ເຮັດດ້ວຍຂົນສັດ. ດັ່ງນັ້ນ ເພິ່ນຈຶ່ງໃສ່ຊື່ໃຫ້ລາວວ່າ ເອຊາວ. 26ຜູ້ທີສອງອອກມາມືຈັບສົ້ນໜ່ອງຂອງເອຊາວໄວ້. ສະນັ້ນ ລາວຈຶ່ງມີຊື່ວ່າ ຢາໂຄບ. ເມື່ອລູກຊາຍຝາແຝດເກີດມາ ອີຊາກອາຍຸໄດ້ 60 ປີ.
ເອຊາວຂາຍສິດທິອ້າຍກົກ
27ເດັກນ້ອຍທັງສອງເຕີບໃຫຍ່ຂຶ້ນມາ ແລະເອຊາວກາຍເປັນນາຍພານທີ່ເກັ່ງກ້າທັງຊຳນິຊຳນານ ແລະມັກໃຊ້ຊີວິດຢູ່ນອກບ້ານ. ສ່ວນຢາໂຄບນັ້ນ ເປັນຄົນສຸກຂຸມແລະມັກຢູ່ແຕ່ໃນເຮືອນ. 28ອີຊາກຮັກເອຊາວເພາະເພິ່ນໄດ້ກິນສັດທີ່ລາວຫາມາໄດ້. ສ່ວນເຣເບການັ້ນນາງຮັກຢາໂຄບ.
29ມື້ໜຶ່ງ ເມື່ອຢາໂຄບກຳລັງເຮັດແກງໝາກຖົ່ວຢູ່ ກໍພໍດີເອຊາວກັບມາແຕ່ລ່າເນື້ອ. ລາວຫິວຫລາຍ 30ຈຶ່ງເວົ້າກັບຢາໂຄບວ່າ, “ຂ້ອຍຂໍກິນແກງໝາກຖົ່ວແດງຂອງເຈົ້າຈັກຄຳແດ່ ເພາະຂ້ອຍຫິວຫລາຍແທ້ໆ.” (ດ້ວຍເຫດຜົນດັ່ງກ່າວນີ້ ເພິ່ນຈຶ່ງເອີ້ນເອຊາວວ່າ ເອໂດມ)
31ຢາໂຄບຕອບວ່າ, “ຂ້ອຍຈະໃຫ້ກິນ ຖ້າເຈົ້າຂາຍສິດອ້າຍກົກໃຫ້ຂ້ອຍ.”
32ເອຊາວຕອບວ່າ, “ເອົາລະ ຂ້ອຍຫິວໃກ້ຈະຕາຍຢູ່ແລ້ວ ສິດອ້າຍກົກຈະມີປະໂຫຍດຫຍັງແກ່ຂ້ອຍ.”
33ຢາໂຄບຈຶ່ງຕອບວ່າ, “ສາບານກ່ອນແມວ່າ ເຈົ້າຈະມອບສິດອ້າຍກົກໃຫ້ຂ້ອຍ.”
ເອຊາວຈຶ່ງສາບານ ແລະຂາຍສິດອ້າຍກົກຂອງຕົນໃຫ້ຢາໂຄບ. 34ແລ້ວຢາໂຄບກໍເອົາເຂົ້າຈີ່ແລະແກງໝາກຖົ່ວໃຫ້ເອຊາວ, ລາວກິນແລະດື່ມຈົນອີ່ມແລ້ວກໍໜີໄປ. ເອຊາວໄດ້ໝິ່ນປະໝາດສິດຂອງອ້າຍກົກ.
Currently Selected:
ປະຖົມມະການ 25: ພຄພ
Highlight
Share
Copy
Want to have your highlights saved across all your devices? Sign up or sign in
@ 2012 United Bible Societies. All Rights Reserved.
