Genes 13
13
CHAB. XIII.
1Hag Abram o tond euz an Egypt, gant he c’hreg ha kement hen devoa, ha Lot ive assambles ganthan, a ieaz var-zu ar C’hreiz-deiz.
2Hogen Abram o oa pinvidik meurbed en he loened, en arc’hant hag en aour.
3Neuze e tistroaz var he giz dre an hent ma oa deuet euz ar c’hreiz-deiz da Vethel, beteg al leac’h ma oa bet he danten er pen kenta, etre Bethel hag Aï;
4el leac’h ma oa an aoter hen doa great diaraog, hag Abram en em erbedaz eno ouz an Aotrou.
5Hogen Lot, pehini a oa gant Abram, hen doa ive denved eujened ha tantennou.
6Hag ar vro ne oa ket braz awalc’h d’ezhe evit chom assambles; rag ker braz oa ho madou, ne hellent mui chom an eil e-kichen egile.
7Ac’hane e savaz disput etre ar zervicherien a ziwalle loened Abram, hag ar re a ziwalle loened Lot. Hogen ar Gananeed hag ar Pherezeed a oa neuze oc’h ober ho demeurans er vro-ze.
8Hag Abram a lavaraz da Lot: Miromp, me az ped, ne vez disput e-bed etre me ha te, nag etre va messaerien ha da re-te, rag ni a zo breudeur.
9Daoust ha n’ema ket ar vro holl diraz’oud? Pella diouz’in; mar kemerez an tu kleiz, me a ielo a-zeo; ha mar kemerez a-zeo, me a ielo a-gleiz.
10Neuze Lot, o sevel he zaou-lagad a velaz holl blenen ar Jourdan eur blenen pehini, (araog m’hen doe an Aotrou distrujet Sodom ha Gomorrh) a oa doureet pen-da-ben beteg Tsoar, evel jardin an Aotrou, evel bro an Egypt.
11Ha Lot a choazaz evithan holl blenen ar Jourdan hag ez eaz var-zu ar zav-heol; hag e tispartijont an eil diouz egile.
12Abram a chomaz e douar Canaan, ha Lot a ieaz da chom er c’heariou euz ar blenen, hag a zavaz he dantennou beteg Sodom.
13Hogen bourc’hisien Sodom a oa tud fall, ha pec’herien vraz dirag an Aotrou.
14Hag an Aotrou a lavaraz da Abram goude ma oe dispartiet Lot diganthan: Sav eta da zaou-lagad ha sell, deuz al leac’h ma’z oud, etrezeg an Hanter-noz, etrezeg ar C’hreiz-deiz, etrezeg ar Zav-heol, hag etrezeg ar C’huz-heol;
15rag an holl vro a velez a roin d’id, d’id ha d’ar wenn ac’hanoud da viken.
16Ha me a lako da vugale da zond ker stank ha poultren an douar; mar gell unan-benag counta ar boultren divar an douar, neuze e vezo gou-vezet ive an niver euz da lignez en da c’houde.
17Sav, bale dre ar vro a-dreuz hag a-hed; rag me hen roio d’id.
18Neuze Abram a zavaz he dantennou ac’hane, hag a zeuaz da chom e-tal ar gwez dero, a zo e bro Mamre, e douar Hebron, hag e savaz eno eun aoter da Zoue.
Currently Selected:
Genes 13: JEN1897
Highlight
Share
Compare
Copy
Want to have your highlights saved across all your devices? Sign up or sign in
Published by the British and Foreign Bible Society in 1897 and reprinted in 1935.
