Matiu 27
27
À umnǝ Yesu a ɓadǝm Bilatus
(Markus 15:1; Luka 23:1-2; Yohana 18:28-32)
1Lang ban kwarna adyan ngga, agbani pǝris kat andǝ aɓwana-mǝgule à yì dapi à kurkunarǝia amur Yesu à nǝ̀ wal-lui. 2À taka bui sǝ à um nǝi aban Bilatus ɓwa Roma, nggwamna mala bu-nzali Yahudi.
Yahuda gyar ɓamuri
(Amǝ Mishan 1:18-19)
3Lang Yahuda mana mak Yesu sǝni à kasǝna ɓashi à nǝ̀ wal Yesu ka, pak bumkiɗikea, pǝlǝa nyesǝi agbani pǝris andǝ aɓwana-mǝgule mǝsǝboalo zǝnariya lumi-tārú mana ak a buia ka.#27:3 Ɓalli gbal aɓa: Aturo 1:18,19. 4Nea wia ama, “Ən pangŋǝna cauɓikea, mana ǝn mak ɓwa mǝnana pak ɓe kǝ cauɓikea raka.”
À pǝlǝa à ne wi ama, “Man oasǝ sǝm aɓa mǝno ka? Mana ka mona nǝmurǝo.”
5Pǝlǝa Yahuda twal boale ka sukki a nzali aɓa Ndàmǝgule mala Ɓakuli, sǝ puro o kya ɗur nggur a myali gyar ɓamur rǝì.
6Agbani pǝris pwan boale sǝ à na ama, “Nggurcau bangŋa ama ɓoaro ɓǝa tsǝk ulang mǝnia yì boalo ka aɓa ndaboalo mala Ndàmǝgule mala Ɓakuli ɗang, acemǝnana boalo nkila na.” 7À naki acau amur boale, sǝ à masǝlǝate ka à na ama à nǝ̀ kurǝ́na nzali mala mǝɓaki-ankwaring nǝi ɓǝ̀ duk ɓembe tsǝk abǝri. 8Nda gir mǝnana tsǝa sǝ à kǝ tunǝ banì yalung ama, “Nzali Nkila” ka. 9Mǝnia ka nda lumsǝ ɓangna mala Irmya mǝnana ama,
À twal boalo zǝnariya
mǝsǝì lumi-tārú,
boalo mǝnana amǝ Isǝrayila
kasǝa à nǝ̀ pa amuri ka,
10nda à kurǝ́na nzali mala
mǝɓaki-ankwaring nǝi ka,
kǝla mǝnana Mǝtalabangŋo
bang ngga.#27:10 Ɓalli gbal aɓa: Zak 11:12-13.
Bilatus ɗiki Yesu acau
(Markus 15:2-5; Luka 23:3-5; Yohana 18:33-38)
11Yesu yi came a ɓadǝm Bilatus ɓwa Roma, nggwamna amur bu-nzali Yahudi. Nggwamna ɗi ama, “A nda murǝm mala amǝ Yahudi le?”
Yesu eari wi ama, “E, nda kǝla mǝnana a bang ngga.”
12Lang agbani pǝris andǝ aɓwana-mǝgule yi banggi acau à tsǝki Yesu a rǝì ka, duk kuni piu. 13Bilatus pǝlǝa ɗi ama, “A ok acau mana aɓwana man kǝ na a muro ama a pak ka re?” 14Sǝ Yesu loasǝ kuni amur ko kǝ cau mwashat ɗang. Gir nî pakki nggwamna gir'ndali.
À kasǝi Yesu ɓashi lú
(Markus 15:6-15; Luka 23:13-26; Yohana 18:39–19:16)
15Ko a ya pwari Lamsan Yalimuru ka pak ka nggwamna kǝ panzǝ mwashat ata apursǝna mana aɓwabunda earce ka. 16A baku mǝno ka ɓe pursǝna nakam lullǝi ama Barabbas.#27:16 Aɓea malǝmce mana à gilǝia nǝ bu ka à tsǝa ama lullǝi nda Yesu Barabbas; anggo gbal a 27:17. Aɓwana surǝì pepe nggea kanggǝrang mǝyàl-nzongcau na. 17Lang ɓwabunda yi ramǝna ka, Bilatus ɗia ama, “Yana mwashat wu earce ɓǝ̀ ǝn panzǝa wuni: Barabbas na le ko Yesu mana à tunǝki ama Kǝrǝsti ka?” 18Yì ka, sǝlǝna ama mɓali na tsǝk aɓwana-mǝgule sǝ à yiu nǝ Yesu abani ɓǝ̀ pakki wi ɓashi ka.
