Utandiko 18
18
Isaki wino walavilwe wavyalwa
1Yawe aloleka kuli Abulaamu ku miti yamuzilo yakwe Mamule. Abulaamu watenzi pa mulyango wi taalu lyakwe mu nsita ino ilanzi lyatiliwalisya nu kukaya cuze. 2#Aye 13:2 Lino wasanzula amanso alola aonsi yatatu yaimi katalamukila lilyo kwene asimula ku kuyazengela, afika afukama pansi afupime, 3avwanga ati, “Yasambazi ndi mwalola ukuti natindingana, mukwai ndanji mutapitilila kwaula kuti mutale mupuze pano pa muomvi winu. 4Lekini yalete utumanzi mufulale ingazo, nga mutale mupuze mu cisao ca muti uu. 5Lyene namamuletela cakulya kuti mutonsye kukanwa, cimupele maka akuti lyene mutwalilile nu ulendo winu. Ala mwancindika pa kwiza ukwane, acino lekini imutumikile.”
Antu yaya yatatu yazumila yati, “Twataizya cita vivyo kwene.”
6Alino Abulaamu acincila aingila mwi taalu nga anena Sala ati, “Kalauka, tola yagaloni ya usu wa ngano, kanda umunya upange mikate.” 7Nupya Abulaamu asimwilila ku ufyo wa ng'ombe asola mutepa unone, nga anena muomvi kuti aukome zuwa. 8Alino Abulaamu atoola iziya litimbe ilya lwambu ni lisi, ni nyama nga aimula antu yalya mu cisao ca muti. Lino yakulya ala wene aimi akuyatumikila.
9Lyene yamuzya yati, “Uzye Sala, umuci wako ali kwi?”
Abulaamu nawe aasuka ati, “Ali mwi taalu.”
10 #
Lom 9:9
Wenga uwa munoyali ati, “Ukufuma ndakai ndawela ndi myezi fundimbali yasila mwaka ukwiza, nga Sala umuci wako alavyala umwana umonsi.” Sala ala akukutika pa mulyango wi taalu kwi tundu lyakwe wino wavwanganga. 11Abulaamu na Sala yali akote cuze, na Sala ala wasazya mwata wakwe yamangu. 12#1Pet 3:6 Caleka Sala aseka umwisikulu wenga ati, “Ne mukote vikwene nu wane umukote, nga insuna yakuvyala ingafuma kwi?” 13Lyene Yawe auzya Abulaamu ati, “Uzye pacani cino Sala waseka nu kuti, ‘Uzye umucumi ukuti ningavyala umwana mu ukoloci wane?’ 14#Luk 1:37 Uzye kwaya cimwi icatalila Yawe? Ndi vino mvwanzile ndawela pa nsita isontwe mwaka ukwiza, mu mwezi uwalenga fundimbali Sala alavyala umwana umonsi.”
15Sala pamulandu wa ntete akana ati, “Mukwai ntasesile.”
Mwene nawe ati, “Ee, wali waseka.”
Abulaamu wapapatilako Sodoma
16Lyene antu yalya yapita iyaya pa ncende isamuke, yalola Sodoma pisina na Abulaamu ayasukilila ukuyafumya muzi. 17Lyene Yawe aelenganya ati, “Ntalinzile mfise Abulaamu cino nasya ncite. 18Amu mupanda wakwe yalaya uluko lukulu nupya ulwa maka, ni mitundu yonsi yamu nsi ilanguzya kuti njipolelele ndi vino namupolelela. 19Namusolola kuti nawe angapeela isunde ku ana yakwe pamwi na amu mupanda wakwe kuti yayela nene, yacita vyawololoke ni vyaulungami. Ndi avino yangaya, lyene ndamucitila vyonsi vino namulaya.”
20Lyene Yawe ati, “Kuilizyanya kwa antu pali Sodoma na Gomola kwatikucilamo, nu luyembu ululimo lwatilwipisya. 21Ndinzile mfikeko nkailolele ndi cakuti vino antu yakuilizyanya ivyacumi nanti foo.”
22Lyene antu yalya yaili yapita ukuya ku Sodoma, lelo Yawe asyala na Abulaamu. 23Alino Abulaamu apalamila kuli Yawe amuuzya ati, “Uzye cumi ulonona akacita vyawololoke kumwi na ankota? 24Ndi mu musumba muli antu amakumi yasano akacita vyawololoke, uzye ungonona umusumba onsi? Uzye utange uuleke pakuti ufyusye antu amakumi yasano? 25Cumi utangonona antu akacita vyawololoke pamwi na ankota. Citangaya, wemo utangacita cico. Ndi avino ungacita, ale lyene antu akacita vyawololoke yangavunukilwa kumwi na ankota. Awe, citangaya! Kapingula wa antu amu nsi yonsi asi uwalufyengo.”
26Yawe aasuka ati, “Ndi mu Sodoma ningazanamo antu amakumi yasano akacita vyawololoke, ntalonona umusumba pamulandu wakwe yayo.”
27Nupya Abulaamu avwanga ati, “Napapata unjelele pa kuuzya kunuli nu kupama. Nemo nene muntu silesile kunuli, nupya ntakweti nsambu yakulanda. 28Nga ndi cali mu musumba ulya mwazanwa antu amakumi yani na yasano akacita vyawololoke, lelo pulila sile yasano, uzye ulonona umusumba pali yao aulila?”
Yawe aasuka ati, “Ntalonona umusumba ulya ndi ningazanamo antu amakumi yani na yasano.” 29Nupya Abulaamu ati, “Ndi cali mu musumba ulya mwazanwa sile antu amakumi yani akacita vyawololoke, uzye ulaonona?”
Yawe aasuka ati, “Ntalonona umusumba ulya ndi mwazanwa antu amakumi yani.”
30Abulaamu avwanga ati, “Napapata Mwene utasoka, nzumilizye ndande nupya. Ndi mu musumba ulya mwazanwa antu amakumi yatatu akacita vyawololoke, uzye ulaonona?”
Yawe aasuka ati, “Ntalacita cico ndi ningazanamo antu amakumi yatatu.”
31Abulaamu avwanga ati, “Napapata Mwene unjelele pa kupama kulanda kunuli. Ndi mu musumba ulya mwazanwa sile antu amakumi yaili akacita vyawololoke, uzye ulaonona?”
Yawe aasuka ati, “Ntalonona umusumba ulya ndi ningazanamo antu amakumi yaili akacita vyawololoke.”
32Abulaamu avwanga ati, “Napapata Mwene utasoka nupya, lelo nzumilizya mvwange lyonga sile. Ndi mu musumba ulya mwazanwa sile antu ikumi akacita vyawololoke, uzye ulaonona?”
Yawe aasuka ati, “Ntalonona umusumba ulya ndi ningazanamo antu ikumi akacita vyawololoke.” 33Lino Yawe wamala kulanda na Abulaamu, apita amusya, nga Abulaamu nawe aswilila ukwakwe.
Currently Selected:
Utandiko 18: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
