MARKIN 11

Anliana Jerusalema Lut

(Mt 21.1-11; Lk 19.28-40; Jn 12.12-19)

1Hava suale amani ha Jerusalem kola Oliv mual Bethphage le Bethani khuana a hong u le hava han ama a zolai ngai bila anni ha a tira. 2Amani ha ei ti pe, “Na maton u na sova khuana son se u ro sova son nei va lut u le sakuarpar atete anthung va mu un na ti a chunga mi ngal la chuang mak hava ha suta hong ko u ro. 3Hatuka min nangni rang ha ichangamo hantin nei tho u ati ten hintin hin ti u ro hiva hi Puman anang hava han hong man choi len unti,” ati.

4Hanke ase u na ei va mu u sakuarpar atete suakkhar kola apanga anthunga a om hava ha a khek u na. 5Hava han andinga om ngaiin hoho min mo, “Sakuarpar te ari nei sut u na imo nei tho u rang?” ati u.

6Hava han Isuan ei ti ang han amanin hava ngai rang ati pe u. Hatuka hangai han hava ha a manchoi u. 7Hatuka amanin ha sakuarpar te ha Isua kom achoi u na hava chunga a puan a dap u na aman hava chunga han a chuanga ansut. 8Hava han mi ngaiin a puan lampuia a dap u na hanuk atei ngaiin lam kola thingbak a tuka lama a pha u. 9Hatuka mi ngaiin a matona a nuka ase ngai han anringpana ankhek u na ei ti u: “Hosanna Puma raminga hong chu anpaka om rase! #Sam 118.25-26 10Ram honga tung rang, Koini na pa David a ram chu anpaka om rase, Chungnungkhit koma Hosanna.” 11Hatuka ama ha Jerusalema a luta Biakina ase hanke asir a panga anhoia a en zita ani ei bui sika ha somleianni ngai le a suak u na Bethani a pan u.

Theipui Khomak Asam

(Mt 21.18-19)

12Hatuka zing khua var nikhuana hangai ha Bethani ata a suak sua u le ama a von anchama. 13Hanke alapa ata abua ring theipui kung khat amu a havan ata a mara man boning tia a kola ase na tenchu abua rong ava mu atei ite mu mak asik chu hava han theipui anra hun nimak. 14Aman thing rang ha ei ti, “Atun ata tuten na mara na salai no rase.” Hiva chong hi ama zolai ngaiin ei riat u.

Isua Biakin Arathial

(Mt 21.12-17; Lk 19.45-48; Jn 2.13-22)

15Hatuka hangai ha Jerusalema ase u na ama ha Biakina a luta havana azuar, anchok ei tho u, ha va ngai ha a rasua na hatuka sum a thul ngai dokang le pharvali a zuar ngai ha ei ansut u na ngai dora ha a malet pe. 16Hatuka Pathian Biakina tuten neinun ei choi phal lai mak. 17Hatuka aman hangai ha aman chuna ei ril, “Ka in hi namtin ranga borzongna in nin ti tia anziak nimak mo? Tenchu nangnin mi that ngai khurpui a nei sin u.” #Isa 56.7; Jer 7.11

18Hiva chong a riat u na chaizung le Lekhanziakpu ngaiin hontinmo ama hi na masiat ngai tia ei ravana ei en u anchim ei achi u asik chu mi doran ama chong ril achang ei mandong.

19Hatuka ani luta azing le, kho tual panga ase u.

Theipui Kunga Anchuna

(Mt 21.20-22)

20Zing khua vara hangai ha ase tir u na kal choi chunga ei mu u ha theipui kung ha a razung le ile achar biang. 21Hava han Pitorin mana rui ha a mandona ei ti, “Rabbi enta, theipui kung khomak nei sam ha achar biang zei,” ei ti.

22Isuan a masanga hangai rang ha ei ti pe, “Pathiana iamna siak u ro. 23Atak taka kei na ti ni u zei mi hiva mual hi anthot tan tipuiliana va chul ro, hatuka iam lui a bui no rase ten iam rase ei ti tak pei chuk inti ama ranga hava ha nin ti. #Mt 17.20; 1 Kor 13.2 24Hasik han kei na ti ni u zei borzong a nei zong u ha aman ngeta an iam u ro hava han nangni rang hava ha nin ti. 25Hatuka bor a zong rang nan ding u kip le mi chunga chong a om ten madual u ro. #Mt 6.14-15 26Hanke na Pa u anvana hanin um nangni nei ma siat u ngai dora ei na madual u rang.”

Isua Ningneina rui Ankelna

(Mt 21.23-27; Lk 20.1-8)

27Hatuka hangai ha Jerusalema ahong ret u hatuka ama ha Pathian Biakina achei anlenga hava lai tak han chaizung ngai Lekhanziakpu ngai le atar ngai a kom ahong u na ei ti pe u. 28“Nang hi tu chonga mo hiva ngai hi tumo tho ro ana ti,” ati pe u.

29Isuan hangai ha a ti pe, “Koi um chong khat na rakel u di rong na masang u ro hanke kei na masang u rang i le mo kei tho. 30Johon a baptisma van ata mo ei ni ole miring ata mo na masang u ro?”

31Hava han amani le amani anril u na, “Anvan ningneina ata na ti le, ‘Hanle iam u mak chena na ti inti.’ 32‘Miring ningneina lehan ti ret thei mak me,’ asik chu mipui achi u na. Asik chu mi doran Johon ha deari tak keng atia ei riat u ani na.” 33Hantin han amanin Isua ha ei masang u, “Re mak me,” atina. Hatuka Isuan hangai rang ha, “Koi um i le mo kei tho na ril u no ning,” ati pe.

Currently Selected:

MARKIN 11: RANGBSI

Highlight

Copy