19Lang Bilatus na ban do amur buno ɓashi ka, mami turi ban nǝ cau ama, “Pusǝki abuo, nying ɓwa mǝno andǝa kunpwasǝa male, acemǝnana ǝn tanni a lorǝo kǝrkǝr yalung ata cau male.”
20Agbani pǝris andǝ aɓwana-mǝgule ka à ɓorikitakun aɓwabunda ama ɓǝa ear ama Barabbas na ɓǝa nyi, sǝ Yesu ka ɓǝa wali.
21Bilatus nyare ɗi ɓwabunda ɗǝm ama, “Ata aɓwana man ɓari ka yana mǝ nyi ɓǝ̀ o le?”
À ear ama, “Barabbas!” 22Bilatus pǝlǝa ɗia ama, “Sǝ Yesu mana à tunǝki ama Kǝrǝsti ka, mana ɓǝ̀ ǝn pang nǝi?”
À loasǝ gia kat ama, “Ɓǝa gballì a nggun!”
23Bilatus ɗia ama, “Ace mana? Ya cauɓikea nani pa?”
Sǝ ɓwabunda loasǝ gia kǝrkǝr ama, “Ɓǝa gballì a nggun!”
24Lang Bilatus sǝni pà nǝ̀ gandǝ pak kǝgir raka, sǝ ɗǝm ngga aɓwana no à nǝ̀ loasǝ munǝo a kusǝ ce ka, twal mur laki abui a ɓamǝsǝ aɓwabunda. Na ama, “Buam pa ɓa nkila mala mǝnia yì ɓwa ka ɗang. Mana ka ma'wun na!”#27:24 Ɓalli gbal aɓa: Nggur 21:6-9.
25Ɓwabunda kat ear ama, “Ɓǝ̀ nkile do amur sǝm sǝnǝ amuna ma'sǝm!”
26Bilatus pǝlǝa panzǝia wia Barabbas, sǝ Yesu ka tsǝa ɓǝa kwe, pǝlǝa tasǝi a buia ɓǝa kya gballì a nggun.
Asoje ɓangginǝ Yesu
(Markus 15:16-20; Yohana 19:2-3)
27Asoje mala nggwamna twal Yesu a um nǝi a banturo mǝgule malea sǝ à kya rambǝ acili asoje a kàrǝì a ɓalǝu. 28À swarki wi adaura rǝì sǝ à turi wi daura-murǝm mǝbangŋe. 29À alta zwe à tana jeko nǝi sǝ à oasǝi wi a ɓamuri. À pe wi gara a bui mǝli sǝ à ɓun a ɓadǝmbǝi à kǝ ɓanggini ama, “Ɓǝ̀ rǝo pwalo, Murǝm mala amǝ Yahudi!” 30À takki ntāra a rǝì, pǝlǝa à ak gara mana a bui ka à walki nǝi a ɓamuri. 31Lang à ɓanggina nǝi ka pǝlǝa à swari wi daura-murǝm mana à turi wi ka, sǝ à nyesǝ amale à turi wi a rǝì. À kuti nǝi aban ká gballe.
À gballì Yesu a nggun-gangndi
(Markus 15:22-32; Luka 23:27-43; Yohana 19:17-27)
32Lang à purni ɓa nggeala ka, à kya je andǝ ɓeɓwa mala nggeala Sayirin, lullǝi ama Shiman. À tsǝi púp ɓǝ̀ aki Yesu twal nggun-gangndi.
33À yì bik ban mǝnana à tunǝki ama Golgota ka (ban mala nkpoula ɓamuru). 34Akano à pe Yesu mùr-anap mana à zurǝì andǝ ɓe mùrgìr mǝlulle ama ɓǝ̀ nui. Lang oe a kuni ka, ginǝi.#27:34 Ɓalli gbal aɓa: Ang 69:21.
35Asoje pǝlǝa à gballì Yesu a nggun-gangndi sǝ à kocàca amur adaura male, à gakia rǝia.#27:35 Ɓalli gbal aɓa: Ang 22:18. 36Pǝlǝa à kya dum nǝ do abanì a yale. 37À gilǝ cau mana à ɓashi wi nǝi ka sǝ à gballì arǝ nggun amuri, ama: ƁWA MƏNIA KA NDA YESU, MURƏM MALA AMƏ YAHUDI. 38À gballì Yesu andǝ aɓea aɓwana ɓari amǝ-akiagir mala aɓwana nǝ mazo, arǝ anggun-gangndi malea, mwashat a bui mǝli sǝ ɓe a bui mǝnggare. 39Aɓwana mana à kǝ kuti a njargula ka à sanggì, à piki muria a mala oalban#27:39 Ɓalli gbal aɓa: Ang 22:7; 109:25. 40à kǝ na ama, “We ɓwan a nǝ arki Ndàmǝgule mala Ɓakuli sǝ a nǝ ɓè aɓa nongŋo-tārú ka, amsǝ ɓamuro wuni ra. Ɓǝ̀ a nda Muna mala Ɓakuli ka, sulǝî mur nggun-gangndi mana ka.”#27:40 Ɓalli gbal aɓa: Mat 26:61; Yoh 2:19.
41Agbani pǝris andǝ amalǝm nggurcau andǝ aɓwana-mǝgule gbal ka à ɓanggini anggo. 42A na ama, “Yì ka, amsǝ aɓea ɓwana sǝ gandǝ amsǝ ɓamuri ɗang! Ɓǝ̀ yì nda Murǝm mala amǝ Isǝrayila ka, ɓǝ̀ sulǝî mur nggun-gangndi man ado, sǝ sǝm nǝ̀ earnǝi. 43Yì ka, guli arǝ Ɓakuli, sǝ na ama yì ka, Muna mala Ɓakuli na. Ɓǝ̀ Ɓakuli earce nǝ̀ amsǝi ka, ɓǝ̀ amsǝi ado sǝm nǝ̀ sǝni.”#27:43 Ɓalli gbal aɓa: Ang 22:8. 44Amǝ-akiagir mala aɓwana nǝ mazo man à gballia andǝi ka à ne wi acau mǝɓane gbal.
Lú mala Yesu
(Markus 15:33-41; Luka 23:44-49; Yohana 19:28-30)
45Nǝ bu-pwari lum-nong-ɓari mala pwari ka kara pǝndǝa yi gir ban, yi pur a bu-pwari tārú. 46Lang ndarǝ gbashi bu-pwari tārú mǝno ka, Yesu loasǝ gi kpǝm na ama, “Eli, Eli, lama sabatani?” Ɓālǝi ama, “Ɓakuli mem, Ɓakuli mem, palang sǝ a pǝlǝam nzǝmo?”#27:46 Ɓalli gbal aɓa: Ang 22:1.
47Lang aɓea ɓwana mana à came abanì à ok Yesu ka, à na ama, “Ndarǝ tunǝ Iliya.”
48Ɓe ɓwa aɓalǝia ɓang tsuk-tsuk kya twal soso, parri aɓa mur anap mǝhangŋe pǝlǝa oasǝi a kun gara lǝmndǝì wi ama ɓǝ̀ nu.#27:48 Ɓalli gbal aɓa: Ang 69:21.
49Acili aɓwana mǝno ka a na ama, “Came sǝm nǝ̀ sǝni ko yakǝla Iliya nǝ̀ yiu nǝ̀ yia amsǝi.”
50Yesu nyar ɗǝm loasǝ gi ɓua nǝ rǝcandǝa, pǝlǝa yilǝmi puri rǝì.
51Aɓa mǝno anggo ka kara lagir mǝnana à kasǝna ban mǝfele nǝi aɓa Ndàmǝgule mala Ɓakuli ka san a kuli kya bwal nzali, gau a ɓalǝu ɓari. Nzali dǝurǝo, atali arkia.#27:51 Ɓalli gbal aɓa: Pur 26:31-33. 52Aɓembe mǝnggia, sǝ aɓwana mala Ɓakuli mǝnana à wu ɗiɗyal ka, à lo nǝ yilǝmu. 53À purki ɓalǝ aɓembe. Anzǝm lo mala Yesu a ɓembe ka, à yì kuti aɓa nggeala mǝfele, à lǝmndǝ rǝia aban aɓwana pas.
54Lang ɓwamǝgule mala asoje andǝ asoje mǝno à tamsǝia yal Yesu sǝn dǝurǝo mala nzali andǝ agir mana à pak kat ka, ɓangciu pakkia wia, sǝ à na ama, “Ɓafo, ɓwa man ngga Muna mala Ɓakuli na.”
55Amamǝna na abanì pas mana à pur a Galili sǝ à yiu ata Yesu ace ɗenyi nǝi ka. À cam zak à kǝ sǝn gir mǝnana kǝ pak kat ka.#27:55 Ɓalli gbal aɓa: Luk 8:2,3. 56Maryamu Ɓwa Magdala, sǝ Maryamu nggea ka Jemis andǝ Yisǝfu, andǝ nggea ka amuna mala Zabadi, à ndakam aɓalǝ amamǝne.
Tsǝkban Yesu
(Markus 15:42-47; Luka 23:50-56; Yohana 19:38-42)
57Lang pwari kpana ka, ɓe mǝkume, ɓwa Arimatiya yiu. Lullǝi ama Yisǝfu. Yì gbal ka mǝkpata Yesu na. 58Kutio o aban Bilatus kya zǝmbǝa ɓǝa pe wi lú Yesu. Bilatus pǝlǝa bangŋa ama ɓǝa pe wi. 59Yisǝfu ka twal lú Yesu sǝ marǝki aɓa lagir mǝpwasǝe mǝɓoarnsari 60pǝlǝa tsǝi a ɓembe male mǝbǝshe mana tǝmi a nsoro tali ka. Ramnggita nggea tali mǝtangŋe girna kun ɓembe nǝi pǝlǝa kutio o. 61Maryamu Ɓwa Magdala andǝ ɓe Maryamu à yì do akano a ɓadǝm ɓembe.
À tsǝk asoje à yál ɓembe mala Yesu
62Lang ban fa ka, nda pwari Sabbat, agbani pǝris andǝ amǝ Farisi yi rambǝa a ɓadǝm Bilatus. 63À ne wi ama, “Ɓwamǝgule, ɓalǝ sǝm kasǝa ama mana mǝno yì mǝswarki aɓwana ndanǝ yilǝmu ka, bangŋa ama a nzǝm nongŋo tārú ka nǝ̀ loapi ɓembe.#27:63 Ɓalli gbal aɓa: Mat 16:21; 17:23; 20:19; Mar 8:31; 9:31; 10:33,34; Luk 9:22; 18:31-33. 64Nda sǝm ama wu tsǝa ɓǝà kǝ̀ yal ɓembe she ɓǝ̀ anongŋo tārú lumsǝna ka. Ɓǝ̀ ana raka yakǝla alaggana male nǝ̀ yia iu lui sǝ à nǝ̀ banggi aɓwana ama long nǝ lo a ɓembe. Sǝ mǝnia yì swarkiban nǝ nzǝmo ka nǝ̀ kuti mǝdǝmbe nǝ ɓike.”
65Bilatus banggia wia ama, “Wu kya tsǝk asoje ɓǝa yál ɓembe pepe aɓa njar mǝnana kat wu nǝ̀ gandǝ pe ka.” 66Pǝlǝa à o à kya tsǝk parbu mala murǝm amur ɓembe ace mǝnana ɓǝ̀ ɓwa je ka à nǝ̀ sǝlǝa, sǝ à tamsǝ asoje ɓǝa yál banì.
Currently Selected:
Matiu 27: mbu
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2016
